हवेमुळे नरम झालेली बिस्किटे फेकून देण्याऐवजी पॅन, फ्रिज, तांदूळ किंवा हेअर ड्रायरचा वापर करून तुम्ही त्यांना पुन्हा कुरकुरीत करू शकता. तसेच, हवाबंद डब्यात टिश्यू पेपर ठेवून बिस्किटे सादळण्यापासून वाचवता येतात.
मुंबई : घरात लहान मुले असली की बिस्किटे लागतातच. भारतीयांची सकाळ-संध्याकाळची चहा तर पार्ले बिस्किटांशिवाय अपूर्णच असते. त्यामुळे शॉपिंग करताना बिस्किटांचे पुडे हमखास आणले जातात. मोठा पुडा फोडला की चहासोबत ताजी बिस्किटे खाल्ली जातात. पण दुसऱ्या दिवशी उरलेली बिस्किटे हवेमुळे सादळतात (मऊ पडतात). मऊ झालेली बिस्किटे खायला कुणालाच आवडत नाहीत, विशेषतः मुले तर ती अजिबात खात नाहीत. त्यामुळे अनेक पालक ही बिस्किटे खराब झाली असे समजून फेकून देतात.
बिस्किटे मऊ का पडतात? आणि ती पुन्हा कुरकुरीत कशी करायची? या सोप्या ट्रिक्स समजल्या तर तुम्ही नरम झालेली बिस्किटे कधीच फेकून देणार नाही. ती पुन्हा कुरकुरीत कशी करायची ते आपण पाहूया.
बिस्किटे सादळली तर काय करावे?
सामान्यतः बिस्किटांचा पुडा उघडला की त्यात हवा जाते. हवेच्या संपर्कात आल्याने बिस्किटे मऊ पडतात. पण अशी बिस्किटे फेकून देण्याऐवजी मायक्रोवेव्ह, पॅन किंवा एअर फ्रायरचा वापर करून तुम्ही ती एका मिनिटात पुन्हा कुरकुरीत करू शकता. स्वयंपाकघरातील या सोप्या ट्रिक्स नक्की जाणून घ्या.
Related Articles
सादळलेली बिस्किटे कुरकुरीत करण्यासाठी हे करा
तुमच्याकडे मायक्रोवेव्ह नसेल तर तुम्ही गॅसचा वापर करू शकता. सर्वात आधी गॅसवर जाड बुडाचा पॅन किंवा नॉन-स्टिक तवा ठेवा. आता तो मंद आचेवर गरम करा. बिस्किटे थेट पॅन किंवा तव्यावर ठेवा. गॅसची आच मंदच ठेवा, नाहीतर बिस्किटे खालून करपतील. बिस्किटे दोन्ही बाजूंनी आलटून-पालटून शेकून घ्या. १-२ मिनिटे असेच भाजून घ्या आणि गॅस बंद करा. बिस्किटे थंड झाल्यावर ती पुन्हा एकदम कुरकुरीत होतील.
गरम न करता बिस्किटे कुरकुरीत कशी करायची?
यासाठी आणखी एक भन्नाट ट्रिक आहे. तुम्हाला हे थोडे विचित्र वाटेल किंवा 'अरे, हे आपल्याला आधी कसं सुचलं नाही' असंही वाटेल. पण ही पद्धत खूप प्रभावी आहे. फ्रिजमधील हवा कोरडी असते, जी ओलावा शोषून घेते. सादळलेली बिस्किटे एका टिश्यू पेपरमध्ये गुंडाळा. त्यानंतर ती एका हवाबंद डब्यात किंवा झिप-लॉक बॅगमध्ये ठेवा आणि १ ते २ तासांसाठी फ्रीजरमध्ये ठेवून द्या. फ्रिजमधील थंडी बिस्किटांमधला सगळा ओलावा शोषून घेईल. यामुळे बिस्किटे गरम न करताच पुन्हा कुरकुरीत होतील.
तुम्हाला बिस्किटे गरम करायची नसतील तर आणखी एक सोपा घरगुती उपाय आहे. एक काचेचा किंवा प्लास्टिकचा हवाबंद डबा घ्या. त्याच्या तळाशी १ ते २ चमचे तांदूळ टाका. त्यावर एक टिश्यू पेपर ठेवा आणि मग तुमची सादळलेली बिस्किटे त्यात ठेवा. डब्याचं झाकण घट्ट लावा. तांदळामध्ये नैसर्गिकरित्या ओलावा शोषून घेण्याचा गुणधर्म असतो. रात्रभर हा डबा असाच ठेवल्यास तांदूळ बिस्किटांमधला सगळा ओलावा शोषून घेईल. सकाळी डबा उघडल्यावर तुम्हाला बिस्किटे पुन्हा कुरकुरीत झालेली दिसतील.
हेअर ड्रायरचा वापर करूनही बिस्किटे कुरकुरीत करता येतात
मऊ पडलेली बिस्किटे पुन्हा कुरकुरीत करण्यासाठी तुम्ही हेअर ड्रायरचाही वापर करू शकता. एका स्वच्छ ताटात बिस्किटे पसरवून ठेवा. हेअर ड्रायर 'हॉट एअर' (गरम हवा) मोडवर सेट करा आणि १ ते २ मिनिटे बिस्किटांवर गरम हवा मारा. गरम हवा लागताच बिस्किटांमधील ओलावा लगेच उडून जाईल. थोडा वेळ ती तशीच राहू द्या, बिस्किटे पुन्हा कुरकुरीत होतील.
बिस्किटे सादळू नयेत म्हणून पुडा फोडल्याबरोबर ती एका स्वच्छ आणि पूर्णपणे कोरड्या काचेच्या डब्यात भरून ठेवा. काचेच्या डब्यात बिस्किटे ठेवण्यापूर्वी तळाशी एक टिश्यू पेपर नक्की ठेवा. यामुळे डब्यात ओलावा जमा होत नाही. आणखी एक महत्त्वाची गोष्ट म्हणजे, फरसाण किंवा इतर स्नॅक्स आणि बिस्किटे कधीही एकाच डब्यात एकत्र ठेवू नका, कारण यामुळे दोन्ही पदार्थ लवकर खराब होऊ शकतात.
