दिल्लीहून चेन्नईला जाणाऱ्या इंडिगो विमानात अचानक पॉवर बँकचा स्फोट झाला आणि आग लागली. प्रवासी आणि क्रू मेंबर्सनी वेळीच आग विझवल्याने मोठा अनर्थ टळला. सुरक्षेचा उपाय म्हणून विमान हैदराबादमध्ये सुखरूप उतरवण्यात आले असून सर्व प्रवासी सुरक्षित आहेत.
हैदराबाद: दिल्लीहून चेन्नईला जाणाऱ्या इंडिगो विमानात एका पॉवर बँकचा स्फोट झाला आणि लगेज कंपार्टमेंटमध्ये आग लागली. हवेतच हा प्रकार घडल्याने मोठी खळबळ उडाली. सुरक्षेचा मोठा धोका लक्षात घेऊन वैमानिकाने हे विमान तातडीने हैदराबादकडे वळवले आणि तिथे त्याचे सुरक्षित लँडिंग केले.
विमानाच्या ओव्हरहेड लगेज कंपार्टमेंटमध्ये ठेवलेल्या पॉवर बँकमध्ये बिघाड झाल्याने ही आग लागली. या घटनेचा एक थरारक व्हिडिओ एका प्रवाशाने आपल्या मोबाईलवर रेकॉर्ड केला आहे. या व्हिडिओमध्ये काही प्रवासी स्वतःच्या बॅगा मारून आग विझवण्याचा आटोकाट प्रयत्न करताना दिसत आहेत.
यानंतर केबिन क्रूने तातडीने धाव घेत फायर एक्स्टिंग्विशर (अग्निशामक यंत्र) वापरून आग पूर्णपणे आटोक्यात आणली. सुदैवाने या घटनेत कोणतीही जीवितहानी झाली नसून, विमानातील सर्व प्रवासी आणि कर्मचारी पूर्णपणे सुरक्षित असल्याचे अधिकाऱ्यांनी स्पष्ट केले आहे.
