Government Schemes: या सरकारी योजनांमध्ये करा गुंतवणूक, होईल बंपर फायदा!
Government Schemes: भविष्यासाठी पैसे वाचवण्याचा विचार करताय? मग केंद्र सरकारच्या या 9 जबरदस्त आणि सुरक्षित बचत योजना तुमच्यासाठीच आहेत. चला, याबद्दल सविस्तर जाणून घेऊया.
जास्त व्याज देणाऱ्या 9 सरकारी योजना
भविष्यासाठी पैसे वाचवण्याची इच्छा प्रत्येकालाच असते. पण जास्त व्याज देणाऱ्या खासगी कंपन्यांवर विश्वास ठेवता येत नाही. तिथे पैसे गुंतवून फसवणूक होण्याची शक्यता असते. म्हणूनच, केंद्र सरकारने आणलेल्या 9 सुरक्षित बचत योजनांबद्दल इथे जाणून घेऊया.
पब्लिक प्रॉव्हिडंट फंड (PPF):
ही केंद्र सरकारची एक लोकप्रिय, दीर्घकालीन आणि कर-बचत योजना आहे. ही 15 वर्षांची योजना असून, वर्षाला जास्तीत जास्त ₹1.5 लाख गुंतवू शकता. यावर सध्या 7.1% व्याज आणि कलम 80C अंतर्गत कर सवलत मिळते. सुरक्षित असल्यामुळे ही योजना खूप लोकप्रिय आहे.
सुकन्या समृद्धी योजना (SSY):
मुलींच्या शिक्षण आणि लग्नासाठी केंद्र सरकारने ही योजना आणली आहे. 10 वर्षांपेक्षा कमी वयाच्या मुलीच्या नावाने पालक हे खातं उघडू शकतात. वर्षाला ₹250 ते ₹1.5 लाख गुंतवता येतात. यावर 8.2% व्याज आणि 80C अंतर्गत कर सवलत मिळते.
ज्येष्ठ नागरिक बचत योजना (SCSS):
60 वर्षांवरील निवृत्त लोकांसाठी ही एक सुरक्षित गुंतवणूक योजना आहे. सध्या यावर 8.2% व्याज (दर तीन महिन्यांनी) मिळतं. ही 5 वर्षांची योजना असून, यात जास्तीत जास्त ₹30 लाख गुंतवू शकता. कर सवलत आणि निश्चित उत्पन्न हे याचे फायदे आहेत.
नॅशनल सेव्हिंग सर्टिफिकेट (NSC)
पोस्ट ऑफिसमार्फत केंद्र सरकार ही सुरक्षित बचत योजना चालवते. याची मुदत 5 वर्षांची आहे. सध्या यावर वार्षिक 7.7% व्याज मिळतं. यातील गुंतवणुकीवर कलम 80C अंतर्गत कर सवलतही मिळते.
नॅशनल पेन्शन सिस्टीम (NPS)
निवृत्तीनंतर दरमहा उत्पन्न मिळावं, यासाठी भारत सरकारने ही योजना आणली आहे. 18 ते 70 वयोगटातील कोणीही यात गुंतवणूक करू शकतं. कर-बचत आणि दीर्घकाळात चांगला परतावा हे याचे फायदे आहेत.
किसान विकास पत्र (KVP)
तुमचे पैसे दुप्पट करणारी ही एक जबरदस्त योजना आहे. सध्याच्या दरानुसार, तुमचे पैसे 115 महिन्यांत (9 वर्षे 7 महिने) दुप्पट होतात. 18 वर्षांवरील कोणीही यात गुंतवणूक करू शकतं. पण, यावर 80C अंतर्गत कर सवलत मिळत नाही.
पोस्ट ऑफिस मंथली इन्कम स्कीम (POMIS)
ज्यांना दरमहा निश्चित उत्पन्न हवं आहे, त्यांच्यासाठी ही योग्य योजना आहे. 5 वर्षांच्या कालावधीसाठी 7.4% व्याजाने मासिक उत्पन्न मिळतं. एक व्यक्ती जास्तीत जास्त ₹9 लाख गुंतवू शकते. 10 वर्षांवरील मुलंही खातं उघडू शकतात.
सॉव्हरिन गोल्ड बाँड्स (SGB)
प्रत्यक्ष सोनं न खरेदी करता सोन्यात गुंतवणूक करण्यासाठी RBI ने ही योजना आणली आहे. ही 8 वर्षांची योजना आहे. यावर वार्षिक 2.5% व्याज आणि सोन्याच्या वाढत्या किमतीचा फायदा मिळतो. कमीत कमी 1 ग्रॅम ते जास्तीत जास्त 4 किलोपर्यंत गुंतवणूक करता येते.
अटल पेन्शन योजना (APY)
असंघटित क्षेत्रातील कामगारांसाठी केंद्र सरकारने ही पेन्शन योजना सुरू केली आहे. 18 ते 40 वयोगटातील लोक यात सहभागी होऊ शकतात. वयाच्या 60 वर्षांनंतर, दरमहा ₹1,000 ते ₹5,000 पर्यंत निश्चित पेन्शन मिळते.
