सलमान खानच्या आगामी 'बॅटल ऑफ गलवान' या चित्रपटाचे फुटेज व्हायरल झाल्याचा दावा केला जात आहे, ज्यात तो चिनी सैनिकांशी लढताना दिसत आहे. काही नेटकऱ्यांनी ही क्लिप बनावट असून AI ची कमाल असल्याचे म्हटले आहे.
Salman Battle Of Galwan Footage Leaked: सलमान खानचे चाहते त्याच्या आगामी 'बॅटल ऑफ गलवान' या चित्रपटाची वाट पाहत आहेत. दबंग खान स्वतःही या चित्रपटासाठी खूप उत्सुक आहे. नुकताच या चित्रपटाचा टीझर प्रदर्शित झाला होता. त्यानंतर चाहत्यांची उत्सुकता आणखी वाढली आहे. दरम्यान, सोशल मीडियावर एक व्हिडिओ वेगाने व्हायरल होत आहे. ज्याला युजर्स अपूर्व लाखिया दिग्दर्शित चित्रपटाचे लीक झालेले फुटेज मानत आहेत.
'बॅटल ऑफ गलवान'चे फुटेज लीक झाले का?
'बॅटल ऑफ गलवान'च्या व्हायरल क्लिपमध्ये सलमान खान लष्कराच्या गणवेशात दिसत आहे. जखमी अवस्थेत, हात-पायांतून रक्त वाहत असतानाही तो बर्फाच्छादित डोंगरावर चढताना दिसत आहे. दरम्यान, जेव्हा तो शिखरावर पोहोचतो, तेव्हा तो चिनी सैनिकांवर तुटून पडतो. तो आपल्या जवानांच्या मृत्यूचा एक-एक करून बदला घेतो. हा व्हिडिओ एका युझरने X वर “#BattleOfGalwan मधून लीक झालेले फुटेज #सलमानखान च्या #BattleOfGalwan मधील काही दृश्ये इंटरनेटवर शेअर केली जात आहेत.” या कॅप्शनसह शेअर केला आहे.
युझर्सनीच उघड केले लीक झालेल्या दृश्यामागील सत्य
दरम्यान, हा व्हायरल व्हिडिओ AI ने तयार केला असल्याचे स्पष्ट झाले आहे. अनेक सोशल मीडिया युझर्सनी या क्लिपवर प्रतिक्रिया देताना हेच म्हटले आहे. एकाने लिहिले, "पण जेव्हा ही घटना घडली, तेव्हा तिथे बर्फ नव्हता. असे वाटते की हे AI ने तयार केले आहे." दुसऱ्याने म्हटले, "कृपया इंस्टाग्रामवर या AI ने बनवलेल्या मूर्खपणाने लोकांना वेड्यात काढू नका. इथे सर्व सुशिक्षित लोक आहेत."
Related Articles
गलवानच्या लढाईबद्दल
अपूर्व लाखिया दिग्दर्शित 'बॅटल ऑफ गलवान'मध्ये २०२० साली गलवान खोऱ्यात भारतीय आणि चिनी सैनिकांमध्ये झालेल्या रक्तरंजित संघर्षाचे चित्रण आहे. ही लढाई कोणत्याही शस्त्रास्त्रांशिवाय लढली गेली होती, तरीही यात दोन्ही बाजूंचे अनेक सैनिक मारले गेले होते. सैनिकांनी दोन्ही देशांमधील करारानुसार, पिस्तूल, रायफलऐवजी काठ्या आणि दगडांनी लढा दिला, ज्यामुळे ही अलीकडच्या भारतीय इतिहासातील सर्वात भावनिक कथांपैकी एक बनली आहे.
नुकताच 'बॅटल ऑफ गलवान'चा टीझर प्रदर्शित झाला होता. यात सलमान खान दमदार लूकमध्ये दिसला. टीझरमधील दमदार व्हिज्युअल्सनी प्रभाव टाकला आहे, ज्यात खडतर प्रदेश आणि उंचीवरील लढाईचे वास्तव दाखवण्यात आले आहे. 'बॅटल ऑफ गलवान'ची निर्मिती सलमान खान फिल्म्सच्या बॅनरखाली करण्यात आली आहे. हा चित्रपट एप्रिल २०२६ मध्ये चित्रपटगृहात प्रदर्शित होईल.
