भारतीयांचा लाडका राजमा आता जगभरात फेमस झालाय. 'टेस्ट ऍटलस'च्या 'बेस्ट बीन डिश'च्या यादीत टॉप २० मध्ये स्थान मिळवून राजम्याने भारतीय पदार्थाला मोठा मान मिळवून दिला आहे. राजमा-चावलच्या क्लासिक जोडीनेही या यादीत आपलं स्थान पक्कं केलंय.
Rajma Chawal Global Popularity: भारतीय जेवणाचा विषय निघाला आणि राजमा-चावलचं नाव आलं नाही, असं शक्यच नाही. दुपारचं जेवण असो, विकेंडचा खास मेन्यू असो किंवा घरगुती साधं-सोपं जेवण, राजमा प्रत्येक वेळी लोकांची मनं जिंकतो. त्याचा सुगंध, मसाल्यांची चव आणि क्रीमी ग्रेव्ही पिढ्यानपिढ्या लोकांना आवडत आली आहे. पण आता ही आवड फक्त भारतापुरती राहिलेली नाही, तर राजम्याने जगभरात आपली एक वेगळी ओळख निर्माण केली आहे. नुकतंच, 'टेस्ट ऍटलस' (Taste Atlas) ने जाहीर केलेल्या रँकिंगमध्ये राजम्याने एक मोठी जागा मिळवून भारतीय जेवणाचा मान वाढवला आहे.
टेस्ट ऍटलसच्या यादीत राजमाचा जलवा
टेस्ट ऍटलस हा एक आंतरराष्ट्रीय प्लॅटफॉर्म आहे, जो जगभरातील पारंपरिक आणि लोकप्रिय पदार्थांना त्यांच्या रेटिंग आणि रिव्ह्यूच्या आधारावर रँक करतो. नुकतंच या प्लॅटफॉर्मने “जगातील ५० सर्वोत्तम बीन्स डिश” (डाळींचे पदार्थ) यांची यादी जाहीर केली. या यादीत, भारताच्या राजम्याने टॉप २० मध्ये जागा मिळवून सगळ्यांनाच चकित केलंय. साधे मसाले आणि सोप्या पद्धतीने तयार होणाऱ्या राजम्याने आता ग्लोबल फूड मॅपवरही खास ओळख निर्माण केली आहे.
टॉप २० मध्ये जागा मिळवून देशाचा मान वाढवला
टेस्ट ऍटलसच्या यादीत राजमाला १४ वा नंबर मिळाला असून, त्याला ४-स्टार रेटिंगही मिळालं आहे. ही कामगिरी खास आहे, कारण या यादीत जगभरातील अनेक प्रसिद्ध बीन्सचे पदार्थ सामील होते. भारताचा हा साधा पण चवीला भारी असलेला पदार्थ आता आंतरराष्ट्रीय खवय्यांमध्येही लोकप्रिय होत आहे. राजमा आवडणाऱ्यांसाठी ही बातमी म्हणजे एक मोठीच पर्वणी आहे.
Related Articles
राजमा-चावलच्या जोडीनेही धुमाकूळ घातला
राजमाची खरी मजा गरमागरम भातासोबत खाण्यात आहे. या क्लासिक जोडीची चव आणखी भारी लागते. टेस्ट ऍटलसच्या यादीत राजमा-चावलच्या जोडीलाही ३.९ स्टार रेटिंग मिळालं, ज्यामुळे तिला २५ वं स्थान मिळालं. यावरून हेच सिद्ध होतं की भारतीय जेवणाचा साधेपणा हीच त्याची खरी ताकद आहे. याच कारणामुळे जगभरातील लोक या प्रसिद्ध जोडीचे चाहते होत आहेत.
जगाच्या फूड मॅपवर भारताची मजबूत पकड
राजमाचं हे यश फक्त एका डिशपुरतं मर्यादित नाही, तर ते भारताच्या समृद्ध खाद्यसंस्कृतीची एक झलक दाखवतं. TasteAtlas ने जगातील टॉप १० फूड शहरांची यादीही जाहीर केली, ज्यात मुंबईला ५ वा क्रमांक मिळाला आहे. याशिवाय, अमृतसर, नवी दिल्ली, हैदराबाद, कोलकाता आणि चेन्नई यांसारखी शहरं त्यांच्या खास खाद्यसंस्कृतीसाठी प्रसिद्ध आहेत. यावरून हे स्पष्ट होतं की, भारताची चव आता खऱ्या अर्थाने जगभरातील लोकांच्या मनावर राज्य करत आहे.
राजमाची चव इतकी खास का आहे?
राजमाच्या लोकप्रियतेचं रहस्य त्याच्या साधेपणात आणि चवीच्या खोलीत दडलेलं आहे. राजमा रात्रभर भिजवून, नंतर उकडला जातो. मग त्याला आलं, लसूण, कांदा, टोमॅटो आणि पारंपरिक भारतीय मसाल्यांमध्ये मंद आचेवर शिजवलं जातं. याच स्लो-कुकिंग प्रक्रियेमुळे त्याची ग्रेव्ही इतकी क्रीमी आणि चविष्ट बनते. जेव्हा तो गरमागरम वाफाळलेल्या भातासोबत खाल्ला जातो, तेव्हा त्याची चव थेट काळजाला भिडते. म्हणूनच राजमा फक्त एक पदार्थ नाही, तर ती एक भावना आहे, जी लोकांच्या आठवणींशी आणि भावनांशी जोडलेली आहे.
