- Home
- Mumbai
- MHADA Lottery: सामान्यांचे घराचे स्वप्न पूर्ण होणार! कोकण मंडळाची अडीच हजार घरांची सोडत; पाहा कुठे आणि किती स्वस्त?
MHADA Lottery: सामान्यांचे घराचे स्वप्न पूर्ण होणार! कोकण मंडळाची अडीच हजार घरांची सोडत; पाहा कुठे आणि किती स्वस्त?
MHADA Lottery: म्हाडाच्या कोकण मंडळातर्फे एप्रिल अखेरीस अडीच हजार घरांसाठी बंपर लॉटरी जाहीर होणार आहे. या सोडतीत अत्यल्प आणि अल्प उत्पन्न गटातील लोकांसाठी ठाणे, नवी मुंबई आणि वसई-विरार येथे २० ते ३० लाखांत घरे उपलब्ध असतील.
सामान्यांचे घराचे स्वप्न पूर्ण होणार! कोकण मंडळाची अडीच हजार घरांची सोडत
मुंबई: मुंबईतील घरांच्या वाढत्या किमती पाहून हतबल झालेल्या मध्यमवर्गीयांसाठी म्हाडाने आशेचा किरण दाखवला आहे. म्हाडाच्या कोकण मंडळाकडून तब्बल अडीच हजार घरांची बंपर लॉटरी जाहीर केली जाणार असून, याची अधिकृत जाहिरात एप्रिल अखेरीस प्रसिद्ध होणार आहे. विशेष म्हणजे, यात अत्यल्प आणि अल्प उत्पन्न गटातील लोकांसाठी स्वस्त घरांची मोठी संधी उपलब्ध असणार आहे.
२० ते ३० लाखांत हक्काचं घर!
मुंबई मंडळाच्या घरांच्या किमती सामान्यांच्या आवाक्याबाहेर गेल्या असताना, कोकण मंडळाने मात्र मोठा दिलासा दिला आहे. या सोडतीतील सुमारे १,००० घरे ही 'अत्यल्प' उत्पन्न गटासाठी राखीव असतील. या घरांची अंदाजे किंमत २० ते ३० लाख रुपयांच्या दरम्यान असण्याची शक्यता आहे, अशी माहिती कोकण मंडळाचे मुख्य अधिकारी डॉ. विशाल राठोड यांनी दिली आहे.
कुठे असतील ही घरे? (प्रकल्पनिहाय तपशील)
कोकण मंडळाच्या या लॉटरीमध्ये ठाणे, नवी मुंबई आणि वसई-विरार पट्ट्यातील महत्त्वाच्या ठिकाणांचा समावेश आहे.
चितळसर मानपाडा (ठाणे): अल्प उत्पन्न गटासाठी २०० ते २५० घरे.
बाळकुम (ठाणे): मध्यम उत्पन्न गटासाठी २०६ घरे.
२० टक्के सर्वसमावेशक योजना: खासगी विकासकांकडून म्हाडाला मिळालेली घरे
ठाणे महापालिका क्षेत्र: १३८ घरे (५ प्रकल्प)
कल्याण-डोंबिवली: ४० घरे (३ प्रकल्प)
नवी मुंबई: २१ घरे (१ प्रकल्प)
वसई-विरार: ३८ घरे (२ प्रकल्प)
का आहे ही लॉटरी खास?
मुंबईत घरांच्या किमती गगनाला भिडल्या आहेत, अशा वेळी ठाणे आणि नवी मुंबई सारख्या प्राइम लोकेशन्सवर म्हाडाच्या दरात घरे मिळणे ही सर्वसामान्यांसाठी मोठी पर्वणी ठरणार आहे. विशेषतः अत्यल्प गटासाठी असलेल्या १,००० घरांमुळे कष्टकरी वर्गाला हक्काच्या छताची शाश्वती मिळणार आहे.
महत्त्वाची तारीख
एप्रिलच्या शेवटच्या आठवड्यात जाहिरात प्रसिद्ध होताच अर्ज प्रक्रिया सुरू होईल. त्यामुळे कागदपत्रांची तयारी आत्तापासूनच सुरू ठेवा!
