Mumbai Traffic Alert: मुंबईतील वाहतूक कोंडी कमी करण्यासाठी, दादरच्या टिळक पुलावर अवजड वाहनांसाठी तात्पुरती बंदी घालण्यात आली आहे. एलफिन्स्टन आणि सायन पुलांच्या पुनर्बांधणीमुळे वाढलेल्या वाहतुकीवर नियंत्रण मिळवणे हा याचा उद्देश आहे.
मुंबई : वाहतूक कोंडी ही महानगरांसमोरील गंभीर समस्या बनली आहे आणि मुंबई त्याला अपवाद नाही. वाढती वाहने, सुरू असलेली पायाभूत कामे आणि वळवलेली वाहतूक यामुळे नागरिकांना दररोज प्रचंड त्रास सहन करावा लागतो. या पार्श्वभूमीवर मुंबई वाहतूक पोलिसांनी महत्त्वाचा निर्णय घेत दादरमधील टिळक पुलावर अवजड वाहनांच्या प्रवेशावर तात्पुरती बंदी जाहीर केली आहे.
कधीपासून लागू होणार बंदी?
१२ फेब्रुवारी २०२६ पासून १२ मे २०२६ पर्यंत ही बंदी लागू राहणार आहे. दरम्यान, दररोज सकाळी ७ ते रात्री ११ या वेळेत ट्रॅव्हल्स, मिक्सर, डंपर, ट्रेलर आणि इतर जड वाहनांना टिळक पुलावरून प्रवेश दिला जाणार नाही. नागरिकांनी आणि वाहनचालकांनी याची नोंद घ्यावी, असे आवाहन प्रशासनाने केले आहे.
निर्णयामागचे कारण काय?
सध्या एलफिन्स्टन उड्डाणपूल आणि सायन रेल्वे पुलाच्या पुनर्बांधणीची कामे वेगात सुरू आहेत. या कामांमुळे ठाणे आणि नवी मुंबईकडून येणारी वाहतूक धारावी आणि टिळक पुलाकडे वळवण्यात आली आहे. परिणामी दादर आणि माटुंगा परिसरात मोठ्या प्रमाणात वाहतूक कोंडी होत आहे. आपत्कालीन सेवांना अडथळा निर्माण होऊ नये आणि वाहतूक सुरळीत राहावी यासाठी हा निर्णय घेण्यात आला आहे.
Related Articles
पूर्व उपनगरे व नवी मुंबईकडून येणाऱ्यांसाठी पर्यायी मार्ग
मुलुंड, मानखुर्द आणि नवी मुंबईकडून येणाऱ्या वाहनांनी टिळक पुलाऐवजी सायन हॉस्पिटल जंक्शनवरून उजवीकडे वळावे. त्यानंतर सुलोचना शेट्टी मार्ग – कुंभारवाडा जंक्शन – कटारिया मार्ग – शोभा हॉटेल – सावरकर रोड – चैत्यभूमी – सिद्धिविनायक मंदिर – अप्पासाहेब मराठे चौक असा मार्ग अवलंबता येईल.
परेल आणि लालबागकडे जाणाऱ्या जड वाहनांसाठी दक्षिणेकडील मार्ग
दादर टी.टी. ब्रॉडवे जंक्शनवरून हिंदमाता ब्रिज – परेल वर्कशॉप – लालबाग ब्रिजखालील मार्ग – भारतमाता सिग्नल – गरम खाडा सिग्नल येथे उजवे वळण घेऊन चिंचपोकळी ब्रिजमार्गे पुढे जाता येईल.
डॉ. बाबासाहेब आंबेडकर रोडवरून उत्तरेकडे जाणाऱ्यांसाठी
डॉ. बाबासाहेब आंबेडकर रोडवरून उत्तरेकडे जाणाऱ्या जड वाहनांनी टिळक पुल टाळावा. त्याऐवजी दादर टी.टी. सर्कल – माहेश्वरी सर्कल – अरोरा जंक्शन – सायन हॉस्पिटल – कुंभारवाडा जंक्शन – कटारिया ब्रिज – सावरकर रोड – सिद्धिविनायक मंदिर असा पर्यायी मार्ग वापरावा.
सेना भवन ते सायन प्रवासासाठी
सेना भवनकडून सायनच्या दिशेने जाणाऱ्या वाहनांसाठी एल. जे. रोड – शोभा हॉटेल – कटारिया रोड – कुंभारवाडा जंक्शन – सुलोचना शेट्टी मार्ग हा मार्ग निश्चित करण्यात आला आहे.
वाहतूक कोंडी टाळण्यासाठी आणि आपत्कालीन सेवांना प्राधान्य देण्यासाठी हा तात्पुरता बदल करण्यात आला आहे. पुढील तीन महिने वाहनचालकांनी संयम राखून पर्यायी मार्गांचा वापर करावा, असे आवाहन वाहतूक पोलिसांकडून करण्यात आले आहे.
