भारतात माचा टीची क्रेझ वेगाने वाढत आहे. कधीकाळी फक्त मोजक्याच लोकांना माहीत असलेला हा जपानी चहा आता घराघरात पोहोचला आहे.
मुंबई : भारतात माचा टीची लोकप्रियता आता खूप वाढली आहे. एकेकाळी हा हिरवा चहा अनेकांना फक्त गवतासारख्या चवीचा वाटायचा. पण आता कॅफेचे मेन्यू, सोशल मीडिया आणि लोकांच्या किचनमध्येही माचा सहज दिसतो. आईस्ड माचा लाटे आणि फ्रूट-इन्फ्युज्ड व्हरायटीजमुळे हा जपानी ग्रीन टी भारतीयांना, विशेषतः तरुणांना खूप आवडू लागला आहे.
गुगल सर्चच्या ताज्या ट्रेंडनुसार, गेल्या वर्षभरात माचाबद्दलच्या सर्चमध्ये खूप बदल आणि वाढ झाली आहे. यात ऑगस्ट २०२६ पर्यंतच्या आकडेवारीचा समावेश आहे. भारतात 'हाऊ टू मेक माचा' (how to make matcha) या सर्चमध्ये गेल्या वर्षभरात तब्बल १३०० टक्क्यांनी वाढ झाली आहे. यावरून हेच दिसतंय की, लोक आता फक्त कॅफेमध्येच नाही, तर घरीही त्यांचा आवडता माचा ड्रिंक बनवण्याचा प्रयत्न करत आहेत.
माचा आता फक्त कॅफेपुरता मर्यादित राहिलेला नाही. सर्च ट्रेंड्स पाहता, लोकांना तो स्वतः घरी कसा बनवायचा, हे शिकण्याची खूप उत्सुकता आहे.
Related Articles
ऑगस्ट २०२६ मध्ये 'माचा कसा बनवायचा' या प्रश्नांसोबतच 'माचा व्हिस्क' (matcha whisk) आणि 'माचा बाऊल' (matcha bowl) हे शब्दही मोठ्या प्रमाणावर सर्च केले गेले. याचा अर्थ असा की, माचा बनवण्याच्या पारंपारिक पद्धती आणि त्यासाठी लागणारी भांडी याबद्दलही लोकांमध्ये आकर्षण वाढत आहे.
या चहाच्या आरोग्याला होणाऱ्या फायद्यांबद्दलही लोकांमध्ये उत्सुकता आहे. गेल्या वर्षभरात 'माचा प्रोटीन' (matcha protein) च्या सर्चमध्ये २५०० टक्क्यांनी, तर 'माचा हेल्थ' (matcha health) च्या सर्चमध्ये १००० टक्क्यांनी वाढ झाली आहे.
मँगो आणि स्ट्रॉबेरी माचा
याशिवाय, माचासोबत आता बरेच प्रयोगही केले जात आहेत. लोक घरी आणि कॅफेमध्येही सीझनल फळांचा वापर करून माचा बनवत आहेत. उन्हाळ्यात 'मँगो माचा' (mango matcha) च्या सर्चमध्ये २०० टक्के आणि 'स्ट्रॉबेरी माचा' (strawberry matcha) च्या सर्चमध्ये ४०० टक्क्यांनी वाढ झाली. पावसाळा सुरू झाल्यावर 'डर्टी माचा' (dirty matcha) आणि 'कोकोनट माचा' (coconut matcha) हे शब्द ट्रेंडमध्ये आले. 'माचा निअर मी' (matcha near me) सर्च करणाऱ्या शहरांमध्ये दिल्ली, गोवा आणि चंदीगड ही शहरे आघाडीवर होती.
खाण्यापलीकडे माचाचा ट्रेंड
गेल्या वर्षभरात 'माचा शूज' (matcha shoes) आणि 'माचा एन्झाइम स्क्रब' (matcha enzyme scrub) हे शब्दही खूप सर्च केले गेले. ऑगस्ट २०२६ मध्ये 'माचा कँडल' (matcha candle), 'माचा फेस वॉश' (matcha face wash) आणि 'माचा परफ्यूम' (matcha perfume) यांसारख्या प्रॉडक्ट्सच्या सर्चमध्येही मोठी वाढ दिसून आली.
फक्त माचाच नाही, तर इतर फ्लेवर्सही आता लक्ष वेधून घेत आहेत. गुगल सर्चच्या डेटानुसार, उबे (ube) आणि होजिचा (hojicha) बद्दलही लोकांची उत्सुकता वाढत आहे. उबे हे फिलिपिनो खाद्यपदार्थांमध्ये वापरले जाणारे नैसर्गिक जांभळ्या रंगाचे रताळे आहे. गेल्या वर्षभरात भारतात उबेबद्दलचे सर्च सातत्याने वाढत गेले आणि ऑगस्ट २०२६ मध्ये ते सर्वोच्च पातळीवर पोहोचले.
दुसरीकडे, होजिचा त्याच्या वेगळ्या चवीमुळे लोकांचे लक्ष वेधून घेत आहे. हा एक भाजलेला जपानी ग्रीन टी आहे, ज्याची चव माचापेक्षा थोडी नटी (nutty) आणि कमी गवताळ (less grassy) असते.
