राहुल गांधी यांनी चक्क मृतांसोबत घेतला चहा, वाचा दिल्लीत नेमके काय घडले
नवी दिल्ली- कॉंग्रेस नेते आणि खासदार राहुल गांधींनी मतदार यादीत 'मेलेले' म्हणून नोंदवलेल्या लोकांसोबत चहा घेतला. निवडणूक आयोगाच्या चुकांवर बोट ठेवत त्यांनी पीडितांशी संवाद साधला. वाचा नेमके काय घडले.
निवडणूक आयोगाचे आभार मानले
काँग्रेस नेते राहुल गांधी यांनी बुधवारी एक व्हिडिओ सोशल मीडियावर शेअर केला. या व्हिडिओमध्ये ते मतदार यादीत 'मेलेले' म्हणून नोंदवलेल्या पण जिवंत असलेल्या मतदारांशी संवाद साधताना दिसत आहेत. या अनोख्या अनुभवाबद्दल त्यांनी निवडणूक आयोगाचे आभार मानले.
“आयुष्यात अनेक रंजक अनुभव आले. पण 'मेलेल्यां'सोबत चहा पिण्याची संधी कधीच मिळाली नव्हती. या अनोख्या अनुभवाबद्दल निवडणूक आयोगाचे आभार!”, असं त्यांनी एक्सवर पोस्ट केलं.
मी ऐकलं की तुम्ही जिवंत नाही
व्हिडिओमध्ये, राहुल गांधी मतदार यादीत 'मेलेले' म्हणून नोंदवलेल्या लोकांशी बोलताना दिसत आहेत. ते लोक जिवंत असल्याचं सांगतात. “मी ऐकलं की तुम्ही जिवंत नाहीत. निवडणूक आयोगाने तुम्हाला मारलंय,” अशी मिश्किल टिप्पणी राहुल गांधी करतात. हे कसं कळलं असं विचारल्यावर, ते लोक निवडणूक आयोगाच्या मतदार यादीतून कळल्याचं सांगतात.
सहा तास वाट बघितली
एकाच पंचायतीमध्ये कमीत कमी ५० लोकांना या गोंधळाचा फटका बसल्याचं एका व्यक्तीने राहुल गांधींना सांगितलं. राष्ट्रीय जनता दलाचे (RJD) नेते तेजस्वी यादव यांच्या मतदारसंघात अनेक जिवंत मतदारांना निवडणूक आयोगाच्या यादीत मेलेले दाखवल्याचा आरोपही त्यांनी केला.
याबाबत आपल्याकडे लेखी पुरावे असल्याचं आणि काही जणांना आपला मतदानाचा हक्क मिळवण्यासाठी सर्वोच्च न्यायालयात सहा तास वाट पाहावी लागल्याचंही त्यांनी सांगितलं.
या प्रकरणी निवडणूक आयोगाने कोणतीही माहिती दिली नसल्याचा आरोप राहुल गांधी आणि त्या लोकांनी केला. सर्व राजकीय नेत्यांनी एकत्र येऊन या चुका दुरुस्त कराव्यात आणि 'बिहारला वाचवायला' मदत करावी, अशी विनंतीही त्यांनी केली.
'भयंकर मतदान चोरी'
विरोधी पक्ष, विशेषतः राहुल गांधी, मतदार यादीतील फेरफारबद्दल निवडणूक आयोगावर सातत्याने टीका करत असताना हा व्हिडिओ समोर आला आहे. विशेषतः, बिहारमध्ये होणाऱ्या विशेष तीव्र सुधारणा (Special Intensive Revision - SIR) मोहिमेच्या संदर्भात ते बोलत आहेत.
७ ऑगस्ट रोजी, राहुल गांधींनी मतदार यादीत बनावट मतदारांची नावं जोडल्याचा आरोप केला होता. कर्नाटकातील मतदार यादीचा दाखला देत त्यांनी हा आरोप सिद्ध करण्याचा प्रयत्न केला. बंगळुरू मध्य लोकसभा मतदारसंघातील महादेवपुरा विधानसभा मतदारसंघात 'भयंकर मतदान चोरी' झाल्याचा आरोप राहुल गांधींनी केला. मात्र, निवडणूक आयोगाने हे आरोप फेटाळून लावले.
राहुल गांधी आणि इतर विरोधी पक्ष नेत्यांचे आरोप खोटे असून ते लोकांना चुकीच्या मार्गाने नेत आहेत, असं निवडणूक आयोग सातत्याने म्हणत असल्याचं लक्षात घ्यायला हवं.
