पंतप्रधान नरेंद्र मोदींनी काँग्रेसवर जोरदार निशाणा साधला आहे. चार राज्यांच्या विधान परिषद (MLC) निवडणुकीत काँग्रेसचा जो दारुण पराभव झाला, त्यावरून मोदींनी त्यांना टोला लगावला. बॅलेट पेपरवर मतदान होऊनही काँग्रेसला एकही जागा जिंकता आली नाही, यावर बोट ठेवत मोदींनी खिल्ली उडवली आहे.
पंतप्रधान नरेंद्र मोदींनी काँग्रेसवर जोरदार निशाणा साधला आहे. चार राज्यांच्या विधान परिषद (MLC) निवडणुकीत काँग्रेसचा जो दारुण पराभव झाला, त्यावरून मोदींनी त्यांना टोला लगावला. बॅलेट पेपरवर मतदान होऊनही काँग्रेसला एकही जागा जिंकता आली नाही, यावर बोट ठेवत मोदींनी खिल्ली उडवली आहे. मोदींनी त्यांच्या पोस्टमध्ये एका 'विचार करणाऱ्या चेहऱ्याचा' (thinking face) इमोजी वापरून काँग्रेसच्या जखमेवर मीठ चोळलं आहे. मोदींनी लिहिलंय, "४ मोठी राज्ये - उत्तर प्रदेश, महाराष्ट्र, बिहार आणि कर्नाटकमधील २८ जागांवर विधान परिषदेची निवडणूक झाली. ही निवडणूक बॅलेट पेपरवर पार पडली. सांगा बरं, काँग्रेसने किती जागा जिंकल्या?"
हा 'थिंकिंग फेस' इमोजी सहसा कुतूहल, बारकाईने केलेलं निरीक्षण, प्रश्नार्थक दृष्टिकोन किंवा शंका व्यक्त करण्यासाठी वापरला जातो. या प्रकरणात, विधान परिषद निवडणुकीत काँग्रेसचा झालेला सुपडासाफ आणि त्यांना एकही जागा न मिळण्याच्या मुद्द्यावरून त्यांची खिल्ली उडवण्यासाठी पंतप्रधान मोदींनी हा इमोजी वापरला आहे.
काँग्रेसला एकही जागा मिळाली नाही
उत्तर प्रदेश, बिहार, महाराष्ट्र आणि कर्नाटकमधील विधान परिषदेच्या एकूण २८ जागांवर झालेल्या निवडणुकीच्या निकालावरून आता राजकीय आरोप-प्रत्यारोप सुरू झाले आहेत. काँग्रेसने १२ जागांवर निवडणूक लढवली होती. यापैकी चार जागा आधी त्यांच्याकडे होत्या. पण यंदाच्या निवडणुकीत पक्षाला एकाही जागेवर विजय मिळवता आला नाही. सर्वात मोठा धक्का कर्नाटकमध्ये बसला आहे. तिथे सत्तेत असूनही काँग्रेसला चारपैकी एकही जागा जिंकता आली नाही. भाजपने तीन जागा राखल्या आणि त्यांचा मित्रपक्ष जेडी(एस) ने बंगळुरू टीचर्स मतदारसंघ काँग्रेसकडून हिरावून घेतला.
बॅलेट पेपरवरून राजकीय वाद का?
ईव्हीएम (EVM) द्वारे होणाऱ्या मतदानावर काँग्रेससह इतर विरोधी पक्षांनी आक्षेप घेतला होता. याच पार्श्वभूमीवर बॅलेट पेपरवर झालेल्या या निवडणुकीच्या निकालाचा भाजपने हत्यार म्हणून वापर केला आहे. भविष्यात सर्व निवडणुका ईव्हीएमऐवजी बॅलेट पेपरवर घ्याव्यात, अशी मागणी काँग्रेस आणि इतर विरोधी पक्ष करत आहेत. भाजपच्या फायद्यासाठी ईव्हीएममध्ये फेरफार केला जातो आणि मतं चोरली जातात, असा त्यांचा आरोप आहे. या निवडणूक प्रक्रियेतील कथित गैरप्रकारांविरोधात ते देशभरात निदर्शने करत आहेत आणि मुख्य निवडणूक आयुक्त ज्ञानेश कुमार यांच्या राजीनाम्याची मागणी करत आहेत. पंतप्रधान मोदींच्या टोलेबाजीचा मुख्य रोख याच मुद्द्यावर आहे—बॅलेट पेपरवर मतदान होऊनही काँग्रेसने किती जागा जिंकल्या, असा सवाल करत त्यांनी विरोधकांना लक्ष केलं आहे.
