- Home
- lifestyle
- Guru Chandal Yoga : गुरु-केतूच्या युतीमुळे तयार होतोय 'गुरु चांडाळ योग', 12 राशींवर काय होणार परिणाम?
Guru Chandal Yoga : गुरु-केतूच्या युतीमुळे तयार होतोय 'गुरु चांडाळ योग', 12 राशींवर काय होणार परिणाम?
गुरु सिंह राशीत प्रवेश करत आहे. तिथे गुरु आणि केतूच्या युतीमुळे 'गुरु चांडाळ योग' तयार होतोय. या बदलाचा मेष ते मीन अशा १२ राशींवर काय परिणाम होणार आहे?
गुरु चांडाळ योग
वैदिक ज्योतिषशास्त्रात गुरु ग्रहाला खूप महत्त्व आहे. ज्ञान, शिक्षण, संपत्ती आणि नशिबाचा तो कारक मानला जातो. ३१ ऑक्टोबर २०२६ रोजी गुरु ग्रह आपला मित्र ग्रह सूर्याच्या सिंह राशीत प्रवेश करणार आहे.
सिंह राशीत आधीपासूनच केतू विराजमान आहे. त्यामुळे तिथे गुरु-केतूची युती होऊन 'गुरु चांडाळ योग' तयार होतोय. याशिवाय १२ नोव्हेंबरनंतर मंगळ ग्रहही सिंह राशीत प्रवेश करेल. प्रसिद्ध ज्योतिषी प्रणव शर्मा गुरुजी यांच्या अंदाजानुसार, या ग्रहांच्या बदलाचा मेष ते मीन अशा सर्व १२ राशींच्या नोकरी, व्यवसाय आणि वैयक्तिक आयुष्यावर मोठा परिणाम होणार आहे.
मेष
मेष राशीच्या लोकांसाठी गुरु पाचव्या स्थानात असेल. यामुळे तुमच्या करिअर आणि व्यवसायात नवीन संधी मिळतील, पण काही आव्हानांचाही सामना करावा लागेल. टेक क्षेत्रात काम करणाऱ्यांना प्रगतीची चांगली संधी आहे. नोकरी बदलण्याचा विचार करत असाल तर ही वेळ योग्य आहे.
स्वतःचा व्यवसाय सुरू करण्यासाठीही वातावरण अनुकूल राहील. परदेशवारीचे योग येऊ शकतात. पण लव्ह लाईफमध्ये थोडे मतभेद होऊ शकतात. त्यामुळे जोडीदाराशी बोलताना शब्दांवर नियंत्रण ठेवा आणि विनाकारण वाद टाळा.
वृषभ
वृषभ राशीच्या लोकांसाठी गुरु चौथ्या स्थानात असेल. यामुळे तुमचं लक्ष कुटुंब आणि मालमत्तेवर जास्त राहील. नवीन घर किंवा गाडी घेण्याचे प्रयत्न यशस्वी होऊ शकतात. जुन्या मालमत्तेतूनही चांगला फायदा मिळण्याची शक्यता आहे.
लक्झरी वस्तू आणि घरातील सुखसुविधांवर जास्त खर्च होऊ शकतो. त्यामुळे बजेट सांभाळून खर्च करा. आईच्या तब्येतीची विशेष काळजी घ्या. आर्थिक स्थिती चांगली असली तरी अनावश्यक खर्च टाळणं तुमच्यासाठी फायद्याचं ठरेल.
मिथुन
मिथुन राशीच्या लोकांसाठी गुरु तिसऱ्या स्थानात असेल. या बदलामुळे कौटुंबिक आणि वैयक्तिक नात्यांमध्ये काही अडचणी येऊ शकतात. जवळच्या लोकांशी बोलताना गैरसमज होण्याची शक्यता आहे. नोकरी आणि व्यवसायात अपेक्षित प्रगती मिळायला थोडा वेळ लागू शकतो.
एकाच वेळी अनेक गोष्टींवर लक्ष केंद्रित करावं लागल्याने ताण वाढू शकतो. पैशांच्या बाबतीत सावधगिरी बाळगा. उत्पन्नापेक्षा खर्च वाढणार नाही याची काळजी घ्या. कामाच्या गडबडीत स्वतःच्या आरोग्याकडे दुर्लक्ष करू नका आणि पुरेशी विश्रांती घ्या.
कर्क
कर्क राशीच्या लोकांसाठी गुरु दुसऱ्या स्थानात असेल. गुरु-केतूच्या युतीमुळे पैसे वाचवण्यात अडचणी येऊ शकतात. अचानक येणाऱ्या खर्चामुळे तुमचं आर्थिक बजेट कोलमडू शकतं. कुटुंबातील सदस्यांकडून अपेक्षित सहकार्य न मिळाल्याने थोडी निराशा येऊ शकते.
बोलण्यावर नियंत्रण ठेवणं खूप गरजेचं आहे, जेणेकरून नात्यांमध्ये दुरावा येणार नाही. नवीन मालमत्ता खरेदी करताना किंवा विकताना कागदपत्रे नीट तपासून घ्या. पैशांशी संबंधित कोणताही निर्णय घाईघाईने घेऊ नका.
सिंह
सिंह राशीतच गुरु आणि केतूची युती होत असल्याने हा काळ तुमच्यासाठी खूप महत्त्वाचा आहे. तुमच्या मानसिक आणि शारीरिक आरोग्यावर याचा परिणाम होऊ शकतो. या काळात खर्च वाढण्याची शक्यता आहे, त्यामुळे पैशांचा वापर जपून करा. नोकरी बदलण्याचा विचार करत असाल तर चांगल्या संधी मिळू शकतात.
तंत्रज्ञान क्षेत्रात काम करणाऱ्यांना प्रगतीचे मार्ग खुले होतील. राजकारण आणि समाजकारणात असलेल्या लोकांना आपली क्षमता सिद्ध करण्याची संधी मिळेल. पण कोणताही मोठा निर्णय घेताना घाई करू नका. आरोग्याला प्राधान्य द्या.
कन्या
कन्या राशीच्या लोकांसाठी गुरु बाराव्या स्थानात असेल. यामुळे खर्चावर नियंत्रण ठेवणं खूप गरजेचं आहे. अचानक येणाऱ्या वैद्यकीय किंवा कौटुंबिक खर्चामुळे खिशाला कात्री लागू शकते. विद्यार्थ्यांसाठी हा काळ थोडा कठीण असू शकतो, अभ्यासात लक्ष केंद्रित करणं आवश्यक आहे.
नोकरदार वर्गाने आपल्या कामात कोणताही निष्काळजीपणा करू नये. आर्थिक बचत कमी होण्याची शक्यता असल्याने अनावश्यक खर्च टाळा. आरोग्याची काळजी घ्या आणि रोजच्या कामांचे योग्य नियोजन करा.
तूळ
तूळ राशीच्या लोकांसाठी गुरु अकराव्या स्थानात असेल. हा काळ तुमच्या उत्पन्न आणि करिअरच्या वाढीसाठी खूप फायदेशीर ठरू शकतो. टेक क्षेत्रात काम करणाऱ्यांना प्रमोशन किंवा नवीन जबाबदाऱ्या मिळू शकतात. नोकरीत प्रगतीचे नवीन मार्ग खुले होतील.
अडकलेली कामे मार्गी लागतील आणि पैसे कमवण्याच्या नवीन संधी मिळतील. कौटुंबिक जीवनात आनंद आणि सामंजस्य वाढेल. मित्र आणि नातेवाईकांसोबत प्रवासाचे योग येऊ शकतात. पण लक्झरी वस्तूंवर जास्त खर्च करणं टाळा.
वृश्चिक
वृश्चिक राशीच्या लोकांसाठी गुरु दहाव्या स्थानात असेल. यामुळे तुमच्या करिअर आणि कामाच्या ठिकाणी मोठे बदल होऊ शकतात. सध्याची नोकरी सुरू ठेवायची की नवीन संधी शोधायची, असा संभ्रम निर्माण होऊ शकतो. पण जुन्या मेहनतीचे फळ आता मिळण्याची शक्यता आहे.
इलेक्ट्रॉनिक्स आणि तंत्रज्ञान क्षेत्रात काम करणाऱ्यांसाठी हा काळ खूप चांगला आहे. नियोजन आणि व्यवस्थापन क्षेत्रात असलेल्यांना यश मिळेल. करिअरशी संबंधित निर्णय घेताना भविष्याचा विचार करूनच पाऊल उचला.
धनु
धनु राशीच्या लोकांसाठी गुरु नवव्या स्थानात असेल. हा काळ तुमच्यासाठी नवीन संधी घेऊन येईल. नशिबाची साथ मिळेल, पण गुरु-केतूच्या युतीमुळे यश मिळवण्यासाठी थोडी जास्त मेहनत करावी लागेल. नवीन गोष्टी शिकण्यासाठी आणि कौशल्ये वाढवण्यासाठी हा उत्तम काळ आहे.
समाजात तुमचा मान-सन्मान वाढेल. काहींना पुरस्कार किंवा विशेष ओळख मिळू शकते. राजकारणात असलेल्यांना नवीन जबाबदाऱ्या मिळण्याची शक्यता आहे. मालमत्तेच्या वादात तुमच्या बाजूने निकाल लागू शकतो. प्रयत्न करत राहा, यश नक्की मिळेल.
मकर
मकर राशीच्या लोकांसाठी गुरु आठव्या स्थानात असेल. या काळात तुम्हाला खूप सावधगिरी बाळगण्याची गरज आहे. आरोग्य आणि पैशांच्या बाबतीत अजिबात निष्काळजीपणा करू नका. अचानक येणाऱ्या खर्चामुळे तुमचं आर्थिक नियोजन बिघडू शकतं, त्यामुळे आपत्कालीन परिस्थितीसाठी पैसे बाजूला काढून ठेवा.
प्रवास करताना विशेष काळजी घ्या आणि धोकादायक कामे टाळा. कुटुंबातील सदस्यांच्या वागण्यामुळे कधीकधी मन दुखावलं जाऊ शकतं. अशा वेळी रागावर नियंत्रण ठेवा आणि शांततेने प्रश्न सोडवण्याचा प्रयत्न करा.
कुंभ
कुंभ राशीच्या लोकांसाठी गुरु सातव्या स्थानात असेल. यामुळे वैवाहिक जीवन आणि बिझनेस पार्टनरशिपमध्ये काही आव्हाने येऊ शकतात. ज्यांच्या वैवाहिक जीवनात आधीच अडचणी आहेत, त्यांनी या काळात जास्त संयम बाळगणं गरजेचं आहे. नवरा-बायकोमधील सामंजस्य टिकवून ठेवा.
व्यवसायात भागीदारांसोबत मतभेद होऊ शकतात. त्यामुळे कोणतेही महत्त्वाचे करार करण्यापूर्वी नीट विचार करा. दुसरीकडे, नोकरदार वर्गाला बोनस किंवा बक्षीस मिळण्याची शक्यता आहे. अनपेक्षित खर्चावर नियंत्रण ठेवा आणि नात्यांमध्ये पारदर्शकता ठेवा.
मीन
मीन राशीच्या लोकांसाठी गुरु सहाव्या स्थानात असेल. यामुळे नोकरी, कर्ज, शत्रू आणि आरोग्याशी संबंधित गोष्टींवर लक्ष देण्याची गरज आहे. अचानक येणाऱ्या खर्चामुळे आर्थिक अडचण येऊ शकते. कर्ज घेण्याची वेळ आलीच, तर ते फेडण्याचं नियोजन आधीच करून ठेवा.
कामाच्या ठिकाणी तुमच्या विरोधकांच्या हालचालींवर लक्ष ठेवा. विनाकारण वादात पडण्यापेक्षा आपल्या कामावर लक्ष केंद्रित करा. आरोग्याच्या छोट्या-मोठ्या तक्रारींकडे दुर्लक्ष करू नका. पुरेशी विश्रांती घ्या आणि रोजच्या जीवनात शिस्त पाळा.
