Dalda Side Effects : डालडा कशापासून बनवतात? तूप आणि डालडामध्ये नेमका फरक काय?
एक काळ असा होता जेव्हा प्रत्येक घरात आणि लग्नात डालडा वापरला जायचा. पण आता डॉक्टर डालडा खाण्यास का मनाई करतात? तो नेमका कशापासून बनतो? जाणून घ्या.
तुम्ही अजूनही डालडा खाताय का?
पूर्वी लग्नकार्यात, बेकरीच्या पदार्थांमध्ये आणि पराठे बनवताना डालड्याचा खमंग वास यायचा. गरिबांना आणि मध्यमवर्गीयांना खऱ्या तुपासारखी चव आणि सुगंध कमी पैशात मिळायचा. त्यामुळे लोक डालडा खूप वापरायचे. पण नंतर समजले की डालडा आरोग्यासाठी अजिबात चांगला नाही. त्यामुळे त्याचा वापर कमी झाला. डॉक्टर डालडा खाण्यास का मनाई करतात आणि तो कसा बनवतात?
डालडा नेमका कशापासून बनवतात?
डालडा दिसायला अगदी तुपासारखा दिसतो. पण तो दुधापासून बनवत नाहीत. याला 'व्हेजिटेबल तूप' असेही म्हणतात. पामतेल, सोयाबीन आणि सूर्यफूल यांसारख्या स्वस्त तेलांवर रासायनिक प्रक्रिया करून डालडा बनवतात. या तेलांमध्ये निकेल धातूचा वापर करून हायड्रोजन गॅस सोडतात. यामुळे पातळ तेल घट्ट आणि पिवळे होते. ते अगदी तुपासारखे दिसते आणि वासही तसाच येतो.
डालडा का खाऊ नये?
या प्रक्रियेत तेलातील नैसर्गिक गुण नष्ट होतात आणि शरीराला घातक असणारे 'ट्रान्स फॅट्स' तयार होतात. डालडा गरम केल्यावर त्यातून आणखी धोकादायक रसायने बाहेर पडतात. म्हणूनच डॉक्टर डालडा न खाण्याचा कडक सल्ला देतात.
डालडा खाल्ल्याने होणारे गंभीर आजार
हृदयविकाराचा धोका: डालडामधील ट्रान्स फॅट्स रक्तातील खराब कोलेस्ट्रॉल (LDL) वाढवतात आणि चांगले कोलेस्ट्रॉल (HDL) कमी करतात. यामुळे रक्तवाहिन्यांमध्ये चरबी साचते आणि हार्ट अटॅक किंवा स्ट्रोकचा धोका वाढतो.
लठ्ठपणा: डालडा रोज खाल्ल्याने पचनक्रिया मंदावते आणि शरीरात चरबी साचून लठ्ठपणा वाढतो.
टाईप-2 डायबिटीस: ट्रान्स फॅट्समुळे इन्सुलिनला विरोध होतो, ज्यामुळे रक्तातील साखर वाढून डायबिटीस होऊ शकतो.
फॅटी लिव्हर: खराब चरबी पचवणे यकृताला जड जाते, त्यामुळे 'फॅटी लिव्हर'चा त्रास होतो.
पचनाच्या समस्या: डालडा लवकर पचत नाही, त्यामुळे गॅस आणि अपचनाचा त्रास होतो.
कॅन्सरचा धोका: डालडा पुन्हा पुन्हा गरम केल्याने त्यात कॅन्सरला कारणीभूत ठरणारे घटक तयार होतात.
आजही बाहेरचे समोसे, पराठे आणि मिठाई बनवण्यासाठी डालडा वापरतात. त्यामुळे बाहेरचे पदार्थ टाळून घरी बनवलेले साजूक तूप खाणे केव्हाही चांगले.
