FASTag Closure : जुनी गाडी विकताय? आधी फास्टॅग बंद करा, नाहीतर बसेल मोठा फटका
जुनी कार विकल्यानंतर फास्टॅग (FASTag) डीॲक्टिव्हेट करणं खूप महत्त्वाचं आहे. तुम्ही हे करायला विसरलात, तर नवीन मालक टोल नाक्यावरून जाताना तुमच्या खात्यातून पैसे कट होतील. फास्टॅग कसा बंद करायचा आणि उरलेले पैसे परत कसे मिळवायचे? सोपी पद्धत जाणून घ्या.
फास्टॅग बंद केला नाही, तर होईल नुकसान
मुंबई : जुनी कार विकली, पैसे मिळाले आणि आरसी (RC) नवीन मालकाच्या नावावर ट्रान्सफर झाली की आपलं काम संपलं, असं अनेकांना वाटतं. पण इथेच लोक एक मोठी चूक करतात. तुम्ही तुमच्या कारचा फास्टॅग (FASTag) बंद करायला विसरलात, तर तुमच्या बँक खात्यातून विनाकारण पैसे कट होत राहतील.
तुम्ही कार विकल्यानंतरही फास्टॅग ॲक्टिव्ह असेल, तर नवीन मालक जेव्हा जेव्हा टोल नाका ओलांडेल, तेव्हा तुमच्याच खात्यातून टोलचे पैसे कापले जातील. खात्यातून सलग पैसे कट झाल्यावरच अनेकांना आपला फास्टॅग अजूनही सुरू असल्याचं समजतं. त्यामुळे गाडीची चावी नवीन मालकाला देण्यापूर्वीच फास्टॅग बंद करा.
फास्टॅग डीॲक्टिव्हेट का करावा?
फास्टॅग हा कारच्या पुढच्या काचेवर लावला जाणारा एक स्टिकर असतो. यामध्ये रेडिओ फ्रिक्वेन्सी आयडेंटिफिकेशन (RFID) तंत्रज्ञानाचा वापर केलेला असतो. हा टॅग तुमच्या बँक खात्याशी किंवा फास्टॅग वॉलेटशी लिंक असतो. तुम्ही टोल प्लाझावरून जाताना तिथला स्कॅनर हा टॅग स्कॅन करतो आणि तुमच्या खात्यातून आपोआप पैसे कट होतात. कार विकल्यानंतरही तुम्ही फास्टॅग बंद केला नाही, तर ही सिस्टीम तशीच काम करत राहील. परिणामी, नवीन मालकाच्या प्रवासाचा भुर्दंड तुमच्या बँक खात्याला बसेल.
गाडी विकल्यावर सर्वात आधी हे काम करा
तुम्ही तुमची गाडी विकली किंवा दुसऱ्या कोणाला दिली, तर सर्वात आधी फास्टॅग देणाऱ्या बँकेशी संपर्क साधा. त्यांना सांगून तुमचं फास्टॅग खातं किंवा वॉलेट लगेच बंद करा. त्यानंतर नवीन मालक त्याच्या नावावर नवीन फास्टॅग काढू शकतो. पण फास्टॅग डीॲक्टिव्हेट करण्यापूर्वी, तुमच्या खात्यात किती बॅलन्स शिल्लक आहे ते नक्की तपासा. जर त्यात पैसे उरले असतील, तर ते परत कसे मिळवायचे याची माहिती बँकेकडून घ्या. प्रत्येक बँकेचे रिफंडचे नियम वेगळे असतात. त्यामुळे खातं बंद करतानाच पैसे परत मिळवण्याची प्रक्रिया समजून घेणं फायद्याचं ठरतं.
फास्टॅग कसा बंद करायचा?
तुमचा फास्टॅग कोणत्या बँकेचा आहे ते आधी तपासा. त्यानंतर त्या बँकेच्या कस्टमर केअर नंबरवर कॉल करा किंवा ऑनलाइन फास्टॅग पोर्टलवरून खातं बंद करण्यासाठी अर्ज करा. 'मी कार विकली आहे आणि मला फास्टॅग खातं बंद करायचं आहे', असं बँकेला स्पष्ट सांगा. बँक तुम्हाला तुमचा नोंदणीकृत मोबाईल नंबर आणि गाडीचा रजिस्ट्रेशन नंबर (RC) विचारेल. सर्व माहिती तपासल्यानंतर बँक तुमचा फास्टॅग डीॲक्टिव्हेट करेल.
अर्ज केल्यानंतर तुमचा फास्टॅग खरंच बंद झालाय की नाही, याची खात्री करा. बँकेकडून काही अडचण आल्यास, तुम्ही इंडियन हायवेज मॅनेजमेंट कंपनी लिमिटेड (IHMCL) च्या हेल्पलाईनवर तक्रार करू शकता.
