Tata Sierra च्या बुकिंगमधून आश्चर्यकारक ट्रेंड समोर, या व्हेरायंटला जास्त पसंती!
Tata Sierra Diesel Demand Surges Past 50 Percent of Bookings : टाटा सिएराची बुकिंग सुरू झाल्यावर डिझेल व्हेरियंटला सर्वाधिक मागणी आहे. सुमारे ५५ टक्के बुकिंग डिझेल मॉडेलला मिळाली असून, हे प्रतिस्पर्धी क्रेटा आणि सेल्टोसपेक्षा जास्त मागणी दर्शवते.
रंजक बाबी समोर
टाटा मोटर्सची आयकॉनिक एसयूव्ही सिएरा नुकतीच भारतीय बाजारात परतली आहे. नवीन सिएराची बुकिंग सुरू होऊन सुमारे एक महिना झाला आहे. गाडीच्या सुरुवातीच्या बुकिंग ट्रेंडमधून काही रंजक गोष्टी समोर आल्या आहेत. डीलर सूत्रांनुसार, आतापर्यंत मिळालेल्या बुकिंगपैकी सुमारे ५५ टक्के बुकिंग डिझेल व्हेरिएंटसाठी आहेत. यावरून मध्यम आकाराच्या एसयूव्ही सेगमेंटमध्ये डिझेलला मोठी मागणी असल्याचे स्पष्ट होते. त्याच वेळी, नवीन टर्बो-पेट्रोल सिएराला सुमारे २० टक्के बुकिंग मिळाली आहे. उर्वरित २५ टक्के लोकांनी नॅचरली एस्पिरेटेड पेट्रोल व्हेरिएंट निवडल्याचे आकडेवारी सांगते.
डिझेल व्हेरिएंट निवडण्याची कारणे
सिएराचा डिझेलमधील बाजारातील वाटा तिच्या थेट प्रतिस्पर्धी ह्युंदाई क्रेटा आणि किया सेल्टोसपेक्षा जास्त आहे. ऑटोकार इंडियाच्या मते, क्रेटाच्या विक्रीत डिझेलचा वाटा सुमारे ४४ टक्के आहे, तर सेल्टोसचा आकडा यापेक्षाही कमी आहे. याचे सर्वात मोठे कारण म्हणजे टाटाने सिएराच्या सर्व व्हेरिएंटमध्ये डिझेल इंजिन उपलब्ध करून दिले आहे, असे मानले जाते. सिएरा डिझेलची एक्स-शोरूम किंमत १२.९९ लाखांपासून सुरू होऊन २१.२९ लाखांपर्यंत जाते.
डिझेल इंजिनमध्ये १३ व्हेरिएंट्स
टाटा सिएरा २५ व्हेरिएंटमध्ये उपलब्ध आहे, त्यापैकी १३ फक्त डिझेल आहेत. डिझेल व्हेरिएंटमध्ये मॅन्युअल आणि ऑटोमॅटिक गिअरबॉक्सचे पर्याय मिळतात, ज्यामुळे ते अधिक व्यावहारिक बनते. तुलनेत, क्रेटा आणि सेल्टोस अधिक पेट्रोल व्हेरिएंट्स देतात. विशेषतः, सेल्टोसचे डिझेल इंजिन फक्त मिड आणि टॉप-स्पेक ट्रिम्सपुरते मर्यादित आहे. यामुळेच सिएराचे डिझेल व्हर्जन अधिक ग्राहकांना आकर्षित करत आहे.
पॉवरट्रेन
पेट्रोल कार बाजारात अधिक लोकप्रिय असूनही, डिझेल इंजिनने एसयूव्ही सेगमेंटमध्ये आपले मजबूत स्थान कायम ठेवले आहे, हे या ट्रेंडमधून सिद्ध होते. जास्त टॉर्क आणि उत्तम हायवे ड्रायव्हिंग कामगिरीमुळे डिझेल एसयूव्ही ग्राहकांमध्ये अधिक लोकप्रिय आहेत. सिएरामध्ये तीन इंजिन पर्याय आहेत: १.५ लिटर एनए पेट्रोल, १.५ लिटर डिझेल आणि १.५ लिटर टर्बो-पेट्रोल इंजिन.
