Pune Municipal Election : पुणे महापालिका निवडणुकीत जागावाटपावरून भाजप आणि शिंदे गटातील शिवसेनेत तणाव वाढला आहे. भाजपकडून सन्मानजनक जागा न मिळाल्यास शिवसेना स्वबळावर लढण्याचा निर्णय घेऊ शकते.
Pune Municipal Election : आगामी पुणे महानगरपालिका निवडणुकीच्या पार्श्वभूमीवर भाजप आणि एकनाथ शिंदे यांच्या शिवसेनेतील जागावाटपाचा तिढा अद्याप सुटलेला नाही. भाजपकडून सन्मानजनक जागा मिळत नसल्याने शिंदे गट नाराज असून, युती तुटण्याची आणि शिवसेना स्वबळावर लढण्याची शक्यता वाढताना दिसत आहे. भाजपकडून अपेक्षित प्रतिसाद न मिळाल्यास योग्य निर्णय घेण्यात येईल, असा इशारा शिवसेनेच्या वरिष्ठ नेत्या नीलम गोऱ्हे यांनी दिला आहे.
पुण्यात युतीवर प्रश्नचिन्ह
यापूर्वी मुख्यमंत्री देवेंद्र फडणवीस यांनी पुण्यात अजित पवार यांच्या राष्ट्रवादी काँग्रेससोबत युती करणे शक्य नसल्याचे स्पष्ट केले होते. अशा युतीमुळे विरोधकांचा फायदा होईल, असे त्यांनी सांगितले होते. त्यानंतर आता शिंदे गटही पुण्यात भाजपची साथ सोडण्याच्या तयारीत असल्याची चिन्हे दिसत आहेत. भाजपकडून जागावाटपाबाबत ठोस उत्तर मिळाले नाही, तर शिवसेना स्वतंत्र निर्णय घेईल, असे नीलम गोऱ्हे यांनी माध्यमांशी बोलताना स्पष्ट केले.
जागावाटपावरून मतभेद तीव्र
पुणे महानगरपालिकेत एकूण 41 प्रभाग असून 165 नगरसेवक आहेत. या निवडणुकीसाठी भाजपने सुरुवातीला शिंदे गटाला केवळ 12 जागांची ऑफर दिली होती. शिंदे गटाने मात्र 35 जागांची मागणी केली होती. भाजप पुण्यात एकहाती सत्ता मिळवण्याच्या उद्देशाने मैदानात उतरल्याने त्यांनी शिवसेनेला मागणी केलेल्या जागांच्या केवळ निम्म्या जागा देण्याची तयारी दर्शवली. शिवसेनेच्या नाराजीनंतर भाजपने 12 ऐवजी 15 जागांची ऑफर दिली, तरीही शिंदे गट 20 ते 25 जागांवर ठाम आहे.
Related Articles
एबी फॉर्म वाटण्याचा इशारा
भाजपकडून 15 पेक्षा अधिक जागा सोडता येणार नाही, असा अप्रत्यक्ष संदेश मिळाल्यानंतर शिंदे गटाने स्वबळावर लढण्याची तयारी सुरू केली आहे. पुण्यातील शिवसेना नेत्यांनी यासाठी चाचपणी सुरू केली असून, शुक्रवारपर्यंत भाजपकडून प्रतिसाद न मिळाल्यास चांगल्या उमेदवारांना एबी फॉर्म देण्यात येतील, असा इशारा देण्यात आला आहे. 29 तारखेला उमेदवारी यादी जाहीर करण्याचीही तयारी सुरू असल्याचे सांगण्यात आले.
अंतिम निर्णय शिंदेंकडे
पुण्यात शेवटपर्यंत भाजप-शिवसेना युती टिकवण्यासाठी प्रयत्न सुरू राहतील, असे शिंदे गटाकडून सांगण्यात आले आहे. मात्र, यासंदर्भातील अंतिम निर्णय मुख्यमंत्री एकनाथ शिंदेच घेतील, असे पुण्यातील शिवसेनेच्या नेत्यांनी स्पष्ट केले आहे.
