- Home
- Utility News
- SIP Vs PPF : दर महिन्याला 3 हजार गुंतवून मिळतील 14 लाख; SIP की PPF? कोणत्या योजनेतून किती फायदा?
SIP Vs PPF : दर महिन्याला 3 हजार गुंतवून मिळतील 14 लाख; SIP की PPF? कोणत्या योजनेतून किती फायदा?
SIP आणि PPF मध्ये कमी गुंतवणुकीत जास्त फायदा कशात आहे? तुम्ही १५ वर्षे दर महिन्याला ३,००० रुपये गुंतवले, तर SIP आणि PPF मधून किती परतावा मिळेल, हे सोप्या भाषेत समजून घेऊया.
SIP - PPF
भविष्यातील गरजांसाठी पैसे कमवणे आणि ते योग्य ठिकाणी गुंतवणे खूप महत्त्वाचे आहे. तुम्ही लाँग टर्म इन्व्हेस्टमेंटचा विचार करता, तेव्हा SIP (सिस्टिमॅटिक इन्व्हेस्टमेंट प्लॅन) आणि PPF (पब्लिक प्रॉव्हिडंट फंड) हे दोन मुख्य पर्याय डोळ्यांसमोर येतात.
किती रिटर्न्स मिळतात?
SIP हा मार्केटवर आधारित गुंतवणुकीचा पर्याय आहे. यात थोडी जोखीम असली तरी जास्त परतावा मिळण्याची शक्यता असते.
दुसरीकडे, PPF ही केंद्र सरकारची अत्यंत सुरक्षित योजना आहे. सध्या सरकार PPF वर ७.१ टक्के वार्षिक व्याज देते आणि यात १५ वर्षांचा लॉक-इन पिरियड असतो. इक्विटी म्युच्युअल फंड SIP मध्ये मार्केटनुसार चढ-उतार होत असले, तरी दीर्घकाळात यातून सरासरी १२ ते १५ टक्के परतावा मिळतो.
SIP मधील चक्रवाढ व्याज किती रिटर्न मिळवून देईल?
तुम्ही १५ वर्षे दर महिन्याला ३,००० रुपये SIP मध्ये गुंतवले आणि त्यावर सरासरी १२ टक्के वार्षिक परतावा मिळाला, तर तुमची गुंतवणूक वेगाने वाढेल. १५ वर्षांत तुमची एकूण गुंतवणूक ५.४० लाख रुपये होईल. यावर तुम्हाला अंदाजे ८.८७ लाख रुपयांचा नफा मिळेल. म्हणजेच मॅच्युरिटीच्या वेळी तुमच्या हातात एकूण १४.३० लाख रुपये येतील. SIP मधील चक्रवाढ व्याज (कंपाउंडिंग) तुमचे पैसे वेगाने वाढवते.
PPF मध्ये किती परतावा मिळेल?
तुम्ही हेच ३,००० रुपये दर महिन्याला PPF मध्ये १५ वर्षांसाठी गुंतवले, तर तुमची एकूण गुंतवणूक ५.४० लाख रुपयेच राहील. सध्याच्या ७.१ टक्के व्याजदरानुसार, या १५ वर्षांत तुम्हाला सुमारे ४.१४ लाख रुपये व्याज मिळेल. म्हणजेच मॅच्युरिटीच्या वेळी तुम्हाला एकूण ९.५४ लाख रुपये मिळतील. यावरून स्पष्ट होते की, SIP च्या तुलनेत PPF मध्ये मिळणारा परतावा कमी असतो.
१५ वर्षांच्या कालावधीसाठी कोणती योजना बेस्ट?
कॅल्क्युलेशन एकदम स्पष्ट आहे. १५ वर्षांच्या कालावधीत SIP मधून PPF पेक्षा जवळपास ६ लाख रुपये जास्त मिळण्याची शक्यता आहे. तुम्हाला मार्केटची कोणतीही जोखीम घ्यायची नसेल आणि टॅक्स-फ्री गॅरंटीड रिटर्न्स हवे असतील, तर PPF तुमच्यासाठी परफेक्ट पर्याय आहे. पण, वाढत्या महागाईवर मात करून वेगाने संपत्ती निर्माण करणे हे तुमचे ध्येय असेल, तर SIP हा एक उत्तम पर्याय ठरतो.
