गुड न्यूज: बजाजची नवी स्वस्त इलेक्ट्रिक स्कूटर येतेय! मध्यमवर्गीयांसाठी जॅकपॉट!
बजाज ऑटो 14 जानेवारी 2026 रोजी कमी किमतीत नवीन चेतक इलेक्ट्रिक स्कूटर लाँच करणार आहे. हे मॉडेल मध्यमवर्गीय ग्राहकांना डोळ्यासमोर ठेवून आणले जात आहे. यात कोणते फीचर्स आहेत, चला, जाणून घेऊया याची किंमत आणि खास वैशिष्ट्ये.
मध्यमवर्गीयांसाठी काय खास असेल या स्कूटरमध्ये?
भारतीय दुचाकी ईव्ही बाजारात आपले स्थान अधिक मजबूत करण्यासाठी, बजाज ऑटो 14 जानेवारी 2026 रोजी नवीन बजाज चेतक इलेक्ट्रिक स्कूटर लाँच करण्याच्या तयारीत आहे. हे नवीन मॉडेल सध्याच्या प्रीमियम चेतक मॉडेल्सपेक्षा कमी किमतीत अपेक्षित आहे. ही स्कूटर मध्यमवर्गीय आणि पहिल्यांदा ईव्ही खरेदी करणाऱ्या ग्राहकांसाठी आहे.
प्रवास अधिक सोपा आणि स्वस्त
या नवीन चेतकद्वारे इलेक्ट्रिक प्रवास अधिक सोपा आणि स्वस्त बनवणे हे बजाजचे मुख्य उद्दिष्ट आहे. भारतातील वेगाने वाढणाऱ्या ईव्ही दुचाकी बाजारात, कमी किमतीचे एक मजबूत मॉडेल आणून अधिकाधिक लोकांना आकर्षित करण्याची बजाजची योजना आहे. यातून कंपनीला ईव्ही विभागातील आपला बाजारातील वाटा वाढवायचा आहे.
स्कूटरला अधिक मॉडर्न लूक
14 जानेवारीच्या लाँचसाठी बजाजच्या निमंत्रण पत्रिकेत, नवीन चेतक स्कूटरच्या मागील डिझाइनबद्दल एक संकेत दिला आहे. सध्याच्या चेतक मॉडेल्समधील स्प्लिट LED टेल लाईटऐवजी, या नवीन मॉडेलमध्ये एक आकर्षक हॉरिझॉन्टल LED स्ट्रिप दिली आहे. LED युनिटच्या दोन्ही टोकांना इंडिकेटर्स आहेत. टेल लाईटच्या वर चेतकचा लोगो असल्याने स्कूटरला अधिक मॉडर्न लूक मिळतो.
संतुलित राईड क्वालिटी
तांत्रिक वैशिष्ट्यांनुसार, ही नवीन चेतक हब-माउंटेड मोटरसह येईल अशी माहिती आहे. समोर टेलिस्कोपिक फोर्क आणि मागे ड्युअल शॉक ॲबसॉर्बर दिल्याने संतुलित राईड क्वालिटी मिळते. यात 12-इंच अलॉय व्हील्स, समोर डिस्क ब्रेक आणि मागे ड्रम ब्रेक असेल. खर्च कमी करण्यासाठी, TFT डिस्प्लेऐवजी साधा LCD इन्स्ट्रुमेंट क्लस्टर दिला जाऊ शकतो.
कमी किमत, बाजारात उत्सूकता
सध्या विक्रीसाठी असलेल्या बजाज चेतक लाइनअपमध्ये 3kWh आणि 3.5kWh बॅटरीचे पर्याय आहेत. 3001 आणि 35 सिरीजमध्ये विभागलेल्या या लाइनअपमध्ये 3501, 3502, 3503 असे अनेक व्हेरिएंट्स उपलब्ध आहेत. बेसिक मॉडेल्स LCD डिस्प्ले आणि मोबाईल कनेक्टिव्हिटीसह येतात, तर हाय व्हेरिएंट्समध्ये TFT आणि टच स्क्रीन फीचर्स आहेत. याची किंमत ₹99,500 ते ₹1.22 लाख (एक्स-शोरूम) पर्यंत आहे. नवीन बजेट चेतक यापेक्षा कमी किमतीत येण्याची शक्यता असल्याने बाजारात मोठी उत्सुकता आहे.
