रिलीजच्या दिवशी सिनेमा पाहता आला नाही, पण दुसऱ्याच दिवशी अख्खं थिएटर बुक करून 'जेलर 2' पाहिल्याचा आनंद संजू सॅमसनने व्यक्त केलाय.
नवी दिल्ली : रजनीकांत यांचा नवा सिनेमा 'जेलर 2' पाहण्यासाठी मल्याळम स्टार आणि क्रिकेटर संजू सॅमसनने चक्क एक अख्खं थिएटरच बुक केलंय. संजूने त्याचे कुटुंबीय, मित्र आणि टीम इंडियातल्या सहकाऱ्यांसोबत हा सिनेमा पाहिला. दिल्लीतल्या अधिकृत कामांमुळे त्याला रिलीजच्या दिवशी सिनेमा पाहता आला नाही. पण दुसऱ्याच दिवशी थिएटर बुक करता आल्याने तो खूप खुश आहे.
"रजनी सरांचे सिनेमे पाहण्यासाठी मी नेहमीच उत्सुक असतो. दिल्लीतल्या एका कार्यक्रमामुळे काल सिनेमा पाहता आला नाही. पण आज सुदैवाने अख्खं थिएटर बुक करता आलं. माझी पत्नी आणि मित्रही सोबत आहेत. मोठ्या पडद्यावर रजनी सरांना पाहणं हा एक वेगळाच थरार असतो," असं संजू म्हणाला. टीम इंडिया न्यूझीलंड दौऱ्यावर जाण्यापूर्वीच संजूने मित्रांसोबत 'जेलर 2' पाहिला. आशियाई क्रीडा स्पर्धेत सुवर्णपदक जिंकणाऱ्या भारतीय खेळाडूंना पंतप्रधान नरेंद्र मोदींनी दिल्लीत सन्मानित केलं. या कार्यक्रमानंतर संजूने सुपरस्टार रजनीकांत यांचा सिनेमा पाहण्यासाठी वेळ काढला.
टीम इंडिया आणि सपोर्ट स्टाफमधील तमिळ समजणाऱ्या इतर सदस्यांनीही आपल्यासोबत सिनेमा पाहिल्याचं संजूने सांगितलं. नेल्सन दिलीपकुमार यांनी दिग्दर्शित केलेला 'जेलर 2' हा 2023 मध्ये आलेल्या सुपरहिट 'जेलर'चा दुसरा भाग आहे. 'टायगर मुथुवेल पांडियन' या आयकॉनिक भूमिकेतून रजनीकांत पुन्हा एकदा बॉक्स ऑफिसवर धुमाकूळ घालत आहेत. अशातच एक चाहता म्हणून संजू सॅमसनने हा आनंद एका वेगळ्याच लेव्हलवर नेऊन ठेवलाय.
