मुंबई विमानतळावरून २ दिवसांत कोट्यवधींचे सोने, हिरे जप्त

मुंबई: दोन दिवसांत मुंबई आंतरराष्ट्रीय विमानतळावरून ६ किलो सोने आणि १० कोटी रुपयांचे हिरे जप्त करण्यात आले. छत्रपती शिवाजी महाराज आंतरराष्ट्रीय विमानतळावर फेब्रुवारी ११ आणि १२ रोजी कोट्यवधी रुपयांचे सोने आणि हिरे जप्त करण्यात आले आहेत, अशी माहिती कस्टम्स विभागाने दिली. तीन वेगवेगळ्या घटनांमध्ये मोठ्या प्रमाणात सोने आणि हिऱ्यांची तस्करी उघडकीस आली.

बेल्टचे बकल, ट्रॉली बॅग, अंडरगारमेंट्स अशा विविध मार्गांनी प्रवासी सोने तस्करी करण्याचा प्रयत्न करत होते. तर लॅपटॉपमध्ये सीलबंद अवस्थेत हिरे लपवून तस्करी करण्याचा प्रयत्न करण्यात आला होता. लॅपटॉपमध्ये अस्वाभाविक वस्तू आढळल्यानंतर अधिकाऱ्यांनी तो उघडून तपासणी केली. बँकॉकहून मुंबईला आलेल्या प्रवाशाला कस्टम्सने अटक केली. त्याच्याकडून २१४७ कॅरेटचे हिरे जप्त करण्यात आले.

दुसऱ्या एका घटनेत, दुबईहून मुंबईला आलेल्या तीन प्रवाशांना सोने तस्करी करताना अटक करण्यात आली. रोडियमने मढवलेले बटणे, अंगठी, बेल्टचे बकल आणि ट्रॉलीमध्ये लपवलेले ७७५ ग्रॅम सोने त्यांच्याकडून जप्त करण्यात आले. फेब्रुवारी १२ रोजी गुप्त माहितीच्या आधारे १४ केनियन नागरिकांना सोन्याच्या बिस्किटांसह अटक करण्यात आली. ते नैरोबीहून मुंबईला आले होते. त्यांच्याकडून २७४१ ग्रॅम सोने जप्त करण्यात आले. ते अंडरगारमेंट्स आणि कपड्यांमधील गुप्त खिशांमध्ये सोने लपवून आणत होते. आणखी एका घटनेत, आंतरराष्ट्रीय आगमन हॉलमध्ये सोडून दिलेल्या अवस्थेत २४०६ ग्रॅमचे सोन्याचे बिस्किट कस्टम्सने जप्त केले.