- Home
- Utility News
- Home Loan Trap : कर्जबाजारी न होता स्वतःचं घर कसं घ्यायचं? आर्थिक तज्ज्ञांचा भन्नाट सल्ला
Home Loan Trap : कर्जबाजारी न होता स्वतःचं घर कसं घ्यायचं? आर्थिक तज्ज्ञांचा भन्नाट सल्ला
होम लोन घेतल्यानंतर डाऊन पेमेंटसाठी पर्सनल लोन घेणं किंवा दागिने गहाण ठेवणं, यामुळे मध्यमवर्गीय लोक कर्जाच्या मोठ्या जाळ्यात अडकतात. अचानक येणाऱ्या खर्चामुळे आणीबाणीच्या काळात स्वतःचं घर गमावण्याची वेळ त्यांच्यावर येऊ शकते.
होम लोन घेताना लोक करतात या चुका
मुंबई : मोठ्या शहरांमध्ये राहायला येणाऱ्या मध्यमवर्गीयांचं स्वतःचं घर घेण्याचं पहिलं स्वप्न असतं. पण योग्य आर्थिक नियोजन न करता होम लोनसोबत पर्सनल लोन आणि गोल्ड लोन घेणारे लोक कर्जाच्या जाळ्यात अडकतात, असा इशारा आर्थिक तज्ज्ञ देतात.
स्वतःच्या घराचं स्वप्न आणि वाढता खर्च
आजच्या काळात शहराबाहेर जागा घ्यायची म्हटलं तरी २० लाखांपेक्षा जास्त खर्च येतो. दर महिन्याला फक्त १० ते २० हजार रुपये वाचवून जागा घेणं सोपं नसतं. मुलांची फी, घरभाडं, ईएमआय, गावी जाण्याचा खर्च, दवाखाना आणि किराणा यामुळे लोक जागा घेणं पुढे ढकलतात.
लोक दागिने गहाण ठेवतात किंवा भाडं वाचवण्यासाठी लीजवर घर घेतात. नुसती जागा घेण्यापेक्षा बिल्डरकडून घर घेणं लोकांना सोयीचं वाटतं. पण नवीन घरात जाण्यासाठी १० ते १५ लाख रुपये डाऊन पेमेंट लागतं.
कर्जाच्या जाळ्यात अडकणारी कुटुंबं
हातात पुरेसे पैसे नसताना लोक दागिने गहाण ठेवतात आणि नातेवाईकांकडून पैसे घेऊन डाऊन पेमेंट करतात. उरलेल्या पैशांसाठी बँकेतून होम लोन घेतात. नंतर नातेवाईकांचे पैसे देण्यासाठी पुन्हा पर्सनल लोन काढतात.
नवीन घरात गेल्यावर अचानक येणाऱ्या २ ते ४ लाखांच्या खर्चामुळे त्यांना आणखी कर्ज घ्यावं लागतं. यामुळे महिन्याचा ईएमआय ५० ते ६० हजारांवर जातो. नोकरी गेल्यास किंवा दवाखान्याचा खर्च आल्यास ईएमआय भरता येत नाही. दागिने लिलावात निघतात आणि बँक घर जप्त करते. नवरा-बायको दोघे कमवत असले तरी त्यांच्यावर ही वेळ येते.
नवीन घर घेणाऱ्यांसाठी खास आर्थिक सल्ला
या कर्जाच्या जाळ्यातून वाचण्यासाठी तज्ज्ञ काही महत्त्वाचे सल्ले देतात. नवीन होम लोन घेताना तुमच्यावर दुसरं कोणतंही कर्ज, विशेषतः गोल्ड लोन नसावं.
जर आधीच गोल्ड लोन असेल, तर दरवर्षी फक्त व्याज न भरता, मुद्दल भरून दागिने सोडवण्याइतपत तुमचं उत्पन्न असावं. तुमचा पगार कितीही असला तरी, सर्व कर्जांचा एकूण ईएमआय तुमच्या महिन्याच्या पगाराच्या ५० टक्क्यांपेक्षा जास्त नसावा.
कर्जाच्या जाळ्यातून बाहेर कसं पडायचं?
अचानक नोकरी गेल्यास किंवा दवाखान्याचा खर्च आल्यास, तुमच्याकडे किमान ६ महिन्यांचा घरखर्च आणि होम लोनचा ईएमआय भरण्याइतके पैसे शिल्लक असले पाहिजेत.
ज्यांना एवढे पैसे साठवता येत नाहीत, त्यांनी घर घेण्याचा निर्णय थोडा पुढे ढकलून लीजवर घर घेणं चांगलं. लीजचे पैसे परत मिळण्याची खात्री नसेल, तर योग्य भाड्याच्या घरात राहून आपली बचत वाढवणं हाच सर्वात सुरक्षित मार्ग आहे, असा सल्ला आर्थिक तज्ज्ञ देतात.
