मराठा आरक्षणाच्या मुद्द्यावरून मनोज जरांगे पाटील आणि भाजपमध्ये वाद सुरू आहे. मुख्यमंत्री फडणवीस यांच्या आईबद्दल अपशब्द वापरल्याचा आरोप भाजपने जरांगेंवर केला असून, नितेश राणेंनी त्यांना 'जीभ हातात काढू', असा इशारा दिला आहे.
मुंबई : मराठा आरक्षणाच्या मागणीसाठी मुंबईकडे मोर्चा नेण्याच्या तयारीत असलेले मनोज जरांगे पाटील सध्या भाजप नेत्यांच्या निशाण्यावर आहेत. रविवारी बीडमध्ये झालेल्या सभेत मुख्यमंत्री देवेंद्र फडणवीस यांच्या आईबद्दल अपशब्द वापरल्याचा आरोप भाजपकडून करण्यात आला आहे. या पार्श्वभूमीवर भाजपचे आक्रमक आमदार नितेश राणे यांनी मनोज जरांगेंना थेट इशारा दिला आहे.
नितेश राणेंचा कडवट इशारा, "जीभ हातात काढू"
"मराठा समाजाची ही लढाई आम्हालाही माहीत आहे. पण जे खऱ्या अर्थाने मराठा आहेत, ते कुणाच्याही आईविषयी अशोभनीय बोलत नाहीत. आपण छत्रपती शिवाजी महाराजांचे भक्त आहोत. त्यांनीही मातांच्या सन्मानासाठी तलवार उपसली होती, पण कधी अपशब्द वापरले नाहीत," असे म्हणत नितेश राणेंनी जरांगेंवर टीकास्त्र सोडलं. "जर कोणी फडणवीस साहेबांच्या आईविषयी गैरभाषा वापरण्याचं धाडस करत असेल, तर 96 कुळी मराठ्यांमध्ये अशी जीभ हातात काढण्याची ताकद आहे, हे त्यांनी लक्षात ठेवावं," असाही रोखठोक इशारा त्यांनी दिला.
जरांगेंचा खुलासा, "मी तसं काही बोललोच नाही!"
मनोज जरांगे पाटील यांनी या आरोपांना उत्तर देताना सांगितलं, "मी देवेंद्र फडणवीस यांच्या आईविषयी काहीही बोललो नाही. जर बोलण्याच्या ओघात कुठलाही शब्द तसा वाटला असेल, तर तो मी परत घेतो." मात्र, यासोबत त्यांनी सरकारवर सडकून टीका करताना पुढे म्हटलं, "ज्यांना सस्पेंड करायला हवं होतं, त्यांना तू मोठी पदं दिलीस. आमच्या आईबहिणींना पोलिसांनी मारहाण केली, त्या रक्ताच्या थारोळ्यात होत्या. तू म्हणतोस तुझी आई प्रिय आहे, मग आम्हालाही आमच्या मातांचं तितकंच मोल आहे. जर तू मराठ्यांना आरक्षण दिलंस, तर तुझ्या आईची पूजा करू," अशी ठाम भूमिका त्यांनी घेतली.
Related Articles
राजकीय वाद शिगेला, आता पुढे काय?
या प्रकरणावरून सध्या राज्यातील राजकारण तापलं असून, मनोज जरांगे काय उत्तर देतात, याकडे सर्वांचे लक्ष लागले आहे. तर दुसरीकडे भाजपचे काही नेते सोशल मीडियावर आक्रमक पवित्रा घेत असल्याचे दिसते.
