मुंबईतील एका महिलेने सीसीटीव्ही फुटेज पाहिले, ज्यात फ्लिपकार्टचा डिलिव्हरी बॉय चुकून रांगोळीवर पाय देतो. पण तिथून निघून जाण्याऐवजी तो खाली बसून ती रांगोळी पुन्हा छान सजवतो. या डिलिव्हरी बॉयच्या प्रामाणिकपणाचा आणि साधेपणाचा हा व्हिडीओ सध्या सोशल मीडियावर सर्वांची मनं जिंकत आहे.
मुंबईतील (Mumbai) एका महिलेने तिच्या घरातील सीसीटीव्ही कॅमेऱ्याचं फुटेज पाहिलं, तेव्हा तिला एक सुखद धक्का बसला. फ्लिपकार्टचा (Flipkart) एक डिलिव्हरी बॉय सामान द्यायला आला असताना त्याचा चुकून तिच्या रांगोळीवर पाय पडला. पण त्याने तिथून पळ काढण्याऐवजी खाली बसून ती रांगोळी पुन्हा नीट केली आणि मगच तो तिथून गेला.
या व्हिडीओमध्ये दिसतंय की, डिलिव्हरी बॉय घराची बेल वाजवतो आणि खिशातून फोन काढतो. महिला दरवाजा उघडून पार्सल घेते आणि दरवाजा बंद करते. त्यानंतर तो तिथून जायला निघतो, तेव्हा त्याला लक्षात येतं की आपला पाय चुकून रांगोळीवर पडलाय आणि ती विस्कळीत झालीय.
रांगोळी तशीच सोडून जाण्याऐवजी त्याने तिथेच खाली बसून ती पुन्हा नीट करायला सुरुवात केली. काही वेळ देऊन त्याने रांगोळीचा विस्कळीत झालेला मोठा भाग अगदी बारकाईने पुन्हा सजवला आणि मगच तो तिथून निघाला.
Related Articles
दृष्टी नावाच्या या महिलेने सांगितलं की, ही रांगोळी काढायला तिला खूप वेळ लागला होता. पण कोणीतरी अनोळखी माणूस ती मोडलेली रांगोळी पुन्हा नीट करण्यासाठी एवढा वेळ देईल, याची तिने कल्पनाही केली नव्हती. न सांगता रांगोळी नीट केल्याबद्दल तिने या डिलिव्हरी बॉयचे मनापासून आभार मानले आहेत.
पाहा हा व्हायरल व्हिडीओ
सोशल मीडियावर लोक या व्हिडीओचं भरभरून कौतुक करत आहेत. आपली चूक मान्य करून ती सुधारण्याच्या डिलिव्हरी बॉयच्या वृत्तीला सगळे दाद देत आहेत. एका युजरने लिहिलं की, त्याला पुढच्या डिलिव्हरीला उशीर झाला असेल, पण तरीही त्याने आपल्या व्यग्र वेळापत्रकातून रांगोळी नीट करण्यासाठी वेळ काढला.
काहींच्या मते, एवढ्या मेहनतीने काढलेली रांगोळी आपल्याकडून मोडली गेली, या विचाराने त्याला वाईट वाटलं असावं. तर काहींनी म्हटलंय की, अशा छोट्या पण प्रामाणिक कृतींमुळे माणुसकीवरचा विश्वास अधिक घट्ट होतो.
