Tawa Paneer Pulao : स्ट्रीट स्टाईल तवा पनीर पुलाव... घरीच असा बनवून पाहा!
Tawa Paneer Pulao : स्ट्रीट स्टाईल तवा पनीर पुलाव आपण आता घरीच सहज बनवू शकतो. बासमती तांदूळ, पनीर, भाज्या आणि पावभाजी मसाला वापरून हा चमचमीत पुलाव कसा बनवायचा? याची संपूर्ण कृती इथे पाहा.
स्ट्रीट स्टाईल तवा पनीर पुलाव
हॉटेलसारखी पुलावची चव घरी आणता येईल का, असा विचार करताय? तव्यावर वितळलेलं बटर, मसाल्यांचा सुगंध, रंगीबेरंगी भाज्या आणि मऊ पनीरचे तुकडे... हे वाचूनच तोंडाला पाणी सुटलं ना! एक घास खाल्ला की पुन्हा पुन्हा खावासा वाटेल अशी याची चव असते.
रस्त्यावर मिळणाऱ्या तवा पुलावची खरी चव त्यात घातलेल्या पावभाजी मसाला आणि लसूण-मिरचीच्या पेस्टमुळे येते. लहानांपासून मोठ्यांपर्यंत सर्वांना आवडणारा हा तवा पनीर पुलाव घरी बनवणं खूप सोपं आहे. वीकेंडच्या दुपारच्या किंवा रात्रीच्या जेवणासाठी हा नक्की ट्राय करा.
लागणारे साहित्य
- बासमती तांदूळ - १ कप
- पनीर - २०० ग्रॅम
- मोठे कांदे - २
- टोमॅटो - २
- गाजर - १
- शिमला मिरची - १
- हिरवे वाटाणे - १/४ कप
- हिरवी मिरची - २
- सुकी लाल मिरची - ४
- लसूण - ६ पाकळ्या
- जिरे - १ चमचा
- लाल तिखट - १/२ चमचा
- धणे पावडर - १ चमचा
- पावभाजी मसाला - १ १/२ चमचा
- हळद - १/४ चमचा
- गरम मसाला - १/२ चमचा
- बटर - २ मोठे चमचे
- तेल - २ मोठे चमचे
- मीठ - चवीनुसार
- कोथिंबीर - थोडीशी
कृती - पहिली पायरी
भाज्या आणि पनीर तयार करणे
सर्वांत आधी पनीरचे लहान चौकोनी तुकडे करून घ्या. कांदा आणि टोमॅटो बारीक चिरा. गाजर आणि शिमला मिरचीचे लांब आणि पातळ काप करा.
हिरवे वाटाणे आधीच भिजत ठेवून गरजेनुसार शिजवून बाजूला ठेवा.
दुसरी पायरी
लसूण-मिरचीची पेस्ट बनवणे
सुक्या लाल मिरच्या थोडा वेळ गरम पाण्यात भिजत ठेवा. त्यानंतर भिजवलेल्या मिरच्या, हिरवी मिरची आणि लसूण मिक्सरमध्ये एकत्र वाटून त्याची फाईन पेस्ट बनवा.
हीच लसूण-मिरचीची पेस्ट तुमच्या पुलावला झणझणीत आणि खास चव देईल.
तिसरी पायरी
बासमती तांदूळ शिजवणे
बासमती तांदूळ स्वच्छ धुवून २० ते ३० मिनिटे भिजत ठेवा. त्यानंतर पाणी काढून टाका आणि उकळत्या पाण्यात थोडे मीठ व हळद घालून तांदूळ शिजवून घ्या.
भात पाऊण किंवा पूर्ण शिजल्यावर पाणी काढून तो बाजूला ठेवा. भात चिकट न होता मोकळा झाला पाहिजे.
चौथी पायरी
तव्यावर फोडणी देणे
आता गॅसवर एक मोठा तवा ठेवा आणि त्यात बटर व तेल घाला. बटर वितळल्यावर त्यात जिऱ्याची फोडणी द्या.
त्यात चिरलेला कांदा, शिमला मिरची आणि गाजर घालून परतून घ्या. भाज्या पूर्णपणे न शिजवता थोड्या क्रंची राहतील अशाच परता.
पाचवी पायरी
टोमॅटो आणि वाटाणे घालणे
कांदा आणि भाज्या थोड्या परतल्यावर त्यात चिरलेला टोमॅटो आणि शिजवलेले हिरवे वाटाणे घाला. टोमॅटो मऊ होऊन भाज्यांमध्ये एकजीव होईपर्यंत परता.
सहावी पायरी
मसाले घालणे
आता यात लाल तिखट, धणे पावडर, पावभाजी मसाला, हळद आणि गरम मसाला घाला.
त्यातच तयार केलेली लसूण-मिरचीची पेस्ट घालून चांगले मिक्स करा. मसाल्यांचा कच्चा वास जाईपर्यंत मध्यम आचेवर परतून घ्या.
त्यानंतर चवीनुसार मीठ घाला, मसाले एकजीव होण्यासाठी थोडे पाणी शिंपडा आणि चांगले ढवळा.
सातवी पायरी
पनीर घालणे
आता चौकोनी कापलेले पनीरचे तुकडे घाला आणि हलक्या हाताने मिक्स करा. मसाला पनीरच्या सर्व बाजूंना लागला पाहिजे. पनीर तुटणार नाही याची काळजी घ्या.
आठवी पायरी
भात घालून मिक्स करणे
शेवटी शिजवून निथळलेला बासमती भात तव्यावर घाला. सोबतच थोडी बारीक चिरलेली कोथिंबीर घाला. भाताची शीतं न मोडता सर्व जिन्नस हलक्या हाताने एकत्र करा. मसाला संपूर्ण भाताला छान लागला पाहिजे.
गरज वाटल्यास थोडे बटर घाला आणि गॅस बंद करा. हॉटेलसारख्या चवीचा आणि सुगंधाचा गरमागरम स्ट्रीट स्टाईल तवा पनीर पुलाव तयार आहे.
तवा पनीर पुलाव चविष्ट होण्यासाठी काही टिप्स
- बासमती तांदूळ जास्त शिजवू नका. भात मोकळा असेल तरच पुलाव छान दिसेल.
- पनीर मसाल्यात जास्त वेळ परतू नका, नाहीतर ते कडक होईल.
- स्ट्रीट स्टाईल चवीसाठी यात पावभाजी मसाला घालणे अत्यंत महत्त्वाचे आहे.
- बटर आणि तेल एकत्र वापरल्याने सुगंध आणि चव दोन्ही छान येते.
- शिमला मिरची, गाजर यांसारख्या भाज्या जास्त न शिजवता थोड्या क्रंची ठेवा.
- तुमच्या आवडीनुसार तुम्ही सुक्या आणि हिरव्या मिरचीचे प्रमाण कमी-जास्त करू शकता.
कशासोबत खावे?
हा तवा पनीर पुलाव कांद्याच्या रायत्यासोबत, काकडीच्या कोशिंबिरीसोबत, चिप्स किंवा पापडासोबत खायला अप्रतिम लागतो. वरून थोडे बटर आणि कोथिंबीर भुरभुरून गरमागरम सर्व्ह करा.
घरीच स्ट्रीट फूडचा आनंद घेण्यासाठी ही रेसिपी नक्की ट्राय करा.
टीप : हा स्ट्रीट स्टाईल तवा पनीर पुलाव शेफ दिनू (Recipe By Chef Dinu) यांच्या रेसिपीवर आधारित आहे, याची नोंद घ्यावी.
