रिलेशनशिप टिप्स: वेळेनुसार नात्याची समीकरणे बदलतात. खूप प्रेम असूनही अनेकदा जोडीदाराबद्दल पूर्वीसारखं वाटत नाही. प्रेम असतं, पण भविष्याचा विचार केला की मन मागे हटतं. असं का होतं? तुमचं मन असं ओळखा.
मुंबई : नात्याच्या सुरुवातीला सगळंच छान वाटतं. वाटतं की या व्यक्तीसोबतच आयुष्य काढायचं आहे. पण काही महिने किंवा वर्षांनंतर ती भावना उरत नाही. तुम्ही अजूनही त्याच्यावर प्रेम करता, काळजी घेता, पण लग्न किंवा एकत्र राहण्याचा विचार आला की अस्वस्थता येते. ही खूप सामान्य मानसिक घालमेल आहे. याचा अर्थ तुम्ही वाईट माणूस आहात असं नाही, फक्त तुमचं मन काहीतरी वेगळं सांगत आहे.
तुम्हाला भविष्य दिसत नाहीये हे कसं ओळखायचं? ५ लक्षणे:
१. भविष्याच्या प्लॅनमध्ये तो/ती नाही: मित्रांसोबत फिरायला जाणं, करिअर प्लॅन, घर घेणं - जेव्हाही तुम्ही भविष्याचा विचार करता, नकळतपणे जोडीदाराशिवाय विचार करता. त्याचं नाव आपोआप डोक्यात येत नाही.
२. सगळं ठीक आहे, पण काहीतरी कमी आहे: भांडण नाही, प्रेमही आहे. पण आतून कुठेतरी रिकामेपणा जाणवतो. असं वाटतं की तुम्ही दोघे दोन वेगवेगळ्या दिशांना चालला आहात. आयुष्याची ध्येये, विचार जुळत नाहीत.
Related Articles
३. जोडीदाराच्या यशाचा आनंद होत नाही: आधी त्याचं काही चांगलं झालं की तुम्हाला आनंद व्हायचा. आता त्याचं यश किंवा फ्युचर प्लॅन ऐकून तुम्हाला वाटतं, "यात माझं काय?" हा दुरावाच एक संकेत आहे.
४. लग्न किंवा कमिटमेंटचा विषय टाळणे: जोडीदार किंवा घरच्यांकडून लग्नाचा विषय निघाला की तुम्ही विषय बदलता, चिडता किंवा घाबरता. हे प्रेम कमी झाल्याचं नाही, तर भविष्याबद्दलच्या अनिश्चिततेचं लक्षण आहे.
५. स्वतःसाठी जास्त वेळ मागणं: त्याच्यासोबत राहण्यापेक्षा एकटं राहायला किंवा मित्रांसोबत राहायला जास्त आवडतं. नात्यात गुदमरल्यासारखं वाटतं. हा स्पष्ट संकेत आहे की तुम्ही मानसिकदृष्ट्या दूर जात आहात.
काय करावं?
स्वतःला दोष देऊ नका. थोडा वेळ घ्या. स्वतःला विचारा - मी त्याच्यावर प्रेम करतो/करते, की फक्त सवयीत अडकलोय? त्याच्याशी मोकळेपणाने बोला. अनेकदा समुपदेशनाची (काउन्सिलिंग) मदत होते. लक्षात ठेवा, प्रेम आहे म्हणजे भविष्य एकत्रच घालवलं पाहिजे, असा कोणताही नियम नाही. या दोन वेगळ्या गोष्टी आहेत. स्वतःच्या मनाचं ऐकणं गरजेचं आहे, यातच दोघांचं भलं आहे.
