Ashok Kharat Case : अशोक खरातला आज नाशिक जिल्हा न्यायालयात हजर केले जाणार असून SIT त्याची पोलीस कोठडी वाढवण्याची मागणी करणार आहे. दरम्यान, त्याच्या कुटुंबीयांवरही गुन्हे दाखल झाले असून तपास अधिक वेगाने सुरू आहे.
Ashok Kharat Case : नाशिकमधील स्वयंघोषित भोंदूबाबा अशोक खरात प्रकरणात नवनवीन धक्कादायक खुलासे समोर येत असताना आज त्याला पुन्हा न्यायालयात हजर करण्यात येणार आहे. त्याची पोलीस कोठडी आज संपत असल्याने तपास यंत्रणा पुन्हा वाढीव कोठडीची मागणी करणार आहेत. लैंगिक शोषण, आर्थिक फसवणूक आणि इतर गंभीर आरोपांमुळे या प्रकरणाची व्याप्ती दिवसेंदिवस वाढत आहे.
आज न्यायालयात सुनावणी; वाढीव कोठडीवर निर्णय महत्त्वाचा
अशोक खरात याला आज नाशिक जिल्हा न्यायालयात हजर करण्यात येणार आहे. याआधी दाखल झालेल्या अत्याचाराच्या पहिल्या गुन्ह्यात त्याला तीन वेळा पोलीस कोठडी सुनावण्यात आली आहे. आजच्या सुनावणीत सरकारी पक्ष कोणती भूमिका मांडतो आणि न्यायालय काय निर्णय देते, याकडे सर्वांचे लक्ष लागले आहे.
पत्नी फरार, मुलगा पोलिसांच्या ताब्यात
दरम्यान, शिर्डीतील जमीन फसवणूक प्रकरणात खरातसह त्याच्या पत्नीवरही गुन्हा दाखल करण्यात आला आहे. मात्र, SIT पथक पोहोचण्यापूर्वीच त्याची पत्नी कल्पना खरात फरार झाली. तर त्याचा मुलगा हर्षवर्धन याला पोलिसांनी ताब्यात घेतले आहे. या घडामोडींमुळे प्रकरण अधिक गुंतागुंतीचे बनले आहे.
Related Articles
मुलासमोर चौकशी; सहकार्य न केल्याने तपासात अडथळे
अशोक खरात तपासात सहकार्य करत नसल्याने पोलिसांनी त्याची चौकशी अधिक तीव्र केली आहे. मिळालेल्या माहितीनुसार, त्याच्या समोरच मुलाची चौकशी करून अधिक माहिती उघड करण्याचा प्रयत्न केला जाणार आहे. आरोपीकडून स्पष्ट माहिती मिळत नसल्याने तपासाची गती मंदावली असल्याचे समोर आले आहे.
सीए, पुजारी आणि सराफ व्यावसायिकांची चौकशी
या प्रकरणात SITने मोठी कारवाई करत खरातचा चार्टर्ड अकाउंटंट, ईशान्यश्वर मंदिराचा पुजारी आणि एका सराफ व्यावसायिकाची कसून चौकशी केली आहे. आर्थिक व्यवहार, मंदिरातील हालचाली आणि फसवणुकीशी संबंधित पुरावे गोळा करण्यासाठी ही चौकशी करण्यात आली. तपास यंत्रणा आज न्यायालयात हे महत्त्वाचे पुरावे सादर करून कोठडी वाढवण्याचा प्रयत्न करणार आहेत.
