गेल्या वर्षी ९२ लाख रुपये इन्कम टॅक्स भरणाऱ्या उबेरच्या एका सीनियर इंजिनिअरला पॅटर्निटी लिव्हवर असतानाच कामावरून काढलं आहे. आता सेव्हरन्स पॅकेजवरही सरकार टॅक्स कापत असल्याचा संताप त्याने व्यक्त केलाय.
बंगळुरू: भारतात जेव्हा टॅक्स भरण्याची वेळ येते, तेव्हा विषय फक्त आयटीआर (ITR) पुरता मर्यादित राहत नाही. जेव्हा अडचणीची वेळ येते आणि सिस्टीमकडून काहीच मदत मिळत नाही, तेव्हा "आपण एवढा टॅक्स का भरायचा?" हा प्रश्न सोशल मीडियावर नेहमीच विचारला जातो.
आता 'उबेर' (Uber) या प्रसिद्ध कंपनीच्या एका सीनियर इंजिनिअरने 'रेडिट' (Reddit) वर एक पोस्ट शेअर केलीय. या पोस्टमुळे ही जुनी चर्चा पुन्हा सुरू झालीय. या इंजिनिअरने गेल्या आर्थिक वर्षात तब्बल ९२ लाख रुपये इन्कम टॅक्स भरला होता. पण तो पॅटर्निटी लिव्हवर (Paternity Leave) असतानाच त्याला कामावरून काढण्यात आलं (Layoff). आता त्याला ९० लाख रुपये (LPA) पॅकेजची दुसरी नोकरीही मिळत नाहीये, अशी खंत त्याने व्यक्त केलीय.
पॅटर्निटी लिव्हवर असतानाच नोकरी गेली!
नाव न सांगता या इंजिनिअरने लिहिलंय, "मी उबेरमध्ये सीनियर इंजिनिअर होतो. गेल्या वर्षी माझं पॅकेज खूप चांगलं होतं, त्यामुळे मी भारत सरकारला तब्बल ९२ लाख रुपये टॅक्स भरला. पण दुर्दैवाने, या वर्षी मी ४ महिन्यांच्या पॅटर्निटी लिव्हवर असतानाच कंपनीने मला कामावरून काढलं."
उबेरच्या अधिकृत नियमांनुसार कर्मचाऱ्यांना १८ आठवड्यांची पॅटर्निटी लिव्ह मिळते. पण या इंजिनिअरला नक्की कोणत्या परिस्थितीत काढलं, हे रेडिट पोस्टवरून स्पष्ट झालेलं नाही.
या इंजिनिअरची अडचण फक्त नोकरी जाण्यापुरती नाहीये. त्याच्या घरी नुकतंच जन्मलेलं बाळ आहे आणि मदतीला दुसरं कोणीही नाही. अशा परिस्थितीत पुढच्या काही महिन्यांत नवीन नोकरी शोधणं त्याच्यासाठी खूप कठीण काम आहे.
सेव्हरन्स पे (Severance Pay) वर टॅक्स कापल्याने संताप
लगेच नवीन नोकरी मिळण्याची शक्यता कमी असल्याने, कंपनीकडून मिळणारं सेव्हरन्स अमाऊंट (Severance Amount) त्याच्यासाठी खूप महत्त्वाचं आहे. पण या पैशांवरही सरकार टॅक्स कापणार असल्याचं पाहून तो भडकलाय. "सरकार सेव्हरन्सच्या पैशांवर टॅक्स लावून मला लुटत आहे," असा आरोप त्याने केलाय. भारतात कर्मचाऱ्यांना कोणतीही जॉब सिक्युरिटी किंवा सोशल सिक्युरिटी मिळत नाही, अशी तक्रार करत त्याने परदेशातील सिस्टीमशी भारताची तुलना केलीय.
भारत कायमचा सोडणार: इंजिनिअरचा निर्णय
आयटी क्षेत्रात लाखो रुपये पगार असलेली नोकरी किती लवकर जाऊ शकते आणि त्यानंतर कर्ज, होम लोन (Mortgages), रोजचा खर्च आणि कुटुंबाची जबाबदारी कशी अंगावर येते, हे या पोस्टमधून स्पष्ट दिसतंय.
पोस्टच्या शेवटी त्याने भारत सोडण्याची इच्छा व्यक्त केलीय. "मी लवकरच भारत सोडतोय आणि पुन्हा कधीच परत येणार नाही. माझ्या चुकांमधून शिका, जर तुम्हाला तुमच्या कुटुंबाचं भलं हवं असेल, तर तुम्हीही देश सोडा," असा सल्ला त्याने दिलाय.
एका व्यक्तीची रेडिट पोस्ट संपूर्ण आयटी क्षेत्राची अवस्था सांगू शकत नसली, तरी ९२ लाख रुपये टॅक्स भरणाऱ्या या कर्मचाऱ्याच्या पोस्टने सोशल मीडियावर मोठी चर्चा नक्कीच सुरू केलीय.
