इच्छादेवी मंदिर: हे मंदिर तब्बल ४५० वर्षे जुने आहे. ज्या जोडप्यांना मूलबाळ नाही, ते इथे येऊन दर्शन घेतात. देवीच्या आशीर्वादाने त्यांना लवकरच अपत्यप्राप्ती होते, अशी इथली श्रद्धा आहे. हे अत्यंत जागृत देवस्थान मानलं जातं. हे मंदिर नेमकं कुठे आहे आणि याचं महत्त्व काय? जाणून घ्या सविस्तर माहिती.
४५० वर्षांचा इतिहास असलेलं इच्छादेवी मंदिर!
मध्य प्रदेशातील बऱ्हाणपूर जिल्ह्यात इच्छादेवी मातेचं एक अतिशय प्राचीन मंदिर आहे. हे मंदिर सुमारे ४५० वर्षे जुने असून, ते भाविकांच्या श्रद्धेचं मोठं केंद्र आहे. या मंदिराला ऐतिहासिक आणि धार्मिक महत्त्व आहे. वर्षभर इथे भाविकांची वर्दळ असते. विशेषतः शारदीय नवरात्रीत तर इथे भक्तांचा महासागरच लोटतो. फक्त मध्य प्रदेशातूनच नाही, तर महाराष्ट्र आणि गुजरातमधूनही लाखो भाविक देवीच्या दर्शनासाठी इथे येतात.
अपत्यप्राप्तीची प्रबळ श्रद्धा
या मंदिराबाबत स्थानिक भागात अनेक आख्यायिका आणि धार्मिक श्रद्धा आहेत. असं सांगितलं जातं की, भोसकुटे सरकार यांनी या मंदिराची उभारणी केली होती. देवीच्या कृपेने त्यांना अपत्यप्राप्ती झाली होती, अशी इथली मान्यता आहे. तेव्हापासूनच मूलबाळ होण्यासाठी देवीला साकडं घालणाऱ्या भाविकांची संख्या वाढत गेली. आजही अनेक जोडपी अपत्यप्राप्तीचा नवस घेऊन देवीच्या दरबारात येतात. मनापासून पूजाअर्चा करून आपली इच्छा पूर्ण व्हावी, अशी ते प्रार्थना करतात.
नवस फेडण्यासाठी देवीला साडी अर्पण!
इथे येणारे भाविक आपल्या मनातील इच्छा पूर्ण व्हावी म्हणून देवीला नवस बोलतात. अगदी खऱ्या मनाने देवीची भक्ती केली, तर ती नक्की पावते, असा भक्तांचा ठाम विश्वास आहे. नवस पूर्ण झाल्यानंतर भाविक पुन्हा मंदिरात येतात आणि कृतज्ञता म्हणून देवीला चुनरी किंवा साडी अर्पण करतात. याच प्रबळ श्रद्धेमुळे या मंदिराची ख्याती फक्त आजूबाजूच्या परिसरापुरती मर्यादित राहिलेली नाही, तर ती इतर राज्यांमध्येही पोहोचली आहे. अगदी दूरवरून लोक देवीच्या दर्शनासाठी इथे हजेरी लावतात.
नवरात्रीत भरते भव्य जत्रा
शारदीय नवरात्रीच्या काळात इच्छादेवी माता मंदिर परिसरात एका भव्य जत्रेचं आयोजन केलं जातं. या नऊ दिवसांत सकाळपासून संध्याकाळपर्यंत भाविकांची अखंड रांग पाहायला मिळते. देवीचं दर्शन घेऊन लोक आपल्या कुटुंबाच्या सुख, शांती आणि समृद्धीसाठी प्रार्थना करतात. तब्बल ४५० वर्षांचा इतिहास असलेलं हे मंदिर आजही लोकांची श्रद्धा, भक्ती आणि धार्मिक परंपरेचं जिवंत प्रतीक आहे. देवीचं दर्शन घेण्यासाठी आणि नवस बोलण्यासाठी दूरवरून येणारे भाविक, हेच या मंदिराचं सर्वात मोठं वैशिष्ट्य आहे.
