Baramati Rahuri Assembly Bypoll Election: अजित पवार, शिवाजीराव कर्डिले यांच्या निधनामुळे रिक्त झालेल्या बारामती, राहुरी विधानसभा मतदारसंघांच्या पोटनिवडणुकीचे वेळापत्रक जाहीर झाले. राष्ट्रवादीकडून सुनेत्रा पवार यांची उमेदवारी निश्चित मानली जात आहे.
मुंबई: महाराष्ट्राच्या राजकारणातील दोन महत्त्वाच्या मतदारसंघांकडे संपूर्ण राज्याचे लक्ष लागले आहे. राज्याचे दिवंगत माजी उपमुख्यमंत्री अजित पवार आणि भाजपचे दिवंगत आमदार शिवाजीराव कर्डिले यांच्या निधनामुळे रिक्त झालेल्या अनुक्रमे बारामती आणि राहुरी विधानसभा मतदारसंघांच्या पोटनिवडणुकीचे वेळापत्रक निवडणूक आयोगाने जाहीर केले आहे.
निवडणुकीचा महत्त्वाचा घटनाक्रम
देशातील इतर पाच राज्यांच्या विधानसभा निवडणुकांसोबतच महाराष्ट्रातील या दोन पोटनिवडणुका पार पडणार आहेत.
मतदान तारीख: २३ एप्रिल
Related Articles
निकाल (मतमोजणी): ४ मे
बारामती: सुनेत्रा पवार रिंगणात; निवडणूक बिनविरोध होणार?
अजित पवार यांच्या निधनानंतर बारामतीची जागा रिक्त झाली होती. सध्या उपमुख्यमंत्रिपदाची जबाबदारी सांभाळणाऱ्या सुनेत्रा पवार यांना सहा महिन्यांच्या आत विधिमंडळाचे सदस्य होणे अनिवार्य आहे. त्यामुळे राष्ट्रवादी काँग्रेसकडून (AP) सुनेत्रा पवार यांची उमेदवारी निश्चित मानली जात आहे. विशेष म्हणजे, सुनेत्रा पवार यांच्या रिक्त झालेल्या राज्यसभा जागेवर पार्थ पवार यांची वर्णी लागली आहे. राजकीय वर्तुळातील चर्चेनुसार, अजित पवारांच्या निधनामुळे आदरांजली म्हणून ही निवडणूक बिनविरोध होण्याची शक्यता दाट आहे.
राहुरी: कर्डिलेंच्या वारसदाराला संधी मिळणार?
अहमदनगर जिल्ह्यातील राहुरी मतदारसंघाचे भाजप आमदार शिवाजीराव कर्डिले यांचे गेल्या वर्षी ऑक्टोबरमध्ये निधन झाले होते. तेव्हापासून ही जागा रिक्त आहे. या जागेवर आता भाजपकडून कोणाला तिकीट मिळते, याकडे सर्वांचे लक्ष लागले आहे. महायुती आणि महाविकास आघाडी या निवडणुकीत काय भूमिका घेतात, यावर राहुरीची निवडणूक बिनविरोध होणार की चुरशीची ठरणार, हे स्पष्ट होईल.
राजकीय समीकरणे आणि पेच
निवडणूक आयोगाने तारखा जाहीर केल्यामुळे दोन्ही मतदारसंघांत आचारसंहिता लागू झाली आहे. बारामतीमध्ये सुनेत्रा पवारांच्या विरोधात उमेदवार न देण्याचे संकेत अनेक पक्षांनी दिले असले, तरी राहुरीमध्ये मात्र चुरस पाहायला मिळू शकते.
