दिल्लीच्या साकेत कोर्टाने ऑलिम्पिक बॉक्सर मेरी कोमला मानहानीच्या एका प्रकरणात नोटीस बजावली आहे. तिचा माजी पती करोंग ओन्खोलर याने हा दावा दाखल केला असून, ११ जानेवारी २०२६ रोजी एका टीव्ही मुलाखतीत तिने आपली जाणीवपूर्वक बदनामी केल्याचा आरोप त्याने केला आहे.
Mary Kom Defamation Case: मेरी कोमला साकेत कोर्टाची नोटीस, माजी पतीने ठोकला मानहानीचा दावा
नवी दिल्ली [भारत], २० नोव्हेंबर (ANI): दिल्लीच्या साकेत कोर्टाने शुक्रवारी प्रसिद्ध बॉक्सर मेरी कोमला तिच्या माजी पतीने दाखल केलेल्या मानहानीच्या तक्रारीवरून नोटीस बजावली आहे. एका टीव्ही मुलाखतीदरम्यान मेरीने आपली प्रतिमा मलिन करण्याच्या उद्देशाने खोटी आणि बदनामीकारक विधाने केल्याचा आरोप तिच्या माजी पतीने केला आहे.
प्रथमवर्ग न्यायदंडाधिकारी (JMFC) शिवम गुप्ता यांनी हे समन्स काढण्यापूर्वीचे पुरावे नोंदवून घेत मेरी कोमला तिची बाजू मांडण्याची संधी दिली आहे. या प्रकरणाची पुढील सुनावणी २१ डिसेंबरला होणार असून, त्यात तिला उत्तर द्यायचे आहे. सुनावणीदरम्यान, कोर्टाने तक्रारदार आणि इतर तीन साक्षीदारांचे जबाब नोंदवून घेतले. अॅडव्होकेट आकाश कृष्णा आणि प्रगती शर्मा यांच्यामार्फत तक्रारदाराने कोर्टात धाव घेतली आहे.
कुठं केली तक्रार
तक्रारदार करोंग ओन्खोलर याने आपल्या याचिकेत म्हटले आहे की, १२ मार्च २००५ रोजी त्याचे मेरी कोमसोबत लग्न झाले होते. ते दोघे फरिदाबादमध्ये एकत्र राहत होते. त्यानंतर २० डिसेंबर २०२३ रोजी प्रथेनुसार त्यांचा कायदेशीर घटस्फोट झाला. त्याने असाही दावा केला की, लग्नापूर्वी आणि लग्नानंतरही त्याने मेरीच्या बॉक्सिंग करिअरला पाठिंबा देण्यासाठी स्वतःच्या करिअरचा त्याग केला होता. मेरी कोम ही आंतरराष्ट्रीय पातळीवरील चॅम्पियन आणि खूप मोठी फॅन फॉलोइंग असलेली सार्वजनिक व्यक्ती आहे. याचिकेत आरोप केलाय की, घटस्फोटानंतर ११ जानेवारी २०२६ रोजी ती एका टीव्ही कार्यक्रमात पाहुणी म्हणून गेली होती. तिथे प्रेक्षकांसमोर दिलेल्या मुलाखतीत तिने हेतुपुरस्सर आपली बदनामी केली, ज्यामुळे समाजात आपली नाचक्की होईल हे तिला माहीत होते. तक्रारदाराच्या मते, मेरीच्या वक्तव्यांवरून असा अर्थ निघतो की तो लबाड, बेरोजगार, पैशांवर जगणारा आणि दारूच्या आहारी गेलेला व्यक्ती आहे, ज्याने तिच्या बँक खात्यातील पैसे हडप केले आणि मुलांची जबाबदारी झटकली. या आरोपामुळे एक जोडीदार आणि पालक म्हणून आपली प्रतिमा अत्यंत मलीन झाल्याचे त्याने म्हटले आहे. हे कृत्य भारतीय न्याय संहिता (BNS), २०२३ च्या कलम ३५६ अंतर्गत गुन्हा असल्याचे या याचिकेत नमूद करण्यात आले आहे. (ANI)















