- Home
- Utility News
- कर्ज स्वस्त होणार की महाग? RBI गव्हर्नर संजय मल्होत्रा यांनी घेतले ५ मोठे निर्णय; तुमच्या खिशावर काय होणार परिणाम?
कर्ज स्वस्त होणार की महाग? RBI गव्हर्नर संजय मल्होत्रा यांनी घेतले ५ मोठे निर्णय; तुमच्या खिशावर काय होणार परिणाम?
RBI Monetary Policy 2026: भारतीय रिझर्व्ह बँकेने (RBI) मॉनेटरी पॉलिसी बैठकीत रेपो दर ५.२५% वर स्थिर ठेवला, ज्यामुळे कर्जाचा EMI तूर्तास वाढणार नाही. एल निनोमुळे भविष्यात महागाई वाढण्याचा धोका वर्तवला, चालू वर्षासाठी GDP वाढीचा अंदाज ६.९% ठेवलाय.
कर्ज स्वस्त होणार की महाग? RBI गव्हर्नर संजय मल्होत्रा यांनी घेतले ५ मोठे निर्णय
RBI Monetary Policy 2026: भारतीय रिझर्व्ह बँकेच्या मॉनेटरी पॉलिसी कमिटीची (MPC) तीन दिवसांची महत्त्वाची बैठक आज ८ एप्रिल २०२६ रोजी संपन्न झाली. या बैठकीनंतर गव्हर्नर संजय मल्होत्रा यांनी घेतलेल्या निर्णयांचा थेट परिणाम तुमच्या होम लोन, कार लोन आणि बचतीवर होणार आहे.
१. तुमचा EMI बदलणार का? (रेपो रेट स्थिर)
आरबीआयने सर्वसामान्यांना मोठा दिलासा देत रेपो दर ५.२५% वर स्थिर ठेवला आहे. सलग दुसऱ्यांदा व्याजात कोणताही बदल झालेला नाही.
परिणाम: तुमचा बँक हप्ता (EMI) सध्या तरी वाढणार नाही. मात्र, डिसेंबरमध्ये झालेली कपात पाहता, बँका येणाऱ्या काळात व्याजदर थोडे कमी करण्याची शक्यता आहे.
२. महागाईचा नवा अंदाज (CPI Inflation)
आर्थिक वर्ष २०२६-२७ साठी महागाईचा दर ४.६% राहण्याचा अंदाज आरबीआयने वर्तवला आहे. विशेष म्हणजे प्रथमच 'कोअर महागाई'चा अंदाज ४.४% इतका जाहीर करण्यात आला आहे. म्हणजे येत्या काळात वस्तूंच्या किमती नियंत्रणात राहतील अशी आशा आहे.
३. 'एल निनो'चा धोक्याचा इशारा!
आरबीआयने एका संकटाची जाणीव करून दिली आहे, ते म्हणजे 'एल निनो'. यामुळे पावसावर परिणाम होऊन शेतीमालाचे उत्पादन घटू शकते. जर पाऊस कमी झाला, तर अन्नधान्याच्या किमती वाढून सर्वसामान्यांच्या किचनचे बजेट कोलमडू शकते.
४. देशाची अर्थव्यवस्था किती वेगाने धावणार? (GDP)
चालू आर्थिक वर्षासाठी भारताचा GDP ६.९% राहण्याचा अंदाज व्यक्त करण्यात आला आहे. गेल्या वर्षी (७.६%) च्या तुलनेत हा वेग थोडा कमी असला, तरी जागतिक मंदीच्या तुलनेत भारत एक 'ब्राइट स्पॉट' आहे.
Q1: ६.८% | Q2: ६.७% | Q3: ७% | Q4: ७.२%
५. विदेशी चलन साठ्यात ऐतिहासिक उसळी
भारताची आर्थिक ताकद वाढत असून देशाचा विदेशी चलन साठा ६९७.१० अब्ज डॉलरवर पोहोचला आहे. भारताकडे ११ महिने पुरेल इतका आयात साठा असून, यामुळे रुपयाला मजबूती मिळणार आहे.
तज्ज्ञांचे मत काय?
आरबीआयने सध्या 'वेट अँड वॉच'ची भूमिका घेतली आहे. महागाई नियंत्रणात येत असली तरी हवामानाचा धोका पाहता व्याजदर कपातीसाठी काही काळ वाट पाहावी लागू शकते.
तुमचा EMI सध्या वाढणार नाही ही आनंदाची बातमी आहे, पण महागाई वाढू नये यासाठी पावसावर सर्वांची नजर असेल!
