अभिषेक बॅनर्जींवर झालेला हल्ला फक्त एक विरोध होता की जीवघेणा कट? व्हायरल झालेल्या व्हिडीओमध्ये ममता बॅनर्जी हॉस्पिटलच्या CEO वर का भडकल्या? हॉस्पिटलमध्ये असं नेमकं काय घडलं ज्यामुळे तणाव इतका वाढला? भाजप नेत्यांनी दबाव टाकून अभिषेक यांना डिस्चार्ज देण्याचा प्रयत्न केला का? मेडिकल रिपोर्ट, हॉस्पिटल आणि राजकीय दावे यांमध्ये खरं काय आहे?
कोलकाता: पश्चिम बंगालच्या राजकारणात पुन्हा एकदा असा भूकंप आला आहे, ज्यामुळे सत्ताधाऱ्यांपासून ते हॉस्पिटलच्या रूमपर्यंत प्रचंड तणाव निर्माण झाला आहे. टीएमसी (TMC) खासदार अभिषेक बॅनर्जी यांच्यावर झालेला जीवघेणा हल्ला आणि त्यानंतर हॉस्पिटलमध्ये पश्चिम बंगालच्या माजी मुख्यमंत्री ममता बॅनर्जी यांनी घातलेला गोंधळ, या संपूर्ण प्रकरणाची इनसाईड स्टोरी आणि व्हायरल झालेला व्हिडीओ समोर आला आहे. हा व्हिडीओ समोर येताच राजकीय वर्तुळात अनेक प्रश्न उपस्थित झाले आहेत. हॉस्पिटलमध्ये असं नेमकं काय घडलं की ममता बॅनर्जींना जाहीरपणे आपला संताप व्यक्त करावा लागला?
सोनारपूरमध्ये राडा: हेल्मेट घालून जीव वाचवत पळाले 'भायपो'
कोलकात्याजवळील सोनारपूरचा परिसर शनिवारी अक्षरशः रणभूमी बनला होता. टीएमसीचे राष्ट्रीय सरचिटणीस आणि खासदार अभिषेक बॅनर्जी निवडणुकीनंतरच्या हिंसाचार पीडितांना भेटण्यासाठी तिथे पोहोचले होते. पुढे काय होणार आहे, याची कोणालाच कल्पना नव्हती. अचानक शेकडो लोकांच्या संतप्त जमावाने अभिषेक बॅनर्जी यांना चारही बाजूंनी घेरलं. बघता बघता जमावाने "चोर, चोर" अशा घोषणा देत त्यांच्यावर दगड, अंडी आणि शिव्यांचा वर्षाव सुरू केला. हा हल्ला इतका अनपेक्षित आणि हिंसक होता की अभिषेक बॅनर्जींच्या सुरक्षारक्षकांचीही धांदल उडाली. घाईघाईत अभिषेक यांना क्रिकेटचं हेल्मेट घालण्यात आलं. फाटलेला शर्ट आणि चेहऱ्यावर भीती अशा अवस्थेत अभिषेक बॅनर्जी आपल्या सहकाऱ्यांच्या मदतीने कसेबसे या जीवघेण्या हल्ल्यातून वाचून बाहेर पडले. माध्यमांशी बोलताना त्यांनी धापा टाकत म्हटलं, "हा सगळा भाजपचा कट आहे, त्यांना मला जीवे मारायचं होतं!"
Related Articles
हॉस्पिटलमध्ये हाय-व्होल्टेज ड्रामा: जेव्हा ममता बॅनर्जी भडकल्या
सोनारपूरमधील राड्यानंतर गंभीर जखमी झालेल्या अभिषेक बॅनर्जी यांना आधी अपोलो आणि नंतर कोलकात्याच्या प्रसिद्ध बेले व्ह्यू हॉस्पिटलमध्ये हलवण्यात आलं. शरीरात रक्ताच्या गुठळ्या झाल्यामुळे त्यांना थेट इंटेन्सिव्ह थेरपी युनिटमध्ये (ITU) दाखल करण्यात आलं, जिथे त्यांच्या 3D CT स्कॅन आणि थोरॅसिक टेस्ट केल्या जात होत्या. पण खरा सस्पेन्स तेव्हा सुरू झाला, जेव्हा हॉस्पिटलमधून एक मोबाईल व्हिडीओ व्हायरल झाला. या व्हिडीओमध्ये टीएमसीच्या सर्वेसर्वा ममता बॅनर्जी हॉस्पिटलचे सीईओ (CEO) प्रदीप टंडन यांच्यावर सर्वांसमोर प्रचंड भडकताना आणि त्यांना थेट परिणाम भोगण्याची धमकी देताना दिसल्या.
ममता बॅनर्जी हॉस्पिटल प्रशासनाला काय म्हणाल्या?
ममतांनी जेव्हा चढ्या आवाजात बोलायला सुरुवात केली, तेव्हा हॉस्पिटल परिसरात शांतता पसरली. त्या म्हणाल्या: "माफ करा मिस्टर टंडन, तुम्ही खूप चुकीचं काम केलं आहे. आम्ही तुमची किती मदत केली आहे, हे लक्षात ठेवा. देव तुम्हाला माफ करणार नाही... तुम्ही हॉस्पिटल चालवत आहात आणि भाजप सत्तेत आहे. उद्या, जर केंद्र सरकार सत्तेत नसेल, तर आम्ही बघून घेऊ."
पडद्यामागे काय घडलं: मध्यरात्री फोनवरून धमक्या?
ममता बॅनर्जींच्या या रौद्र रूपामागे आणि त्यांनी दिलेल्या उघड धमकीमागे एक मोठं कारण होतं. एका पत्रकार परिषदेत ममता बॅनर्जींनी स्वतः या रहस्यावरून पडदा उचलला. त्यांनी एक धक्कादायक आरोप करत सांगितलं की, भाजप नेते आणि एका वरिष्ठ पोलीस अधिकाऱ्याकडून (डेप्युटी कमिशनर ऑफ पोलीस, साऊथ) डॉक्टर्स आणि हॉस्पिटल प्रशासनाला सतत धमकीचे फोन येत होते. ममतांनी दावा केला की, केंद्र सरकार आणि पोलिसांच्या दबावाखाली हॉस्पिटल प्रशासन अभिषेक बॅनर्जींची प्रकृती गंभीर असूनही त्यांना जबरदस्तीने डिस्चार्ज देण्याचा प्रयत्न करत होतं. ममतांनी प्रश्न विचारला, "जर अभिषेकची प्रकृती गंभीर नव्हती, तर त्याला आयटीयूमध्ये का ठेवलं होतं? डॉक्टरांना घाबरवून सत्य लपवलं जात आहे."
घरातच थाटलं मिनी-हॉस्पिटल: आता बंद दाराआड होणार उपचार
हॉस्पिटलमध्ये वाढलेल्या या राजकीय आणि मानसिक तणावानंतर ममता बॅनर्जींनी एक मोठा निर्णय घेतला. त्यांनी बेले व्ह्यू हॉस्पिटलच्या डॉक्टरांवर अविश्वास दाखवत अभिषेक बॅनर्जींना घरी नेण्याचा निर्णय घेतला. आता अभिषेक बॅनर्जींवर हॉस्पिटलऐवजी त्यांच्या घरीच, कुटुंबाच्या खासगी डॉक्टरांच्या देखरेखीखाली गुप्तपणे उपचार चालणार आहेत. यासाठी टीएमसी खासदाराच्या घरी ऑक्सिजन सिलेंडर, मॉनिटर आणि इतर आवश्यक वैद्यकीय उपकरणं तातडीने बसवली जात आहेत.
