डिजिटल अटक: आयआयटी बॉम्बेच्या विद्यार्थ्याला ७ लाखांचा फटका

व्हर्च्युअल अटक / डिजिटल अटक यांच्याशी संबंधित फसवणुकीच्या घटनांमध्ये दिवसेंदिवस वाढ होत आहे. या प्रकारच्या फसवणुकीबाबत लोकांनी सावधगिरी बाळगावी आणि फसवणुकीला बळी पडू नये यासाठी अधिकाऱ्यांकडून सतत सूचना दिल्या जात असल्या तरीही फसवणुकीला बळी पडणाऱ्यांची संख्या कमी होत नाहीये. अलीकडेच घडलेल्या एका घटनेत बॉम्बे आयआयटीच्या एका विद्यार्थ्याला ७.२९ लाख रुपयांचा फटका बसला आहे. 

भारतीय दूरसंचार नियामक प्राधिकरणाचा (ट्राय) कर्मचारी असल्याचे भासवून एका व्यक्तीने विद्यार्थ्याला फोन केला आणि त्याला डिजिटल अटकेत असल्याचे सांगून फसवणूक केली. 'डिजिटल अटक' ही सायबर फसवणुकीचा एक नवीन प्रकार आहे, ज्यामध्ये फसवणूक करणारे ऑडिओ / व्हिडिओ कॉलद्वारे पोलिस किंवा सरकारी अधिकारी असल्याचे भासवून बळींना धमकावतात आणि पैसे उकळतात. 

फसवणुकीला बळी पडलेल्या २५ वर्षीय आयआयटी विद्यार्थ्याला या वर्षी जुलैमध्ये एका अनोळखी नंबरवरून फोन आला होता. ट्रायचा कर्मचारी असल्याचे भासवून फोन करणाऱ्याने विद्यार्थ्याच्या मोबाईल नंबरवर १७ बेकायदेशीर कृत्यांच्या तक्रारी पोलिसांकडे दाखल असल्याचे सांगितले. नंबर बंद होऊ नये म्हणून पोलिसांकडून 'नो ऑब्जेक्शन सर्टिफिकेट' घेण्यास सांगितले आणि केस सायबर क्राईम ब्रांचकडे वर्ग करण्यात येत असल्याचे सांगितले. 

त्यानंतर, व्हाट्सअॅप व्हिडिओ कॉलवर पोलिस अधिकाऱ्याचा वेष घेतलेल्या एका व्यक्तीने विद्यार्थ्याला फोन केला. त्याने विद्यार्थ्याचा आधार क्रमांक मागितला आणि त्याच्यावर मनी लाँड्रिंगमध्ये सहभागी असल्याचा आरोप केला. त्यानंतर त्याला डिजिटल अटकेत असल्याचे सांगितले आणि कोणाशीही संपर्क साधू नका असे धमकावले. तसेच, त्याने विद्यार्थ्याला युनिफाइड पेमेंट इंटरफेस (यूपीआय) द्वारे २९,५०० रुपये ट्रान्सफर करण्यास सांगितले. 

दुसऱ्या दिवशी, फसवणूक करणाऱ्यांनी विद्यार्थ्याला पुन्हा फोन केला आणि त्याची बँक खात्याची माहिती घेतली. त्यानंतर, त्यांनी विद्यार्थ्याच्या खात्यातून ७ लाख रुपये काढले. खात्यातून अधिक पैसे गेल्याचे लक्षात आल्यानंतर विद्यार्थ्याला फसवणूक झाल्याचे समजले. त्यानंतर त्याने पोलिसांत तक्रार दाखल केली तेव्हा ही घटना उघडकीस आली.