- Home
- Mumbai
- Holi 2026: मुंबईकरांनो, सोसायटीत होळी साजरी करताय? पालिकेची 'ही' नियमावली वाचली नाही तर पडेल महागात!
Holi 2026: मुंबईकरांनो, सोसायटीत होळी साजरी करताय? पालिकेची 'ही' नियमावली वाचली नाही तर पडेल महागात!
Holi 2026: बृहन्मुंबई महानगरपालिकेने (BMC) मुंबईकरांसाठी होळी आणि धुळवड साजरी करण्याकरिता विशेष नियमावली जाहीर केली आहे. यानुसार, होलिका दहनासाठी झाडे तोडण्यास मनाई असून, पाण्याचा अपव्यय टाळून नैसर्गिक रंगांनी होळी खेळण्याचे आवाहन केले आहे.
मुंबईकरांनो, सोसायटीत होळी साजरी करताय? 'ही' नियमावली वाचा
मुंबई : रंगांचा उत्सव आणि आनंदाचा सण 'होळी' आता अवघ्या काही दिवसांवर येऊन ठेपला आहे. मात्र, यंदा मुंबईत होळी आणि धुळवड साजरी करताना तुम्हाला नियमांचे पक्के पालन करावे लागणार आहे. बृहन्मुंबई महानगरपालिकेने (BMC) मुंबईकरांसाठी खास नियमावली जाहीर केली असून, पर्यावरणाचे नुकसान करणाऱ्यांवर कारवाईचा इशाराही दिला आहे. यंदाची होळी सुरक्षित आणि इको-फ्रेंडली साजरी करण्यासाठी पालिकेचे हे 'रुल बुक' नक्की जाणून घ्या.
होलिका दहन (२ मार्च): झाडे तोडाल तर सावधान!
सोमवार, २ मार्च २०२६ रोजी होणाऱ्या होलिका दहनासाठी पालिकेने कडक सूचना दिल्या आहेत.
वृक्षतोड बंदी: होळीसाठी जिवंत झाडे किंवा झाडांच्या फांद्या तोडण्यास सक्त मनाई आहे. प्रशासनाने फक्त कोरड्या लाकडाचा वापर करण्याचे आवाहन केले आहे.
प्रदूषण टाळा: होळीमध्ये प्लास्टिक, रबर, टायर किंवा रासायनिक रंग लावलेले लाकूड जाळू नका. यातून निघणारा विषारी धूर आरोग्यासाठी घातक ठरू शकतो.
सोसायटीसाठी सूचना: गृहनिर्माण संस्थांनी शक्यतो पारंपरिक आणि पर्यावरणपूरक पद्धतीनेच होलिका दहन करावे.
धुळवड आणि रंगपंचमी (३ मार्च): पाण्याचा जपून वापर
मंगळवार, ३ मार्च रोजी रंग खेळताना मुंबईकरांना सामाजिक जबाबदारीचे भान ठेवावे लागणार आहे.
पाण्याचा अपव्यय टाळा: मुंबईवर पाण्याचे संकट ओढवू नये, यासाठी कोरडी होळी खेळण्यावर भर द्या आणि पाण्याचा विनाकारण वापर टाळा.
नैसर्गिक रंगांचा वापर: रासायनिक आणि जड धातूयुक्त रंगांमुळे त्वचेचे आजार होऊ शकतात. त्यामुळे फक्त 'इको-फ्रेंडली' किंवा सेंद्रिय (Organic) रंगांचाच वापर करा.
शांतता राखा: सणाचा आनंद घेताना ध्वनी प्रदूषणाचे नियम पाळा. विशेषतः रुग्णालय आणि निवासी क्षेत्रांजवळ मोठ्या आवाजाचे डीजे किंवा स्पीकर लावणे टाळावे.
प्रशासनाचे आवाहन
मुंबईच्या महापौर रितू तावडे, आयुक्त भूषण गगराणी आणि प्रशासकीय टीमने मुंबईकरांना 'स्वच्छ आणि निरोगी' मुंबईसाठी सहकार्य करण्याचे विनंती केली आहे. सण साजरा करताना निसर्ग संपदेचे नुकसान होणार नाही, याची काळजी घेणे प्रत्येक नागरिकाचे कर्तव्य असल्याचे पालिकेने म्हटले आहे.
महत्त्वाची टीप
नियमांचे उल्लंघन करून सार्वजनिक ठिकाणी झाडे तोडल्यास किंवा प्रदूषण केल्यास दंडात्मक कारवाई होऊ शकते.
