राज्याचे उपमुख्यमंत्री एकनाथ शिंदे यांनी ब्रीच कँडी रुग्णालयात जाऊन राष्ट्रवादी काँग्रेसचे (शरदचंद्र पवार) अध्यक्ष शरद पवार यांची भेट घेतली.
मुंबई : राज्याचे उपमुख्यमंत्री एकनाथ शिंदे यांनी राष्ट्रवादी काँग्रेसचे (शरदचंद्र पवार) अध्यक्ष शरद पवार यांची ब्रीच कँडी रुग्णालयात जाऊन भेट घेतली. पवारांची प्रकृती आता सुधारत असून त्यांचे सर्व वैद्यकीय अहवाल सामान्य असल्याचं शिंदेंनी सांगितलं. रुग्णालयातून बाहेर आल्यावर पत्रकारांशी बोलताना शिंदे म्हणाले की, पवारांना लवकरच डिस्चार्ज मिळू शकतो. तसेच, राजकीय मतभेद बाजूला ठेवून पंतप्रधान नरेंद्र मोदींनी पवारांच्या प्रकृतीची विचारपूस केल्याबद्दल शिंदेंनी त्यांचं कौतुक केलं.
"मी त्यांच्या प्रकृतीची विचारपूस करण्यासाठी आलो होतो. आमची खूप छान चर्चा झाली आणि आता त्यांची तब्येत एकदम ठीक आहे. डॉक्टरांनीही त्यांचे सर्व रिपोर्ट नॉर्मल असल्याचं सांगितलंय, त्यामुळे काळजीचं कोणतंही कारण नाही. त्यांना कदाचित उद्या डिस्चार्जही मिळू शकतो," असं शिंदे म्हणाले.
आजारपणातही जनतेच्या प्रश्नांवर लक्ष
रुग्णालयात दाखल असूनही पवारांचं लक्ष जनता आणि शेतकऱ्यांच्या प्रश्नांवरच असल्याचं उपमुख्यमंत्र्यांनी नमूद केलं. "रुग्णालयात असतानाही त्यांनी शेतकरी आणि दुष्काळग्रस्तांच्या समस्यांवर चर्चा करण्यासाठी वेळ काढला. आम्ही सातारा आणि महाबळेश्वरमधील गावांचा पाणीप्रश्न, शेतकऱ्यांची सध्याची स्थिती आणि महाराष्ट्रातील एकूण परिस्थितीवर बोललो. रुग्णालयात असतानाही त्यांनी शेतकऱ्यांच्या प्रश्नांवर लक्ष केंद्रित करणं ही खरोखरच मोठी गोष्ट आहे," असं शिंदे म्हणाले. तसेच, आपले संबंध 'केवळ राजकारणापलीकडचे' असून ही भेट पूर्णपणे अराजकीय असल्याचंही त्यांनी स्पष्ट केलं.
Related Articles
पंतप्रधान मोदींची विचारपूस आणि मेडिकल अपडेट
पंतप्रधान नरेंद्र मोदींनी शरद पवारांना फोन करून त्यांच्या प्रकृतीची विचारपूस केली होती. यावर बोलताना शिंदेंनी पंतप्रधानांच्या मोठेपणाचं कौतुक केलं. "पंतप्रधानांनीही त्यांना थोडी विश्रांती घेण्याचा सल्ला दिला आहे. अशा वेळी पंतप्रधान राजकीय मतभेद विसरून माणसाच्या पाठीशी उभे राहतात, यातून त्यांचा मोठेपणा दिसून येतो. म्हणूनच, पूर्णपणे बरे होईपर्यंत शरद पवारजींनी विश्रांती घ्यावी, अशी विनंती पंतप्रधानांनीही केली आहे, कारण त्यांचं मार्गदर्शन सर्वांसाठीच मोलाचं आहे," असं शिंदे म्हणाले.
शिंदेंनी पुढे सांगितलं की, त्यांनी स्वतःही पवारांना डिस्चार्ज घेण्याची घाई न करण्याचा सल्ला दिला आहे. "मीसुद्धा त्यांना डिस्चार्जसाठी घाई न करण्याचा सल्ला दिलाय. त्यांनी थोडा वेळ विश्रांती घ्यावी आणि पूर्णपणे बरे झाल्यावरच पुन्हा कामाला लागावं," असं ते म्हणाले.
राष्ट्रवादी काँग्रेसचे (शरदचंद्र पवार) अध्यक्ष शरद पवार यांच्या प्रकृतीत वेगाने सुधारणा होत असून ते उपचारांना चांगला प्रतिसाद देत आहेत, अशी माहिती ब्रीच कँडी रुग्णालयाचे डॉ. प्रतीत समदानी यांनी दिली. या ज्येष्ठ नेत्याच्या प्रकृतीबाबत अधिकृत माहिती देताना डॉ. समदानी यांनी सांगितलं की, त्यांच्या तब्येतीत सातत्याने सुधारणा होत आहे. "शरद पवारांची प्रकृती आता बरी आहे, ते सावरत आहेत आणि रुग्णालयात दिल्या जाणाऱ्या उपचारांना ते चांगला प्रतिसाद देत आहेत," असं ते म्हणाले.
