IRCTC Current Booking : चार्ट लागल्यावरही कन्फर्म तिकीट कसं मिळवायचं? पाहा ही भन्नाट ट्रिक

भारतीय रेल्वेमध्ये चार्ट तयार झाल्यानंतरही आता तुम्हाला सहज तिकीट मिळू शकतं. चार्ट लागल्यानंतर तिकीट कसं बुक करायचं, याची सविस्तर माहिती आपण पाहणार आहोत.

Image Credit : X

चार्ट लागल्यानंतर तिकीट कसं बुक करायचं?

आयआरसीटीसीची 'करंट बुकिंग' (IRCTC Current Booking) सुविधा ऐनवेळच्या प्रवासासाठी खूप फायद्याची ठरते. चार्ट तयार झाल्यानंतर तिकीट मिळणं अशक्य आहे, असं अनेकांना वाटतं. पण रिझर्व्हेशन चार्ट लागल्यानंतरही ट्रेनमध्ये काही सीट्स रिकाम्या असण्याची दाट शक्यता असते. या रिकाम्या सीट्स शोधून तुम्ही आयआरसीटीसी ॲपवरून सहज तिकीट बुक करू शकता. विशेष म्हणजे, यासाठी तत्काळसारखं कोणतंही जास्तीचं शुल्क द्यावं लागत नाही. तुम्ही नेहमीच्या तिकीट दरातच कन्फर्म तिकीट मिळवू शकता.

Image Credit : Rounak_Kayal to Pexels

आयआरसीटीसी ॲपवर कसं शोधायचं?

तुमच्या मोबाईलमध्ये 'आयआरसीटीसी रेल कनेक्ट' (IRCTC Rail Connect) ॲप उघडा आणि 'Train' या पर्यायावर जा. तिथे तुम्हाला 'Chart Vacancy' असा एक वेगळा पर्याय दिसेल. त्यावर क्लिक केल्यावर रिकाम्या सीट्स शोधण्यासाठी एक नवीन पेज उघडेल. या पेजवर तुम्हाला तुमच्या ट्रेनचं नाव किंवा नंबर टाकायचा आहे. यासोबतच प्रवासाची तारीख आणि तुम्ही ज्या स्टेशनवरून ट्रेन पकडणार आहात (Boarding Station), त्याची माहिती अचूक भरायची आहे. ही माहिती भरल्यानंतर, त्या ट्रेनच्या कोणत्या डब्यात (Coaches) किती सीट्स रिकाम्या आहेत, याची संपूर्ण माहिती स्क्रीनवर दिसेल.

Image Credit : x.com/GMSRailway

प्रवासाचं अंतर आणि सीट बुकिंग

इथे एक महत्त्वाची गोष्ट लक्षात ठेवणं गरजेचं आहे. स्क्रीनवर दिसणारी रिकामी सीट, ट्रेनच्या सुरुवातीच्या स्टेशनपासून शेवटच्या स्टेशनपर्यंत रिकामी असेलच असं नाही. ती सीट फक्त काही ठराविक स्टेशन्सच्या दरम्यानच रिकामी असू शकते. त्यामुळे तुम्ही जेवढा प्रवास करणार आहात, तेवढ्या अंतरासाठी ती सीट रिकामी आहे का, हे दोनदा तपासून पाहणं चांगलं. तुमच्या प्रवासासाठी सीट उपलब्ध असल्याची खात्री झाल्यानंतरच तुम्ही पुढच्या प्रक्रियेकडे वळू शकता. यामुळे तुमचा गोंधळ उडणार नाही.

Image Credit : Gemini AI

कन्फर्म तिकीट कसं मिळवायचं?

सीट रिकामी असल्याची खात्री झाल्यानंतर, ॲपमध्येच 'Current Booking' या पर्यायावर जा. तिथे प्रवाशांची माहिती भरा आणि नेहमीप्रमाणे ऑनलाइन पेमेंट करा. पैसे भरल्यानंतर काही मिनिटांतच तुम्हाला तुमचं कन्फर्म तिकीट मिळेल. रेल्वेच्या नियमांनुसार, चार्ट तयार झाल्यानंतर उरलेल्या सर्व सीट्स प्रवाशांना फक्त 'करंट बुकिंग'द्वारेच दिल्या जातात. यामध्ये तुम्हाला फक्त कन्फर्म तिकीटच मिळतं, वेटिंग लिस्ट नसते. त्यामुळे आता ऐनवेळच्या प्रवासाला तत्काळचं जास्तीचं शुल्क न देता, या सोप्या पद्धतीने तुम्ही ट्रेनमध्ये तिकीट बुक करू शकता.