Telegram Ban: देशभरात टेलिग्रामवर बंदी! सरकारचा मोठा निर्णय, जाणून घ्या कारण
Telegram Ban: NEET-UG 2026 ची फेरपरीक्षा जवळ आली असताना, परीक्षेतील गैरप्रकार आणि खोट्या बातम्या रोखण्यासाठी भारत सरकारने एक मोठा निर्णय घेतला आहे. सरकारने टेलिग्राम (Telegram) ॲपवर तात्पुरती बंदी घातली आहे.
बंदी का घातली?
येत्या 21 जून रोजी होणाऱ्या नीट फेरपरीक्षेच्या पार्श्वभूमीवर, सोशल मीडिया आणि मेसेजिंग ॲप्सवरून पेपर फुटल्याच्या अफवा पसरल्या होत्या. यामुळे विद्यार्थ्यांमध्ये भीतीचे वातावरण निर्माण झाले. विशेषतः टेलिग्रामवरील काही ग्रुप्स बनावट प्रश्नपत्रिका दाखवून विद्यार्थ्यांकडून पैसे उकळत होते. हे टाळण्यासाठी, राष्ट्रीय परीक्षा एजन्सीच्या (NTA) शिफारशीवरून, केंद्रीय इलेक्ट्रॉनिक्स आणि माहिती तंत्रज्ञान मंत्रालयाने माहिती तंत्रज्ञान कायद्याच्या कलम 69A अंतर्गत ही बंदी लागू केली आहे. बंदीचा कालावधी - टेलिग्राम ॲपवर बंदी: 22 जून 2026 पर्यंत भारतात टेलिग्राम ॲप बंद राहील. परीक्षेचा दिवस आणि त्यानंतरचे काही दिवस लक्षात घेऊन ही तात्पुरती बंदी घालण्यात आली आहे. - एडिट (Edit) सुविधेवर बंदी: टेलिग्रामवर आधीच पाठवलेले मेसेज एडिट करण्याची सुविधा 30 जूनपर्यंत बंद करण्यात आली आहे.
मुख्य कारण - फसवणुकीचा फंडा
परीक्षा झाल्यानंतर प्रश्नपत्रिका हातात घेऊन काही घोटाळेबाज जुने मेसेज एडिट करतात. त्यात ते प्रश्नपत्रिका अपलोड करतात आणि मेसेजची वेळ (timestamp) बदलतात. यामुळे, परीक्षा होण्यापूर्वीच त्यांच्याकडे प्रश्नपत्रिका होती, असा बनाव करून ते विद्यार्थ्यांकडून पैसे उकळतात. ही फसवणूक थांबवण्यासाठीच 'एडिट' सुविधा बंद केली आहे. राष्ट्रीय परीक्षा एजन्सीचे स्पष्टीकरण - NTA ने ठामपणे सांगितले आहे की, कोणताही पेपर फुटलेला नाही आणि हा निव्वळ घोटाळा आहे. - या बंदीमुळे लोकांना होणाऱ्या त्रासाबद्दल एजन्सीने दिलगिरी व्यक्त केली आहे. पण, परीक्षा प्रामाणिकपणे आणि सुरक्षितपणे पार पडावी, हाच या निर्णयामागील मुख्य उद्देश असल्याचेही स्पष्ट केले आहे. - विद्यार्थ्यांनी अफवांवर विश्वास ठेवू नये आणि केवळ अधिकृत माहितीसाठी परीक्षा एजन्सीच्या वेबसाइटला भेट द्यावी, असा सल्ला देण्यात आला आहे. नीट परीक्षेची तयारी करणाऱ्या विद्यार्थ्यांनी अशा अफवांकडे दुर्लक्ष करून आपल्या अभ्यासावर लक्ष केंद्रित करावे. काही शंका असल्यास, राष्ट्रीय सायबर गुन्हेगारी हेल्पलाइन क्रमांक (1930) किंवा NTA च्या अधिकृत हेल्पलाइन क्रमांकावर संपर्क साधावा.
