पश्चिम बंगालच्या माजी मुख्यमंत्री आणि तृणमूल नेत्या ममता बॅनर्जी यांचा पारा चांगलाच चढल्याचं दिसलं. त्यांनी आपल्या घराबाहेर जमलेल्या गर्दीतील एका व्यक्तीच्या थेट कानशिलात लगावली. ही संपूर्ण घटना कॅमेऱ्यात कैद झाली आहे. बारुईपूर घटनेच्या निषेधार्थ बुधवारी कालीघाट तृणमूल काँग्रेसने एक मोर्चा काढला होता, ज्यानंतर मोठा गोंधळ उडाला.
कोलकाता : पश्चिम बंगालच्या माजी मुख्यमंत्री आणि तृणमूल काँग्रेसच्या नेत्या ममता बॅनर्जी यांनी संतापाच्या भरात एका व्यक्तीच्या कानशिलात लगावली. ही घटना त्यांच्या घराबाहेरच घडली आणि याचा व्हिडिओ मीडियाच्या कॅमेऱ्यात कैद झाला आहे. झालं असं की, बारुईपूर घटनेच्या निषेधार्थ बुधवारी कालीघाट तृणमूल काँग्रेसने शहरात एक मोर्चा काढला होता. या मोर्चानंतर प्रचंड गोंधळ आणि अशांतता निर्माण झाली. त्यांच्या हरीश चॅटर्जी स्ट्रीटवरील घराबाहेरही परिस्थिती तणावपूर्ण झाली होती. त्यावेळी ममता स्वतः घराबाहेर आल्या आणि गर्दीला नियंत्रित करण्याचा प्रयत्न करू लागल्या. त्यांनी दोन्ही हातांनी लोकांना बाजूला होण्याचा इशारा केला. पण तरीही गोंधळ सुरूच होता. अनेक लोक तिथून हटायला तयार नव्हते. त्याचवेळी ममतांनी एका व्यक्तीच्या कानशिलात लगावली.
भाजपाच्या चोर चोरच्या घोषणा
बारुईपूर घटनेच्या निषेधार्थ दक्षिण कोलकात्यात कालीघाट तृणमूल काँग्रेसच्या मोर्चावेळी तणाव निर्माण झाला. बालीगंज फाडी येथून मोर्चा सुरू झाल्यावर भाजपने 'चोर-चोर' अशा घोषणा दिल्या. त्याला प्रत्युत्तर म्हणून तृणमूल कार्यकर्त्यांनी 'जय बांगला'च्या घोषणांनी परिसर दणाणून सोडला.
Related Articles
भाजप-तृणमूल कार्यकर्त्यांची झटापट
भाजप आणि तृणमूल कार्यकर्त्यांमध्ये झटापटही झाली. परिस्थिती नियंत्रणात आणण्यासाठी केंद्रीय दलांनी लाठीचार्ज केला. या घटनेवरून ममतांनी भाजप आणि पोलिसांवर निशाणा साधला. तृणमूलच्या कार्यकर्त्यांना बेदम मारहाण झाल्याचा आरोप पक्षाने केला आहे.
ममता यांचा गर्दीला शांत करण्याचा प्रयत्न
नंतर ममता बॅनर्जी कालीघाटमधील आपल्या घरातून बाहेर आल्या. त्यावेळी घराबाहेर मोठी गर्दी जमली होती. तृणमूल नेत्या गर्दीला शांत करण्याचा प्रयत्न करत होत्या. पण गोंधळ इतका वाढला की त्यांचा तोल सुटला. त्यांनी हातात माईक घेऊन 'बेरो बेरो' (बाहेर व्हा, बाहेर व्हा) असं ओरडायला सुरुवात केली. 'डोन्ट डिस्टर्ब मी' असंही त्या ओरडत होत्या.
तो तृणमूलचाच कार्यकर्ता असल्याचा दावा
अचानक त्यांनी समोर उभ्या असलेल्या एका व्यक्तीच्या जोरात कानशिलात लगावली. ज्या व्यक्तीला मारहाण झाली, तो कालीघाट तृणमूलचाच एक कार्यकर्ता असल्याचा दावा केला जात आहे.
ममतांचा मानसिक तोल सुटतोय का, भाजपाचा आरोप
ममतांच्या या कृतीवर केंद्रीय मंत्री सुकांत मजुमदार यांनी प्रतिक्रिया दिली. ते म्हणाले, “सत्तेतून पायउतार झाल्यानंतर ममता मानसिकदृष्ट्या गोंधळल्या आहेत. त्यांचं हे वागणं दुर्दैवी आहे. त्यांचं मानसिक संतुलन बिघडलं आहे. बंगालच्या जनतेने आपल्याला सत्तेतून दूर केलं आहे, हे त्या अजूनही स्वीकारू शकलेल्या नाहीत.”
ममता रस्त्यावर चालत आहेत तर चालू द्या - भाजपा प्रदेशाध्यक्ष
भाजपचे प्रदेशाध्यक्ष शमिक भट्टाचार्य म्हणाले, “त्या एक राजकीय नेत्या आहेत. राज्याच्या माजी मुख्यमंत्री आहेत. हा एक लोकशाही देश आहे, इथे लोकशाही व्यवस्था आणि सरकार आहे.
सरकार काहीही बंद करत नाहीये, काही लादत नाहीये, रस्त्यावर पोलिसांचा बंदोबस्त नाही. त्या चालत आहेत, तर चालू द्या. आणि त्या तर आयुष्यभर चालतच आल्या आहेत! त्या बसून का राहतील? त्यांनी चालावं. हे त्यांच्या शरीरासाठी आणि मनासाठी चांगलं आहे. तृणमूल पक्ष आता संपला आहे. लोक त्यांच्या दाराला कुलूप लावत आहेत, लोकांनी त्यांच्या डोक्यालाच कुलूप लावलं आहे.”
