'पवार कुटुंब म्हणजे ब्रिटिश ईस्ट इंडिया कंपनी, अजित पवार...', ओबीसी नेत्याची पवारांवर जहरी टीका

ओबीसी नेते लक्ष्मण हाके यांनी पवार कुटुंबाची तुलना ब्रिटिश ईस्ट इंडिया कंपनीशी केली आहे आणि अजित पवारांना 'ठेकेदार, कॉन्ट्रॅक्टर आणि भांडवलदार' यांचे नेते म्हटले आहे. सुप्रिया सुळेंना मिळालेल्या संसदरत्न पुरस्कारावरही त्यांनी प्रश्नचिन्ह उपस्थित केले

Image Credit : Asianet News

पुणे: महाराष्ट्राच्या राजकारणात नेहमीच केंद्रस्थानी असलेल्या पवार कुटुंबावर एका ओबीसी नेत्याने थेट आणि गंभीर टीका केली आहे. ओबीसी नेते लक्ष्मण हाके यांनी पवार कुटुंबाची तुलना ब्रिटिश ईस्ट इंडिया कंपनीशी केली आहे, तर अजित पवार यांना 'ठेकेदार, कॉन्ट्रॅक्टर आणि भांडवलदार' यांचे नेते म्हटले आहे. खासदार सुप्रिया सुळे यांना मिळालेल्या संसदरत्न पुरस्कारावरही त्यांनी प्रश्नचिन्ह उपस्थित केले आहे.

Image Credit : Google

शनिवारी पुरंदर तालुक्यातील निरा येथे माध्यमांशी संवाद साधताना हाके यांनी ही टीका केली. ते म्हणाले की, महाराष्ट्रात सत्ता कोणाचीही असो, पवार कुटुंबीय नेहमीच सत्तेच्या जवळ राहतात आणि तिजोरीच्या चाव्या त्यांच्या हातात असतात. म्हणूनच मला सत्ताधाऱ्यांवर प्रश्न विचारण्याऐवजी पवारांवर टीका करावी लागत आहे, असे त्यांनी स्पष्ट केले.

Image Credit : social media

'मराठा विरुद्ध ओबीसी संघर्ष अटळ'

यावेळी बोलताना लक्ष्मण हाके यांनी मराठा आरक्षणाच्या मुद्द्यावरही भाष्य केले. मनोज जरांगे यांच्यावर टीका करताना ते म्हणाले की, जरांगे यांना संविधानाचे ज्ञान नाही. केवळ दादागिरीच्या जोरावर आरक्षण मिळत नाही, तर ते संविधानानुसारच मिळते. जरांगे यांच्या कृतीमुळे मराठा आणि ओबीसी समाजांमध्ये संघर्ष निर्माण होत आहे, असा आरोप त्यांनी केला. हा संघर्ष भविष्यात तीव्र होऊ शकतो, असा इशाराही त्यांनी उपमुख्यमंत्री एकनाथ शिंदे यांना दिला आणि त्यांनी सावध राहावे, असे आवाहन केले.

Image Credit : social media

सुप्रिया सुळेंच्या कार्यावर प्रश्नचिन्ह

खासदार सुप्रिया सुळे यांच्यावर निशाणा साधताना हाके म्हणाले की, सुप्रिया सुळे फक्त त्यांच्या वडिलांच्या (शरद पवार) नावावर निवडून येतात. संसदेमध्ये त्यांचे काम काय आहे? त्यांना 'संसदरत्न' पुरस्कार कशासाठी मिळाला? असा सवाल त्यांनी विचारला. त्यांनी समाजातील गरीब आणि तळातल्या लोकांचे प्रश्न कधी संसदेत मांडले आहेत का, असा प्रश्नही हाके यांनी उपस्थित केला.