Hair Growth : केस लांब आणि दाट करण्यासाठी ते वारंवार कापणे खरंच गरजेचं आहे का?
लांब आणि निरोगी केसांसाठी अनेक जण नियमितपणे केस ट्रिम करतात. केसांची टोकं कापल्याने त्यांची वाढ वेगाने होते, असं अनेकदा सांगितलं जातं. पण यात किती तथ्य आहे? आणि खरंच किती दिवसांनी केस ट्रिम करायला हवेत?
यात किती तथ्य आहे?
लांब आणि निरोगी केसांसाठी अनेक जण नियमितपणे केस ट्रिम करतात. केसांची टोकं कापल्याने केस वेगाने वाढतात, असा एक समज आहे. पण यात किती तथ्य आहे? खरं तर, केस कापल्याने त्यांची वाढ होत नाही. केस हे टाळूच्या खाली असलेल्या हेअर फॉलिकल्समधून वाढतात. त्यामुळे फक्त टोकं कापल्याने केसांची लांबी वाढत नाही. पण केस ट्रिम केल्याने दुभंगलेली टोकं आणि केस तुटण्याची समस्या नक्कीच कमी होते. यामुळे तुमचे केस निरोगी आणि सुंदर दिसतात.
किती दिवसांनी केस ट्रिम करावेत?
प्रत्येकासाठी केस कापण्याची वेळ वेगळी असते. तुमच्या केसांचा प्रकार, लांबी, स्टायलिंगच्या सवयी आणि केमिकल ट्रीटमेंटवर हे अवलंबून असतं. ज्यांना केस वाढवायचे आहेत, त्यांनी ८ ते १२ आठवड्यांतून एकदा केस ट्रिम करावेत. निरोगी केसांसाठी १० ते १२ आठवड्यांचं अंतर पुरेसं ठरतं. पण जे लोक हेअर स्ट्रेटनिंग, कर्लिंग आयर्न, ब्लीचिंग किंवा कलरिंग करतात, त्यांचे केस जास्त खराब होतात. अशा लोकांनी ६ ते ८ आठवड्यांतून एकदा केस ट्रिम करावेत. केस कोरडे, कमकुवत किंवा दुभंगलेले वाटल्यास ते लगेच ट्रिम करणं फायद्याचं ठरतं.
ट्रिम केल्यावर केस निरोगी का दिसतात?
केस विंचरणे, ऊन, हिट स्टायलिंग आणि कलरिंग यामुळे केसांची टोकं खराब होतात. यातूनच केस दुभंगायला आणि तुटायला सुरुवात होते. खराब झालेली टोकं कापून टाकल्यामुळे केस निरोगी दिसतात आणि त्यांची लांबी वाढायला मदत होते.
केस कापण्याचा कोणताही कडक नियम नाही
केस लांब वाढवायचे असतील, तर दर तीन महिन्यांनी ते कापलेच पाहिजेत, असा कोणताही नियम नाही. साधारणपणे १० ते १२ आठवड्यांतून एकदा केस ट्रिम करावेत, हा एक ढोबळ नियम आहे. तुमच्या केसांची टोकं निरोगी असतील, तर तुम्ही आणखी काही काळ थांबू शकता. पण केस दुभंगलेले किंवा तुटलेले दिसल्यास ते ट्रिम करणं केव्हाही चांगलं. नेहमी लक्षात ठेवा, केस कापल्याने त्यांची वाढ होत नाही, तर फक्त त्यांची लांबी टिकवून ठेवायला मदत होते.
