WhatsApp Premium : लोकप्रिय मेसेजिंग ॲप व्हॉट्सॲप लवकरच एक प्रीमियम सबस्क्रिप्शन प्लॅन आणण्याच्या तयारीत असल्याची माहिती समोर आली आहे. 'व्हॉट्सॲप प्लस' असं नाव या सेवेले मिळण्याची शक्यता आहे.
कॅलिफोर्निया: आपलं लाडकं मेसेजिंग ॲप व्हॉट्सॲप लवकरच एक प्रीमियम सबस्क्रिप्शन प्लॅन आणण्याच्या तयारीत आहे, अशी माहिती रिपोर्टमधून समोर आली आहे. या नवीन सेवेमुळे युजर्सना ॲपमध्ये अधिक कस्टमायझेशनचे पर्याय आणि काही अतिरिक्त फीचर्स मिळतील. अर्थात, नेहमीच्या वापरासाठी ॲप मोफतच राहणार आहे, पण ज्यांना अधिक सुविधा हव्या आहेत, त्यांना हा प्रीमियम प्लॅन सबस्क्राइब करता येईल, असं म्हटलं जातंय.
या नवीन व्हर्जनला 'व्हॉट्सॲप प्लस' असं नाव दिलं जाण्याची शक्यता आहे. सध्याच्या व्हर्जनपेक्षा यात अनेक खास फीचर्स आणि कस्टमायझेशनचे पर्याय मिळतील, असं रिपोर्टमध्ये म्हटलं आहे. जे युजर्स दिवसभरात जास्त वेळ व्हॉट्सॲप वापरतात, त्यांच्यासाठी ही सेवा खूप फायदेशीर ठरू शकते.
प्रीमियम प्लॅनचं एक मुख्य वैशिष्ट्य म्हणजे ॲपचा लूक आणि फील आपल्या आवडीनुसार बदलण्याची सोय. युजर्सना नवीन आयकॉन्स, रंग आणि थीम्स निवडता येतील. आजच्या डिजिटल जगात असे छोटे बदलही युजर्सना एक पर्सनल टच देतात, त्यामुळे या कस्टमायझेशन फीचर्सना मोठी मागणी आहे. याशिवाय, प्रीमियम युजर्सना खास स्टिकर्स, वेगळे नोटिफिकेशन साउंड्स आणि चॅटमध्ये अधिक आकर्षक रिॲक्शन्स देण्याची सुविधाही मिळू शकते. यामुळे चॅटिंगचा अनुभव अधिक मजेशीर होईल, अशी कंपनीला आशा आहे.
Related Articles
चॅट्ससाठी मिळणार अधिक फीचर्स
यासोबतच, आणखी एक महत्त्वाचं फीचर म्हणजे जास्त चॅट्स पिन करण्याची सुविधा. हे फीचर सध्या टेस्टिंगमध्ये आहे. सध्या युजर्सना आपल्या इनबॉक्समध्ये सर्वात वर फक्त तीन चॅट्स पिन करता येतात. पण नवीन प्रीमियम व्हर्जनमध्ये ही मर्यादा २० पर्यंत वाढण्याची शक्यता आहे. जे लोक वैयक्तिक आणि व्यावसायिक कामांसाठी व्हॉट्सॲपचा मोठ्या प्रमाणावर वापर करतात, त्यांच्यासाठी हे खूप उपयुक्त ठरेल. या फीचरमुळे महत्त्वाचे संवाद सहजपणे सर्वात वर ठेवता येतील.
कमाईच्या मॉडेलमध्ये बदल
व्हॉट्सॲपची मूळ कंपनी 'मेटा प्लॅटफॉर्म्स'साठी हा एक मोठा बदल मानला जात आहे. कंपनीच्या इतर सोशल मीडिया प्लॅटफॉर्म्सच्या तुलनेत व्हॉट्सॲप जाहिरातींवर कमी अवलंबून होतं. प्रायव्हेट मेसेजिंग ॲप असल्यामुळे इथे जाहिराती दाखवण्यावर मर्यादा होत्या. गेल्या काही वर्षांत अनेक डिजिटल सेवांनी सबस्क्रिप्शन-आधारित मॉडेल स्वीकारलं आहे. त्यामुळे, जर 'व्हॉट्सॲप प्लस' आलं, तर मुख्य सेवा मोफत ठेवून मेटाला कमाईचा एक नवीन मार्ग मिळेल.
विशेष म्हणजे, सुरुवातीच्या काळात व्हॉट्सॲप एक पेड ॲप होतं. नंतर ते पूर्णपणे मोफत झालं. पण आता पुन्हा एकदा प्रीमियम फीचर्स देऊन नवीन सबस्क्रिप्शन मॉडेल आणण्याच्या शक्यतेवर कंपनी काम करत आहे. अर्थात, या नवीन सबस्क्रिप्शन प्लॅनची किंमत किती असेल किंवा ते कधी लाँच होईल, याबाबत कंपनीने अद्याप कोणतीही अधिकृत घोषणा केलेली नाही. हे ॲप सर्वांसाठी उपलब्ध करण्यापूर्वी त्यात आणखी काही फीचर्स जोडले जाण्याची शक्यताही नाकारता येत नाही.
