तुमच्याकडे जमीन आहे? मग हे वाचाच! सरकारचा मोठा निर्णय, जमिनीशी संबंधित ११ कागदपत्रे आता मिळणार एका क्लिकवर

E Hakk System For Land Records : राज्य सरकारने ‘ई-हक्क’ प्रणाली सुरू केली असून, यामुळे नागरिकांना तलाठी कार्यालयात जाण्याची गरज नाही. या प्रणालीद्वारे जमिनीशी संबंधित ११ महत्त्वाचे फेरफार आता घरबसल्या ऑनलाईन करता येणार आहेत. 

Image Credit : Getty

तलाठ्याचे फेरे वाचले! जमिनीचे 'हे' ११ फेरफार आता घरबसल्या होणार

मुंबई : शेतकरी आणि जमीनधारकांसाठी मोठा दिलासा देणारा निर्णय घेत राज्य सरकारने ‘ई-हक्क’ प्रणालीची अंमलबजावणी सुरू केली आहे. महसूल प्रशासन अधिक पारदर्शक, गतिमान आणि नागरिकाभिमुख करण्याच्या दिशेने उचललेले हे महत्त्वाचे पाऊल मानले जात आहे. या नव्या डिजिटल व्यवस्थेमुळे जमिनीशी संबंधित अनेक प्रक्रिया आता पूर्णपणे ऑनलाईन झाल्या असून, नागरिकांचा वेळ, पैसा आणि त्रास वाचणार आहे. 

Image Credit : ChatGPT

तलाठी कार्यालयाचे फेरे आता इतिहासजमा

यापूर्वी सातबारा उताऱ्यात बदल, फेरफार नोंदी, वारस नोंद, गहाणखत किंवा इतर जमीनविषयक कामांसाठी नागरिकांना तलाठी व महसूल कार्यालयात वारंवार जावे लागत होते. कागदपत्रांची पडताळणी, अर्जांतील विलंब आणि अनावश्यक अडचणींमुळे शेतकऱ्यांना मोठा त्रास सहन करावा लागत होता. मात्र ई-हक्क प्रणालीमुळे या सर्व प्रक्रिया ऑनलाईन झाल्या असून, अर्ज थेट डिजिटल स्वरूपात दाखल करता येणार आहेत. नागरिक महा ई-सेवा केंद्रांमार्फत या सुविधांचा सहज लाभ घेऊ शकतात.

Image Credit : Asianet News

ई-हक्क प्रणालीचा नेमका उद्देश काय?

सातबारा उताऱ्यातील अडचणी कमी करणे आणि फेरफार नोंदींसाठी लागणारा कालावधी मोठ्या प्रमाणात घटवणे, हा शासनाचा मुख्य उद्देश आहे. अर्ज स्वीकारण्यापासून ते अंतिम नोंद होईपर्यंतची संपूर्ण प्रक्रिया संगणकीकृत करण्यात आली आहे. यामुळे मानवी हस्तक्षेप कमी होणार असून, चुका, गैरसमज आणि तक्रारींवर नियंत्रण मिळणार आहे. विशेष म्हणजे, अर्जदाराला आपल्या अर्जाची स्थिती ऑनलाईन ट्रॅक करता येणार आहे.

Image Credit : Getty

‘अॅग्रीस्टॅक’मुळे शेतकऱ्यांना युनिक ओळख

याचबरोबर शासनाने ‘अॅग्रीस्टॅक’ योजनेंतर्गत युनिक फार्मर आयडी देण्याची प्रक्रिया देखील सुरू केली आहे. या आयडीमुळे भविष्यात कर्ज, पीकविमा, अनुदान किंवा शासकीय योजनांचा लाभ घेताना वेगवेगळे उतारे व कागदपत्रे सादर करण्याची गरज भासणार नाही. एकाच ओळख क्रमांकावर शेतकऱ्याची संपूर्ण माहिती उपलब्ध होणार असल्याने कामकाज अधिक सुलभ आणि जलद होणार आहे.

Image Credit : Asianet News

कोणती 11 कागदपत्रे व सेवा ऑनलाईन मिळणार?

ई-हक्क प्रणालीअंतर्गत खालील 11 महत्त्वाच्या जमीनविषयक सेवा ऑनलाईन उपलब्ध करून देण्यात आल्या आहेत.

जमीन खरेदी-विक्री फेरफार नोंद

वारसाहक्क नोंदणी

कौटुंबिक वाटणी (Partition Mutation)

न्यायालयीन आदेशावर आधारित नोंदी

बोजा चढविणे किंवा कमी करणे

गहाणखत नोंद

ई-करार नोंदणी

संपत्ती हक्क हस्तांतरण

मृत व्यक्तीचे नाव कमी करणे

एकत्र कुटुंब नोंद कमी करणे

अपाक शेरा व विश्वस्ताचे नाव कमी करणे

या सुविधांमुळे जमीन व्यवहार अधिक सोपे, जलद आणि पारदर्शक होणार आहेत.