प्रसिद्ध टेक कंपनी Honor लवकरच आपली 600 सीरिज लाँच करणार आहे. यात Honor 600 आणि 600 Pro हे दोन स्मार्टफोन असतील. 200-मेगापिक्सलचा कॅमेरा, 7,000mAh ची दमदार बॅटरी आणि स्नॅपड्रॅगन प्रोसेसर ही या फोन्सची मुख्य वैशिष्ट्ये आहेत.
स्मार्टफोनच्या जगात Honor पुन्हा एकदा धुमाकूळ घालण्यासाठी सज्ज झालं आहे. कंपनी आपली नवी Honor 600 सीरिज लवकरच ग्लोबल मार्केटमध्ये लाँच करणार आहे, ज्यात Honor 600 Pro आणि Honor 600 हे दोन स्मार्टफोन असतील. या महिन्याच्या अखेरीस हे दोन्ही मॉडेल सादर केले जातील, असं कंपनीने निश्चित केलं आहे. लाँचपूर्वीच कंपनीच्या अधिकृत ऑनलाइन स्टोअरवर या फोन्सचे महत्त्वाचे फीचर्स समोर आले आहेत.
Honor 600 Pro चे फीचर्स
मिळालेल्या माहितीनुसार, Honor 600 Pro मध्ये Qualcomm Snapdragon 8 Elite चिपसेटची ताकद मिळेल. तर, Honor 600 हा Snapdragon 7 Gen 4 SoC प्रोसेसरसह येईल. या दोन्ही स्मार्टफोन्समध्ये 7,000mAh क्षमतेची मोठी बॅटरी असेल. सोबतच, 80W वायर्ड फास्ट चार्जिंग आणि 27W रिव्हर्स चार्जिंगचा सपोर्टही मिळेल.
Honor 600 Pro मॉडेलमध्ये खास 50W वायरलेस फास्ट चार्जिंगची सुविधाही देण्यात आली आहे. हे दोन्ही फोन 7.8mm जाडीच्या स्लिम डिझाइनमध्ये येतात. Honor 600 Pro चे वजन सुमारे 200 ग्रॅम आहे, तर Honor 600 चे वजन फक्त 190 ग्रॅम आहे. या फोन्सना मेटल फ्रेम आणि मॅट फिनिशसह एक प्रीमियम लुक देण्यात आला आहे. याशिवाय, यात 0.98mm बेझल्स असलेली डिस्प्ले स्क्रीन आहे.
धूळ आणि पाण्यापासून संरक्षणासाठी या सीरिजला IP68, IP69 आणि IP69K सर्टिफिकेशन मिळालं आहे.
200MP प्रायमरी कॅमेरा, 50MP सेल्फी कॅमेरा
कॅमेऱ्याच्या बाबतीत Honor 600 Pro खूपच पुढे आहे. यात 200-मेगापिक्सलचा प्रायमरी कॅमेरा, 50MP पेरिस्कोप टेलीफोटो लेन्स (3.5x झूम) आणि 12MP अल्ट्रावाइड लेन्स असा ट्रिपल कॅमेरा सेटअप आहे.
तर दुसरीकडे, Honor 600 मध्ये 200MP प्रायमरी कॅमेरा आणि 12MP अल्ट्रावाइड कॅमेरा असा ड्युअल कॅमेरा सेटअप आहे. या मॉडेलमध्ये टेलीफोटो लेन्स दिलेली नाही. दोन्ही फोन्समध्ये 50MP चा फ्रंट कॅमेरा देण्यात आला आहे.
Honor 600 सीरिज 23 एप्रिल रोजी ग्लोबल मार्केटमध्ये सादर केली जाईल. हे फोन ब्लॅक, गोल्डन व्हाईट आणि ऑरेंज बी या तीन रंगांमध्ये उपलब्ध असतील. नव्या फीचर्समुळे ही सीरिज बाजारात मोठी स्पर्धा निर्माण करेल अशी अपेक्षा आहे.
