Health Tips : मधुमेह आहे अन् भात खाऊन वजन वाढतेय? मग हा उपाय करून पाहा
Health Tips : मधुमेहाच्या रुग्णांनी भात खाणे चांगले नाही, असा अनेकांचा समज आहे. इतकेच नाही, तर वजन कमी करू इच्छिणारे लोकही भात खाणे शक्यतो टाळतात. पण, डॉक्टरांनी सांगितलेली ही छोटीशी युक्ती वापरल्यास तुम्ही बिनधास्त भात खाऊ शकता.
साधा भात
मधुमेह असलेले लोक साधा भात खूप कमी खातात. ते सामान्य भाताऐवजी ब्राऊन राईस, ज्वारीची भाकरी किंवा रोटी खातात. कारण साधा भात खाल्ल्याने केवळ वजनच वाढत नाही, तर रक्तातील साखरेची पातळीही वाढते. पण, तुम्हाला माहीत आहे का की, साधा भात खाऊनही तुम्ही वजन आणि साखरेची पातळी रोखू शकता? याबद्दल पोषणतज्ज्ञ काय म्हणतात ते जाणून घेऊया...
भात शिजवण्याची पद्धत खूप महत्त्वाची आहे
आपण भात शिजवण्याच्या पद्धतीत बदल केल्यास, वाढत्या वजनावर नियंत्रण ठेवू शकतो. छोटे बदल मोठे परिणाम देतात.
गरमागरम भात खाऊ नये का?
अनेकांना भात शिजवल्यानंतर लगेच गरमागरम खायला आवडतो. गरम भात चवीला अप्रतिम लागतो. पण, ताज्या शिजवलेल्या भातामध्ये स्टार्चचे प्रमाण जास्त असते. यामुळे रक्तातील साखरेची पातळी वाढते. त्यात कॅलरीजही जास्त असतात. परिणामी वजन वाढण्याची शक्यता असते. ज्यांचे वजन आधीच जास्त आहे, मधुमेह किंवा प्री-डायबिटीजसारख्या समस्या आहेत, त्यांनी असा गरम भात न खाणेच चांगले.
मग, भात कसा खावा?
ताजा, नुकताच शिजवलेला गरमागरम भात खाण्याऐवजी... भात थंड झाल्यावर खावा. भात थंड झाल्यामुळे त्यात एक प्रकारचा स्टार्च तयार होतो, जो फायबरप्रमाणे काम करतो. फायबर पचनक्रिया मंदावते. त्यामुळे रक्तातील साखरेची पातळी लवकर वाढत नाही. जेव्हा तुम्ही भात शिजवून थंड करता, तेव्हा तो रेझिस्टंट स्टार्चमध्ये बदलतो. हे तुमच्या आतड्यांच्या आरोग्यासाठी खूप फायदेशीर फायबर आहे. अशा थंड भातामध्ये कॅलरीजही कमी असतात. परिणामी, वजन कमी करण्यासही मदत होते.
