LPG New Rules : आजपासून गॅस सिलेंडर बुकिंगचे नियम बदलले आहेत का? कोणाचे गॅस कनेक्शन कट होऊ शकते? OTP शिवाय सिलेंडर मिळणार नाही का? सरकारने गॅस सिलेंडरबाबत कोणते ५ मोठे नियम बदलले आहेत आणि त्याचा तुम्हाला फायदा होईल की तोटा? जाणून घ्या.
LPG Cylinder New Rules : तुमच्या घरी इंडेन (Indane), एचपी (HP) किंवा भारत गॅसचा (Bharat Gas) सिलेंडर येतो का? मग ही बातमी तुमच्यासाठी खूप महत्त्वाची आहे. कारण आज, १ जून २०२६ पासून, सरकारने घरगुती गॅस सिलेंडरबद्दल काही मोठे आणि कडक नियम लागू केले आहेत. सोशल मीडियावर सिलेंडर बुकिंगच्या दिवसांबद्दल अनेक अफवा पसरल्या आहेत, पण सरकारने खऱ्या नियमांची यादी जाहीर केली आहे. त्यामुळे नक्की कोणते नियम बदलले आहेत, कोणते नाही, कोणी जास्त काळजी घ्यायला हवी आणि कोणत्या चुकांमुळे तुमचं गॅस कनेक्शन कायमचं बंद होऊ शकतं, हे जाणून घेणं गरजेचं आहे. चला तर मग पाहूया, आजपासून सिलेंडर बुकिंगवर काय परिणाम होणार आहे...
सिलेंडर रिफिलच्या नियमांमध्ये कोणताही बदल नाही
सगळ्यात आधी सोशल मीडियावर पसरलेल्या एका अफवेबद्दल बोलूया. अनेक ठिकाणी असा दावा केला जात होता की, सरकार सिलेंडर बुक करण्याच्या दिवसांमध्ये (उदा. २५ किंवा ३५ दिवसांचं अंतर) बदल करणार आहे. पण पेट्रोलियम मंत्रालयाने हे स्पष्ट केलं आहे की, घरगुती एलपीजी सिलेंडरच्या रिफिलिंगच्या नियमांमध्ये कोणताही बदल झालेला नाही. जुनेच नियम लागू राहतील. ग्रामीण भागांसाठी सिलेंडर पुन्हा बुक करण्यासाठी २५ दिवसांचा नियम पूर्वीप्रमाणेच असेल. तर शहरी भागांसाठी ४५ दिवसांचा जुना नियमच कायम राहील. त्यामुळे दिवसांच्या अंतराबाबत कोणत्याही अफवांवर विश्वास ठेवू नका.
LPG बाबत १ जूनपासून लागू झालेले हे ५ मोठे बदल
१. या कारणामुळे तुमचं LPG कनेक्शन कट होईल
Related Articles
तुमच्या परिसरात जर पाइपने गॅस (PNG) पोहोचला असेल आणि तुम्ही अजूनही सिलेंडर वापरत असाल, तर तुमच्या अडचणी वाढू शकतात. सरकारने मार्चमध्ये एक आदेश काढला होता, त्यानुसार PNG सुविधा असलेल्या भागांतील लोकांना ३ महिन्यांच्या आत पाइप गॅसवर शिफ्ट व्हायचं होतं. याची मुदत जूनमध्ये संपत आहे. जर तुम्ही अजूनही शिफ्ट झाला नसाल, तर तुमचं जुनं LPG कनेक्शन आपोआप ब्लॉक किंवा बंद होऊ शकतं.
२. एक घर, एक गॅस कनेक्शन (One Household, One Connection)
सरकारी तेल कंपन्या आता 'एक घर, एक गॅस' या धोरणाची कठोरपणे अंमलबजावणी करत आहेत. कंपन्यांनी अशा ग्राहकांना शोधायला सुरुवात केली आहे, ज्यांच्या घरात LPG सिलेंडर आणि पाइपने येणारा PNG गॅस दोन्ही सुरू आहे. गॅसचा काळाबाजार रोखण्यासाठी अशा लोकांना मेसेज पाठवून जुनं LPG कनेक्शन सरेंडर करण्यास सांगितलं जात आहे.
३. नवीन कनेक्शन किंवा रिफिलवर बंदी
तुमच्याकडे आधीपासूनच PNG कनेक्शन असेल, तर तुम्हाला कोणत्याही कंपनीकडून नवीन LPG सिलेंडरचं कनेक्शन घेता येणार नाही. इतकंच नाही, तर अशा ग्राहकांना सिलेंडर रिफिल करण्याची सुविधाही मिळणार नाही. देशातील गॅसची टंचाई दूर करण्यासाठी हे पाऊल उचलण्यात आलं आहे.
४. PNG मिळाल्यानंतर फक्त ३० दिवसांची मुदत
सरकारने अलीकडेच नियमांमध्ये थोडा बदल करून दिलासाही दिला आहे. नवीन नियमानुसार, तुमच्या घरात पाइपने नॅचरल गॅस (PNG) सुरू झाल्यावर, तुम्हाला तुमचं जुनं LPG कनेक्शन बंद करण्यासाठी ३० दिवसांचा वेळ मिळेल. पण, भविष्यात कधी गरज पडल्यास तुम्ही हे कनेक्शन पुन्हा सुरू करू शकाल.
५. आता OTP शिवाय गॅस सिलेंडर मिळणार नाही
गॅस डिलिव्हरीमध्ये पूर्णपणे पारदर्शकता आणण्यासाठी आता ओटीपी (OTP) आधारित डिलिव्हरी अनिवार्य करण्यात आली आहे. जेव्हा डिलिव्हरी बॉय तुमच्या घरी सिलेंडर घेऊन येईल, तेव्हा तुमच्या रजिस्टर्ड मोबाइल नंबरवर एक कोड (OTP) येईल. तो कोड दिल्यानंतरच तुम्हाला सिलेंडर दिला जाईल. याशिवाय, तुम्हाला लांब रांगेत उभं राहावं लागू नये, यासाठी सरकार आता डिजिटल आणि ऑनलाइन बुकिंगला (उदा. ॲप्स किंवा वेबसाइटद्वारे) प्रोत्साहन देत आहे.
