Winter Health Care : थंडीत मधुमेहाच्या रुग्णांनी आरोग्याची अशी घ्यावी काळजी, रहाल फ्रेश आणि हेल्दी

Winter Health Care : थंडीत मधुमेहाच्या रुग्णांनी विशेष काळजी घेणे आवश्यक आहे, कारण हिवाळ्यात रक्तातील साखर वाढण्याची शक्यता जास्त असते. व्यायाम रोज 30-40 मिनिटे करणे, उबदार आणि पौष्टिक आहार घेणे, साखर व तळलेले पदार्थ टाळणे महत्त्वाचे आहे.

Image Credit : Getty

मधुमेहाच्या रुग्णांसाठी खास टिप्स

थंडीच्या दिवसांत मधुमेहाच्या रुग्णांनी विशेष काळजी घेणे अत्यंत महत्त्वाचे असते. हिवाळ्यात शरीराचे तापमान टिकवण्यासाठी मेटाबॉलिझम बदलतो आणि परिणामी शरीरात साखरेचे प्रमाण वाढण्याची शक्यता असते. तसेच थंडीमुळे शारीरिक हालचाल कमी होते, परिणामी रक्तातील ग्लुकोज लेव्हल वाढू शकतो. याशिवाय कोरडी त्वचा, पायातील समस्या, रक्तदाबातील चढ-उतार अशा काही आरोग्य समस्यांचाही धोका अधिक असतो. त्यामुळे हिवाळ्यात मधुमेही व्यक्तींनी जीवनशैली, आहार आणि औषधे यांचा योग्य समतोल राखणे आवश्यक आहे.

Image Credit : istock

हलका व्यायामही महत्वाचा

थंडीत साखरेची पातळी नियंत्रित ठेवण्यासाठी नियमित व्यायाम करणे अत्यावश्यक आहे. सकाळची जास्त थंडी टाळून दुपारच्या सुमारास वॉक, योगा किंवा हलका व्यायाम करण्याचा सल्ला दिला जातो. आठवड्यातून पाच दिवस किमान 30-40 मिनिटे चालण्याची सवय लावली तर रक्तप्रवाह सुधारतो, इन्सुलिन प्रतिरोध कमी होतो आणि शरीराची रोगप्रतिकारक शक्ती वाढते. व्यायाम सुरू करण्यापूर्वी डॉक्टरांचा सल्ला घेणे गरजेचे आहे, विशेषतः वृद्ध व्यक्तींनी किंवा हृदयरोग असलेल्या रुग्णांनी खबरदारी घ्यावी.

Image Credit : Getty

आहार कसा असावा?

हिवाळ्यात आहारात उबदार आणि पौष्टिक पदार्थांचा समावेश करणे फायदेशीर ठरते. भरपूर फायबर असलेले पदार्थ, जसे की ओट्स, गहू, ज्वारी, भाज्या, सूप, हिरव्या पालेभाज्या आणि मोसमातील फळे खावीत. तूप आणि सुकामेवा मर्यादित प्रमाणात घ्यावा, कारण जास्त प्रमाणातील फॅट ग्लुकोज लेव्हलवर परिणाम करू शकते. दिवसभरात थोड्या-थोड्या अंतराने छोटे-मोठे जेवण घेणे आणि साखरयुक्त पदार्थ, तळलेले खाद्य पदार्थ तसेच प्रक्रिया केलेले खाद्य (जसे की बिस्किट, स्नॅक्स, कोक) टाळणे आवश्यक आहे. भरपूर पाणी पिण्यावरही लक्ष द्यावे, कारण थंडीत तहान कमी लागते आणि पाण्याचे प्रमाण कमी झाल्यास ब्लड शुगर लेव्हल वाढू शकतो.

Image Credit : stockPhoto

त्वचेची काळजी घ्या

त्वचेची आणि पायांची काळजीही थंडीत अत्यंत महत्त्वाची आहे. मधुमेहाच्या रुग्णांना त्वचा कोरडी पडणे, भेगा पडणे, पायांमध्ये सुज, जखमा न भरणे अशा समस्या वाढू शकतात. त्यामुळे रोज मॉइश्चरायझरचा वापर करावा, पाय स्वच्छ आणि कोरडे ठेवावेत. पायांवर छोटेसे कट किंवा जखम झाली तरी दुर्लक्ष न करता त्वरित उपचार करणे गरजेचे आहे. शक्यतो कापसाचे मोजे आणि आरामदायी उबदार बूट वापरावेत.

Image Credit : social media

नियमित ब्लड शुगर तपासणे

थंडीत नियमित ब्लड शुगर तपासणे आणि औषधे/इन्सुलिन वेळेवर घेणे न विसरता करावे. ताप, खोकला, सर्दी झाल्यास डॉक्टरांशी संपर्क साधणे आवश्यक आहे, कारण संक्रमण झाल्यास रक्तातील साखर वाढण्याची शक्यता असते. पर्याप्त झोप, ताण नियंत्रण आणि मद्यपान पूर्णपणे टाळणे या गोष्टींनाही महत्त्व आहे. हिवाळ्यात योग्य आहार, व्यायाम, त्वचा काळजी, औषधांचे पालन आणि रक्तशर्करा नियंत्रण केल्यास मधुमेह रुग्ण निरोगी राहू शकतात आणि हंगामाचा आनंदही घेऊ शकतात.