Steel Water Bottle : स्टीलची बाटली वापरताय? मग ही चूक अजिबात करू नका
तुम्ही रोज स्टीलची पाण्याची बाटली वापरता का? ती नीट साफ केली नाही तर बॅक्टेरिया आणि दुर्गंधीची समस्या होऊ शकते. बाटली सुरक्षितपणे कशी साफ करावी आणि वापरावी, याच्या सोप्या टिप्स जाणून घ्या.
स्टिल बाटली
प्लास्टिकला पर्याय म्हणून आजकाल अनेकजण स्टीलची पाण्याची बाटली वापरतात. ऑफिस, शाळा, कॉलेज किंवा जिममध्ये सगळीकडे स्टीलच्या बाटल्या दिसतात. या बाटल्या दीर्घकाळ टिकतात आणि पर्यावरणासाठीही चांगल्या असतात. पण फक्त स्टीलची बाटली विकत घेतली म्हणजे ती सुरक्षित झाली असे नाही. आपण ती कशी साफ करतो हे खूप महत्त्वाचे आहे. बाटलीची योग्य काळजी घेतली नाही, तर त्यात जंतू वाढण्याची शक्यता असते.
बॅक्टेरिया वाढण्याचा धोका
आपण बाटलीला थेट तोंड लावून पाणी पितो, तेव्हा तोंडातील लाळ आणि सूक्ष्मजंतू बाटलीत जातात. तसेच, न धुतलेल्या हातांनी बाटलीचे झाकण उघडल्यास तिथेही घाण साचते.
पाणी पिल्यानंतर बाटली तशीच बंद करून ठेवली, तर आतील ओलाव्यामुळे बॅक्टेरिया वेगाने वाढतात. अशा वातावरणात सूक्ष्मजंतू सहज वाढू शकतात.
बाटलीचे तोंड, झाकणाची आतील बाजू, सिलिकॉन रिंग, स्ट्रॉ आणि तळाशी घाण साचण्याची शक्यता जास्त असते. काही वेळा तिथे न दिसणारा 'बायोफिल्म' नावाचा थरही तयार होतो.
आतून स्वच्छ धुणं गरजेचं
अनेकजण बाटलीत फक्त पाणी टाकून ती विसळतात आणि पुन्हा वापरतात. ही खूप मोठी चूक आहे. तुम्ही बाटलीत चहा, कॉफी, ज्यूस, दूध किंवा प्रोटीन शेक नेत असाल, तर त्याचे कण आत चिकटून राहतात. साखर आणि प्रोटीनचे कण शिल्लक राहिल्यास तिथे सूक्ष्मजंतू वेगाने वाढतात. त्यामुळे बाटली वापरल्यानंतर ती आतून स्वच्छ धुणे अत्यंत गरजेचे आहे.
डिप क्लिनिंग करणं गरजेचं
रोज स्वच्छ करा - बाटली रिकामी झाल्यावर कोमट पाणी आणि डिशवॉश लिक्विड टाकून ती ब्रशने आतून चांगली घासा.
झाकण विसरू नका - फक्त बाटली धुवून चालणार नाही. झाकणातील सिलिकॉन रिंग किंवा स्ट्रॉ काढून तेही स्वच्छ करा, कारण तिथे ओलावा आणि घाण साचते.
चांगली वाळवा - धुतल्यानंतर बाटली लगेच बंद करू नका. ती उघडी आणि उलटी ठेवून पूर्णपणे वाळू द्या. ओलावा जास्त काळ राहू देऊ नका.
आठवड्यातून एकदा डीप क्लिनिंग - बाटलीला वास येत असेल, तर कंपनीने दिलेल्या सूचनांनुसार ती साफ करा. काही बाटल्यांसाठी बेकिंग सोडा वापरता येतो, पण प्रत्येक बाटलीसाठी एकच पद्धत लागू होत नाही.
स्टिलची बाटली धोकादायक नाही, पण अस्वच्छ ठेवणं गरजेचं
स्टीलची बाटली आयुष्यभर टिकेल असा विचार करू नका. बाटलीला आतून गंज लागला असेल, खोल ओरखडे पडले असतील, कोटिंग खराब झाले असेल किंवा झाकण तुटले असेल, तर ती लगेच बदला. झाकण नीट साफ करता येत नसेल, तरीही नवीन झाकण घेणे सुरक्षित ठरते.
स्टीलची बाटली धोकादायक नसते, पण ती अस्वच्छ ठेवल्यास आजार होऊ शकतात.
रोज फक्त एक मिनिट काढून बाटली स्वच्छ धुतली आणि वाळवली, तर तुमचे आरोग्य सुरक्षित राहील. बाटली कोणत्या धातूची आहे यापेक्षा आपण तिची काळजी कशी घेतो, हे जास्त महत्त्वाचे आहे!
