Personal Loan: लोन मंजूर (approve) झाल्यावरही पैसे खात्यात यायला अनेकदा उशीर होतो. बँकेसोबतचे तुमचे संबंध, तुमच्या उत्पन्नाच्या कागदपत्रांमधील स्पष्टता आणि तुम्ही मागितलेली कर्जाची रक्कम, यांसारख्या गोष्टी या विलंबामागे कारणीभूत असतात.
फोनवर 'Approved' असा मेसेज आला की आपल्याला वाटतं, आता कर्जाचे पैसे लगेच आपल्या खात्यात जमा होतील. अनेक बँका 'मिनिटांत पर्सनल लोन मिळवा' अशा जाहिरातीही करतात. पण प्रत्यक्षात लोन मंजूर होऊनही पैसे हातात यायला कधीकधी काही दिवस लागतात. यामागे नेमकी काय कारणं आहेत, हे बँका स्पष्टपणे सांगत नाहीत. चला, जाणून घेऊया या विलंबामागे काय दडलंय.
1. बँकेसोबत तुमचे संबंध कसे आहेत?
तुमचा पगार ज्या बँकेत येतो किंवा ज्या बँकेत तुम्ही नियमित व्यवहार करता, तिथेच तुम्ही लोनसाठी अर्ज केलात, तर पैसे लवकर मिळण्याची शक्यता जास्त असते. कारण तुमचं उत्पन्न, राहण्याचा पत्ता आणि पैशांचे व्यवहार सांभाळण्याची तुमची पद्धत याबद्दल बँकेला आधीच माहिती असते. पण जर तुम्ही नवीन बँकेत अर्ज केला, तर तुमचं उत्पन्न आणि पत्ता तपासण्यासाठी बँकेला एक-दोन दिवस जास्त लागू शकतात.
2. उत्पन्नाच्या कागदपत्रांमधील स्पष्टता
तुमचं उत्पन्न किती जास्त आहे, यापेक्षा तुमच्या कागदपत्रांमध्ये किती स्पष्टता आहे, याला बँका जास्त महत्त्व देतात. ज्यांना दर महिन्याला ठराविक पगार मिळतो, त्यांच्यासाठी कर्जाची प्रक्रिया सोपी असते. पण जे व्यवसाय करतात किंवा ज्यांच्या उत्पन्नात सतत बदल होत असतो, त्यांची बँक स्टेटमेंट्स, जीएसटीची कागदपत्रं आणि इन्कम टॅक्स रिटर्न्स तपासण्यासाठी बँकेला जास्त वेळ लागतो. एखाद्या महिन्यातल्या हिशोबात काही गडबड दिसल्यास, ऑटोमॅटिक तपासणीऐवजी बँकेचे अधिकारी स्वतः कागदपत्रं तपासतात. यामुळे लोन मिळायला उशीर होतो.
Related Articles
3. कर्जाची रक्कम आणि तुमची पार्श्वभूमी
तुमचा क्रेडिट स्कोअर चांगला असला तरी, तुम्ही किती रकमेचं कर्ज मागत आहात हे महत्त्वाचं आहे. तुमच्या उत्पन्नाला परवडेल अशी छोटी रक्कम मागितल्यास, कर्ज लवकर मंजूर होतं. पण जर तुम्ही मोठी रक्कम मागितली, तर बँक जास्त काळजीपूर्वक तपासणी करते. तुम्ही याआधी घेतलेल्या कर्जाचे हप्ते (EMI) थकवले असतील किंवा सध्या तुमचे जास्त EMI सुरू असतील, तर बँक अधिक चौकशी करूनच पैसे देते.
4. पैसे ट्रान्सफर करण्याची पद्धत
कर्ज मंजूर झाल्यावरही काही तांत्रिक अडचणींमुळे पैसे लगेच जमा होत नाहीत. बँकेच्या कामाची वेळ, सुट्ट्यांचे दिवस यांचाही परिणाम पैसे मिळण्यावर होतो. डिजिटल बँका आणि लोन ॲप्स सहसा लवकर पैसे ट्रान्सफर करतात. पण पारंपरिक बँकांमध्ये शेवटच्या मंजुरीसाठी काही अतिरिक्त प्रक्रिया असू शकतात, ज्यामुळे वेळ लागतो.
किती दिवस वाट पाहावी लागू शकते?
पगार जमा होणाऱ्या बँकेतील प्री-ॲप्रूव्ह्ड लोन: अर्ज केल्याच्या दिवशीच पैसे मिळू शकतात.
पगारदार व्यक्ती (इतर बँका): १ ते ३ कामकाजाचे दिवस.
व्यावसायिक / नवीन बँकेत अर्ज केल्यास: ५ ते ७ कामकाजाचे दिवस.
जर तुम्हाला कर्ज लवकर हवं असेल, तर आधी तुमच्या खात्याच्या बँकेत चौकशी करा. तुमच्या उत्पन्नाला परवडेल एवढीच रक्कम कर्जासाठी मागा. आर्थिक कागदपत्रं सोपी आणि स्पष्ट ठेवल्यास प्रक्रिया अधिक वेगवान होण्यास मदत होते.
