नागपूरजवळील कुही तालुक्यातील सुरगाव येथील एका खदानीत एकाच कुटुंबातील पाच जणांचे मृतदेह आढळून आले. मृतांमध्ये दोन महिला, दोन मुले आणि एक पुरुष आहेत. ते रविवारी फिरायला गेले होते आणि बेपत्ता झाल्याची तक्रार नोंदवण्यात आली होती.
नागपूर शहरानजिकच्या कुही तालुक्यातील सुरगाव परिसरात एक हृदयद्रावक आणि धक्कादायक घटना उघडकीस आली आहे. येथे एका जुन्या खदानीत एकाच कुटुंबातील तब्बल पाच सदस्यांचे मृतदेह आढळून आल्याने संपूर्ण परिसरात शोककळा पसरली आहे. या घटनेमुळे अनेक प्रश्न उभे राहिले असून, हा घातपात आहे की केवळ एक दुर्दैवी अपघात, याचा शोध पोलीस कसून घेत आहेत.
मिळालेल्या माहितीनुसार, कुही पोलीस स्टेशन हद्दीतील पाचगाव पोलीस चौकीच्या जवळ असलेल्या गर्ग खदानीत आज दुपारच्या सुमारास पाच निष्पाप जीवांचे मृतदेह तरंगताना आढळले. मृतांमध्ये रोशनी चंद्रकांत चौधरी (वय ३२, रा. धुळे), त्यांचा १२ वर्षीय मुलगा मोहित चंद्रकांत चौधरी, १० वर्षीय मुलगी लक्ष्मी चंद्रकांत चौधरी, रोशनी यांची २५ वर्षीय बहीण रज्जो राऊत (रा. नागपूर) आणि २० वर्षीय इतिराज अन्सारी (रा. नागपूर) यांचा समावेश आहे.
प्राथमिक तपासात असे समोर आले आहे की, हे सर्वजण मागील रविवारी या भागात फिरायला आले होते. मात्र, रात्र झाली तरी ते घरी परत न आल्याने त्यांच्या कुटुंबीयांनी नागपुरातील दोन वेगवेगळ्या पोलीस ठाण्यांमध्ये बेपत्ता झाल्याची तक्रार नोंदवली होती.
Related Articles
पोलिसांनी या बेपत्ता लोकांचा शोध घेत असताना त्यांना कुही तालुक्यातील या खदानीचे लोकेशन मिळाले. तात्काळ घटनास्थळी धाव घेतलेल्या पोलीस पथकाला खदानित पाचही जणांचे मृतदेह सापडले. सध्याच्या परिस्थितीत, हे सर्वजण केवळ फिरण्यासाठी आले होते, असा प्राथमिक अंदाज वर्तवला जात असला तरी, या पाचही जणांचा मृत्यू नेमका कशामुळे झाला, हे एक मोठे रहस्य बनले आहे. कुही पोलीस या घटनेच्या प्रत्येक बाजूचा बारकाईने तपास करत आहेत, जेणेकरून या दुर्दैवी घटनेमागचे सत्य लवकरच समोर येईल. या घटनेमुळे परिसरात भीतीचे वातावरण निर्माण झाले आहे.
