Gen Z Travel भारतातील तरुण पिढी आता मोठ्या आणि लांबलचक सुट्ट्यांऐवजी छोट्या-छोट्या ट्रिप्सला जास्त पसंती देत आहे, असं Airbnb च्या एका नवीन रिपोर्टमध्ये समोर आलं आहे. मित्रांसोबत एकत्र राहणं आणि प्रसिद्ध ठिकाणांपेक्षा सोबत घालवलेल्या क्षणांना ते अधिक महत्त्व देत आहेत.
Gen Z Travel भारतातील पर्यटन क्षेत्रात एक मोठा बदल दिसून येत आहे. महिनोन्महिने प्लॅनिंग करून मोठ्या सुट्ट्यांवर जाण्याऐवजी, आता आठवड्याभराच्या किंवा वीकेंडच्या छोट्या ट्रिप्सचा ट्रेंड आला आहे. 'एअरबीएनबी' (Airbnb) ने नुकत्याच प्रसिद्ध केलेल्या एका रिपोर्टमध्ये भारतीय तरुणाईच्या या बदललेल्या प्रवासाच्या सवयींबद्दलची रंजक माहिती समोर आली आहे.
लांब सुट्ट्या नकोच; वर्षातून तीन छोट्या ट्रिप्स हव्या
Gen Z Travel या रिपोर्टनुसार, भारतातील ८७ टक्के 'जेन झी' (Gen Z) प्रवाशांना छोट्या ट्रिप्स अधिक आवडतात. वर्षातून एकदाच मोठी ट्रिप करण्याऐवजी, तीन छोट्या ट्रिप्स करायला १० पैकी ७ जण पसंती देतात.
हॉटेल रुम्सपेक्षा एकत्र राहण्यासाठी एकच घर!
प्रवासात राहण्याची सोय निवडतानाही त्यांची विचार करण्याची पद्धत वेगळी आहे. ग्रुपने प्रवास करताना वेगवेगळ्या हॉटेल रुम्स घेण्याऐवजी, सगळ्यांना एकत्र राहता येईल असं एक मोठं घर शेअर करायला निम्म्याहून अधिक तरुणांना आवडतं.
Related Articles
ते मित्रांसोबतच्या नात्याला जास्त महत्त्व देतात. कुठे जातोय यापेक्षा 'कोणासोबत जातोय' हे जास्त महत्त्वाचं असल्याचं ४ पैकी ३ जण मानतात. इतकंच नाही, तर ९५ टक्के तरुण प्रवाशांना वाटतं की त्यांची ट्रिप इतरांपेक्षा वेगळी आणि त्यांच्या स्वतःच्या आवडीनुसार पर्सनलाइज्ड असावी. प्रवासाची पद्धत ही आपल्या व्यक्तिमत्त्वाचं प्रतिबिंब आहे, असं ८७ टक्के तरुणांचं मत आहे.
प्लॅनिंग झटपट, बुकिंग ऐनवेळी!
या पिढीला आधीच ठरवलेले कडक प्लॅन्स आवडत नाहीत. त्यांचे निर्णय झटपट होतात. ६६ टक्के जेन झी प्रवासी प्रवासाला निघण्याच्या काही दिवस किंवा आठवडे आधीच बुकिंग करतात. आपली कोणतीही एक ट्रिप दुसऱ्या ट्रिपसारखी नसते, असं ६७ टक्के जण सांगतात. विशेष म्हणजे, ६३ टक्के लोक एखाद्या ठिकाणाच्या प्रसिद्धीमुळे नाही, तर तिथे सापडलेल्या राहण्याच्या अनोख्या जागेमुळे ते ठिकाण प्रवासासाठी निवडतात. ८२ टक्के लोक ट्रिप प्लॅन करताना राहण्याच्या जागेच्या गुणवत्तेला खूप महत्त्व देतात. आश्चर्याची गोष्ट म्हणजे, ७८ टक्के लोक त्यांच्या प्रवासातील अर्ध्याहून अधिक वेळ ते जिथे थांबले आहेत, त्याच ठिकाणी घालवतात.
पर्यटनापेक्षा सोबतचे क्षण महत्त्वाचे
प्रसिद्ध पर्यटन स्थळांना भेट देण्यापेक्षा, प्रवासात सोबत असलेल्या माणसांबरोबर घालवलेल्या छोट्या-छोट्या क्षणांना या वयोगटातील ८० टक्के लोक प्राधान्य देतात. रोजच्या धावपळीतून आणि कामातून वेळ काढून एकत्र वेळ घालवणं, हाच ग्रुप ट्रिपचा मुख्य उद्देश असतो. यामुळेच, एअरबीएनबीवर भारतीय जेन झी प्रवाशांनी केलेल्या ग्रुप ट्रिप बुकिंगमध्ये गेल्या वर्षीच्या तुलनेत सुमारे ५५ टक्क्यांनी वाढ झाली आहे.
इंटरनेटवर व्हायरल होणाऱ्या ट्रेंडच्या मागे धावण्यात त्यांना रस नाही. ९० टक्के लोक अशी ठिकाणं शोधतात, ज्याबद्दल ऑनलाइन फारसं कोणी बोललेलं नाही किंवा जी जास्त प्रसिद्ध नाहीत. आधीच ठरवलेल्या कार्यक्रमांऐवजी निसर्गाचा आनंद घेणं, फिरणं आणि नवीन पदार्थ चाखून पाहणं त्यांना अधिक आवडतं.
