- Home
- lifestyle
- Hibiscus Shampoo : जास्वंदीच्या फुलांपासून शॅम्पू घरच्या घरी कसा बनवायचा, केस होतील दाट
Hibiscus Shampoo : जास्वंदीच्या फुलांपासून शॅम्पू घरच्या घरी कसा बनवायचा, केस होतील दाट
Hibiscus Shampoo: केस मजबूत आणि चमकदार बनवायचे असतील, तर घरच्या घरी जास्वंदीच्या फुलांपासून शॅम्पू बनवता येतो. हा शॅम्पू केस मऊ करतो. तो घरी कसा बनवायचा?

घरच्या घरी जास्वंदीच्या फुलांचा शॅम्पू
केस सुंदर आणि निरोगी असावेत, असे अनेकांना वाटते. त्यासाठी महागडे शॅम्पू आणि हेअर केअर प्रॉडक्ट्स वापरले जातात. पण तुम्हाला माहीत आहे का, की आपल्या घराच्या आजूबाजूला मिळणाऱ्या जास्वंदीच्या फुलांपासूनही शॅम्पू बनवता येतो? जास्वंदीची फुले आणि पाने केस निगराणीसाठी खूप काळापासून वापरली जात आहेत. यामध्ये अमिनो ॲसिड्स, व्हिटॅमिन सी आणि केसांना मऊ ठेवणारे नैसर्गिक घटक असतात. ते केस स्वच्छ करण्यासोबतच मऊ आणि चमकदार ठेवण्यास मदत करतात. घरी हा शॅम्पू बनवण्यासाठी जास्त साहित्य लागत नाही. ४-५ जास्वंदीची फुले, ८-१० पाने, दोन चमचे मूगडाळीचे पीठ किंवा शिकेकाई पावडर, एक चमचा खोबरेल तेल किंवा ऑलिव्ह ऑईल घ्यावे. यासोबतच थोडे पाणीही लागते.

जास्वंदीच्या फुलांचा शॅम्पू कसा बनवायचा
आधी जास्वंदीची फुले आणि पाने स्वच्छ धुऊन घ्या. आता एका भांड्यात पाणी घेऊन त्यात फुले आणि पाने टाका. मध्यम आचेवर ५-७ मिनिटे उकळू द्या. पाणी थोडे घट्ट झाल्यावर गॅस बंद करा. हे मिश्रण थंड झाल्यावर फुले आणि पाने हाताने चांगली कुस्करून घ्या. त्यानंतर गाळून त्याचे पाणी काढा. यात दोन चमचे मूगडाळीचे पीठ किंवा शिकेकाई पावडर आणि एक चमचा खोबरेल तेल मिसळा. हे सर्व चांगले मिसळले की घरगुती जास्वंदीचा शॅम्पू तयार होईल. हवे असल्यास तुम्ही जास्वंदीची फुले आणि पाने थोडे पाणी टाकून मिक्सरमध्ये वाटून त्याची पेस्टही बनवू शकता.
जास्वंदीचा शॅम्पू कसा वापरायचा?
हा शॅम्पू वापरण्यापूर्वी केस पाण्याने ओले करा. त्यानंतर तयार केलेले मिश्रण डोक्यावर आणि केसांच्या मुळांना लावा. बोटांनी हलक्या हाताने मसाज करून ३-५ मिनिटे राहू द्या. त्यानंतर साध्या पाण्याने स्वच्छ धुवा. या शॅम्पूने बाजारात मिळणाऱ्या शॅम्पूसारखा जास्त फेस येणार नाही. तरीही तो केस स्वच्छ करण्यास मदत करतो. जास्वंदीच्या फुलांचे मिश्रण केस मऊ आणि चमकदार ठेवण्यास मदत करते. मात्र, केस गळणे, कोंडा कमी होणे किंवा केस वाढणे याबाबतीत प्रत्येकाला एकसारखेच परिणाम मिळतील असे नाही. पहिल्यांदा वापरण्यापूर्वी त्वचेवर थोडी पॅच टेस्ट करा. ॲलर्जी असल्यास वापरू नका. यात टिकवणारे घटक (प्रिझर्व्हेटिव्ह्ज) नसल्याने तयार केलेल्या दिवशीच वापरणे चांगले. आठवड्यातून एक किंवा दोनदा हा वापरता येतो.

